Narayaniyam Dashaka 75 - Grantha

𑌪𑍍𑌰𑌾𑌤𑌃 𑌸𑌂𑌤𑍍𑌰𑌸𑍍𑌤𑌭𑍋𑌜𑌕𑍍𑌷𑌿𑌤𑌿𑌪𑌤𑌿𑌵𑌚𑌸𑌾 𑌪𑍍𑌰𑌸𑍍𑌤𑍁𑌤𑍇 𑌮𑌲𑍍𑌲𑌤𑍂𑌰𑍍𑌯𑍇
𑌸𑌂𑌘𑍇 𑌰𑌾𑌜𑍍𑌞𑌾𑌂 𑌚 𑌮𑌂𑌚𑌾𑌨𑌭𑌿𑌯𑌯𑍁𑌷𑌿 𑌗𑌤𑍇 𑌨𑌂𑌦𑌗𑍋𑌪𑍇𑌽𑌪𑌿 𑌹𑌰𑍍𑌮𑍍𑌯𑌮𑍍 ।
𑌕𑌂𑌸𑍇 𑌸𑍌𑌧𑌾𑌧𑌿𑌰𑍂𑌢𑍇 𑌤𑍍𑌵𑌮𑌪𑌿 𑌸𑌹𑌬𑌲𑌃 𑌸𑌾𑌨𑍁𑌗𑌶𑍍𑌚𑌾𑌰𑍁𑌵𑍇𑌷𑍋
𑌰𑌂𑌗𑌦𑍍𑌵𑌾𑌰𑌂 𑌗𑌤𑍋𑌽𑌭𑍂𑌃 𑌕𑍁𑌪𑌿𑌤𑌕𑍁𑌵𑌲𑌯𑌾𑌪𑍀𑌡𑌨𑌾𑌗𑌾𑌵𑌲𑍀𑌢𑌮𑍍 ॥1॥

𑌪𑌾𑌪𑌿𑌷𑍍𑌠𑌾𑌪𑍇𑌹𑌿 𑌮𑌾𑌰𑍍𑌗𑌾𑌦𑍍𑌦𑍍𑌰𑍁𑌤𑌮𑌿𑌤𑌿 𑌵𑌚𑌸𑌾 𑌨𑌿𑌷𑍍𑌠𑍁𑌰𑌕𑍍𑌰𑍁𑌦𑍍𑌧𑌬𑍁𑌦𑍍𑌧𑍇-
𑌰𑌂𑌬𑌷𑍍𑌠𑌸𑍍𑌯 𑌪𑍍𑌰𑌣𑍋𑌦𑌾𑌦𑌧𑌿𑌕𑌜𑌵𑌜𑍁𑌷𑌾 𑌹𑌸𑍍𑌤𑌿𑌨𑌾 𑌗𑍃𑌹𑍍𑌯𑌮𑌾𑌣𑌃 ।
𑌕𑍇𑌲𑍀𑌮𑍁𑌕𑍍𑌤𑍋𑌽𑌥 𑌗𑍋𑌪𑍀𑌕𑍁𑌚𑌕𑌲𑌶𑌚𑌿𑌰𑌸𑍍𑌪𑌰𑍍𑌧𑌿𑌨𑌂 𑌕𑍁𑌂𑌭𑌮𑌸𑍍𑌯
𑌵𑍍𑌯𑌾𑌹𑌤𑍍𑌯𑌾𑌲𑍀𑌯𑌥𑌾𑌸𑍍𑌤𑍍𑌵𑌂 𑌚𑌰𑌣𑌭𑍁𑌵𑌿 𑌪𑍁𑌨𑌰𑍍𑌨𑌿𑌰𑍍𑌗𑌤𑍋 𑌵𑌲𑍍𑌗𑍁𑌹𑌾𑌸𑍀 ॥2॥

𑌹𑌸𑍍𑌤𑌪𑍍𑌰𑌾𑌪𑍍𑌯𑍋𑌽𑌪𑍍𑌯𑌗𑌮𑍍𑌯𑍋 𑌝𑌟𑌿𑌤𑌿 𑌮𑍁𑌨𑌿𑌜𑌨𑌸𑍍𑌯𑍇𑌵 𑌧𑌾𑌵𑌨𑍍 𑌗𑌜𑍇𑌂𑌦𑍍𑌰𑌂
𑌕𑍍𑌰𑍀𑌡𑌨𑍍𑌨𑌾𑌪𑌾𑌤𑍍𑌯 𑌭𑍂𑌮𑍌 𑌪𑍁𑌨𑌰𑌭𑌿𑌪𑌤𑌤𑌸𑍍𑌤𑌸𑍍𑌯 𑌦𑌂𑌤𑌂 𑌸𑌜𑍀𑌵𑌮𑍍 ।
𑌮𑍂𑌲𑌾𑌦𑍁𑌨𑍍𑌮𑍂𑌲𑍍𑌯 𑌤𑌨𑍍𑌮𑍂𑌲𑌗𑌮𑌹𑌿𑌤𑌮𑌹𑌾𑌮𑍌𑌕𑍍𑌤𑌿𑌕𑌾𑌨𑍍𑌯𑌾𑌤𑍍𑌮𑌮𑌿𑌤𑍍𑌰𑍇
𑌪𑍍𑌰𑌾𑌦𑌾𑌸𑍍𑌤𑍍𑌵𑌂 𑌹𑌾𑌰𑌮𑍇𑌭𑌿𑌰𑍍𑌲𑌲𑌿𑌤𑌵𑌿𑌰𑌚𑌿𑌤𑌂 𑌰𑌾𑌧𑌿𑌕𑌾𑌯𑍈 𑌦𑌿𑌶𑍇𑌤𑌿 ॥3॥

𑌗𑍃𑌹𑍍𑌣𑌾𑌨𑌂 𑌦𑌂𑌤𑌮𑌂𑌸𑍇 𑌯𑍁𑌤𑌮𑌥 𑌹𑌲𑌿𑌨𑌾 𑌰𑌂𑌗𑌮𑌂𑌗𑌾𑌵𑌿𑌶𑌂𑌤𑌂
𑌤𑍍𑌵𑌾𑌂 𑌮𑌂𑌗𑌲𑍍𑌯𑌾𑌂𑌗𑌭𑌂𑌗𑍀𑌰𑌭𑌸𑌹𑍃𑌤𑌮𑌨𑍋𑌲𑍋𑌚𑌨𑌾 𑌵𑍀𑌕𑍍𑌷𑍍𑌯 𑌲𑍋𑌕𑌾𑌃 ।
𑌹𑌂𑌹𑍋 𑌧𑌨𑍍𑌯𑍋 𑌹𑌿 𑌨𑌂𑌦𑍋 𑌨𑌹𑌿 𑌨𑌹𑌿 𑌪𑌶𑍁𑌪𑌾𑌲𑌾𑌂𑌗𑌨𑌾 𑌨𑍋 𑌯𑌶𑍋𑌦𑌾
𑌨𑍋 𑌨𑍋 𑌧𑌨𑍍𑌯𑍇𑌕𑍍𑌷𑌣𑌾𑌃 𑌸𑍍𑌮𑌸𑍍𑌤𑍍𑌰𑌿𑌜𑌗𑌤𑌿 𑌵𑌯𑌮𑍇𑌵𑍇𑌤𑌿 𑌸𑌰𑍍𑌵𑍇 𑌶𑌶𑌂𑌸𑍁𑌃 ॥4॥

𑌪𑍂𑌰𑍍𑌣𑌂 𑌬𑍍𑌰𑌹𑍍𑌮𑍈𑌵 𑌸𑌾𑌕𑍍𑌷𑌾𑌨𑍍𑌨𑌿𑌰𑌵𑌧𑌿 𑌪𑌰𑌮𑌾𑌨𑌂𑌦𑌸𑌾𑌂𑌦𑍍𑌰𑌪𑍍𑌰𑌕𑌾𑌶𑌂
𑌗𑍋𑌪𑍇𑌶𑍁 𑌤𑍍𑌵𑌂 𑌵𑍍𑌯𑌲𑌾𑌸𑍀𑌰𑍍𑌨 𑌖𑌲𑍁 𑌬𑌹𑍁𑌜𑌨𑍈𑌸𑍍𑌤𑌾𑌵𑌦𑌾𑌵𑍇𑌦𑌿𑌤𑍋𑌽𑌭𑍂𑌃 ।
𑌦𑍃𑌷𑍍𑌟𑍍𑌵𑌾𑌽𑌥 𑌤𑍍𑌵𑌾𑌂 𑌤𑌦𑍇𑌦𑌂𑌪𑍍𑌰𑌥𑌮𑌮𑍁𑌪𑌗𑌤𑍇 𑌪𑍁𑌣𑍍𑌯𑌕𑌾𑌲𑍇 𑌜𑌨𑍌𑌘𑌾𑌃
𑌪𑍂𑌰𑍍𑌣𑌾𑌨𑌂𑌦𑌾 𑌵𑌿𑌪𑌾𑌪𑌾𑌃 𑌸𑌰𑌸𑌮𑌭𑌿𑌜𑌗𑍁𑌸𑍍𑌤𑍍𑌵𑌤𑍍𑌕𑍃𑌤𑌾𑌨𑌿 𑌸𑍍𑌮𑍃𑌤𑌾𑌨𑌿 ॥5॥

𑌚𑌾𑌣𑍂𑌰𑍋 𑌮𑌲𑍍𑌲𑌵𑍀𑌰𑌸𑍍𑌤𑌦𑌨𑍁 𑌨𑍃𑌪𑌗𑌿𑌰𑌾 𑌮𑍁𑌷𑍍𑌟𑌿𑌕𑍋 𑌮𑍁𑌷𑍍𑌟𑌿𑌶𑌾𑌲𑍀
𑌤𑍍𑌵𑌾𑌂 𑌰𑌾𑌮𑌂 𑌚𑌾𑌭𑌿𑌪𑍇𑌦𑍇 𑌝𑌟𑌝𑌟𑌿𑌤𑌿 𑌮𑌿𑌥𑍋 𑌮𑍁𑌷𑍍𑌟𑌿𑌪𑌾𑌤𑌾𑌤𑌿𑌰𑍂𑌕𑍍𑌷𑌮𑍍 ।
𑌉𑌤𑍍𑌪𑌾𑌤𑌾𑌪𑌾𑌤𑌨𑌾𑌕𑌰𑍍𑌷𑌣𑌵𑌿𑌵𑌿𑌧𑌰𑌣𑌾𑌨𑍍𑌯𑌾𑌸𑌤𑌾𑌂 𑌤𑌤𑍍𑌰 𑌚𑌿𑌤𑍍𑌰𑌂
𑌮𑍃𑌤𑍍𑌯𑍋𑌃 𑌪𑍍𑌰𑌾𑌗𑍇𑌵 𑌮𑌲𑍍𑌲𑌪𑍍𑌰𑌭𑍁𑌰𑌗𑌮𑌦𑌯𑌂 𑌭𑍂𑌰𑌿𑌶𑍋 𑌬𑌂𑌧𑌮𑍋𑌕𑍍𑌷𑌾𑌨𑍍 ॥6॥

𑌹𑌾 𑌧𑌿𑌕𑍍 𑌕𑌷𑍍𑌟𑌂 𑌕𑍁𑌮𑌾𑌰𑍌 𑌸𑍁𑌲𑌲𑌿𑌤𑌵𑌪𑍁𑌷𑍌 𑌮𑌲𑍍𑌲𑌵𑍀𑌰𑍌 𑌕𑌠𑍋𑌰𑍌
𑌨 𑌦𑍍𑌰𑌕𑍍𑌷𑍍𑌯𑌾𑌮𑍋 𑌵𑍍𑌰𑌜𑌾𑌮𑌸𑍍𑌤𑍍𑌵𑌰𑌿𑌤𑌮𑌿𑌤𑌿 𑌜𑌨𑍇 𑌭𑌾𑌷𑌮𑌾𑌣𑍇 𑌤𑌦𑌾𑌨𑍀𑌮𑍍 ।
𑌚𑌾𑌣𑍂𑌰𑌂 𑌤𑌂 𑌕𑌰𑍋𑌦𑍍𑌭𑍍𑌰𑌾𑌮𑌣𑌵𑌿𑌗𑌲𑌦𑌸𑍁𑌂 𑌪𑍋𑌥𑌯𑌾𑌮𑌾𑌸𑌿𑌥𑍋𑌰𑍍𑌵𑍍𑌯𑌾𑌂
𑌪𑌿𑌷𑍍𑌟𑍋𑌽𑌭𑍂𑌨𑍍𑌮𑍁𑌷𑍍𑌟𑌿𑌕𑍋𑌽𑌪𑌿 𑌦𑍍𑌰𑍁𑌤𑌮𑌥 𑌹𑌲𑌿𑌨𑌾 𑌨𑌷𑍍𑌟𑌶𑌿𑌷𑍍𑌟𑍈𑌰𑍍𑌦𑌧𑌾𑌵𑍇 ॥𑍭॥

𑌕𑌂𑌸 𑌸𑌂𑌵𑌾𑌰𑍍𑌯 𑌤𑍂𑌰𑍍𑌯𑌂 𑌖𑌲𑌮𑌤𑌿𑌰𑌵𑌿𑌦𑌨𑍍 𑌕𑌾𑌰𑍍𑌯𑌮𑌾𑌰𑍍𑌯𑌾𑌨𑍍 𑌪𑌿𑌤𑍃𑌂𑌸𑍍𑌤𑌾-
𑌨𑌾𑌹𑌂𑌤𑍁𑌂 𑌵𑍍𑌯𑌾𑌪𑍍𑌤𑌮𑍂𑌰𑍍𑌤𑍇𑌸𑍍𑌤𑌵 𑌚 𑌸𑌮𑌶𑌿𑌷𑌦𑍍𑌦𑍂𑌰𑌮𑍁𑌤𑍍𑌸𑌾𑌰𑌣𑌾𑌯 ।
𑌰𑍁𑌷𑍍𑌟𑍋 𑌦𑍁𑌷𑍍𑌟𑍋𑌕𑍍𑌤𑌿𑌭𑌿𑌸𑍍𑌤𑍍𑌵𑌂 𑌗𑌰𑍁𑌡 𑌇𑌵 𑌗𑌿𑌰𑌿𑌂 𑌮𑌂𑌚𑌮𑌂𑌚𑌨𑍍𑌨𑍁𑌦𑌂𑌚𑌤𑍍-
𑌖𑌡𑍍𑌗𑌵𑍍𑌯𑌾𑌵𑌲𑍍𑌗𑌦𑍁𑌸𑍍𑌸𑌂𑌗𑍍𑌰𑌹𑌮𑌪𑌿 𑌚 𑌹𑌠𑌾𑌤𑍍 𑌪𑍍𑌰𑌾𑌗𑍍𑌰𑌹𑍀𑌰𑍌𑌗𑍍𑌰𑌸𑍇𑌨𑌿𑌮𑍍 ॥𑍮॥

𑌸𑌦𑍍𑌯𑍋 𑌨𑌿𑌷𑍍𑌪𑌿𑌷𑍍𑌟𑌸𑌂𑌧𑌿𑌂 𑌭𑍁𑌵𑌿 𑌨𑌰𑌪𑌤𑌿𑌮𑌾𑌪𑌾𑌤𑍍𑌯 𑌤𑌸𑍍𑌯𑍋𑌪𑌰𑌿𑌷𑍍𑌟𑌾-
𑌤𑍍𑌤𑍍𑌵𑌯𑍍𑌯𑌾𑌪𑌾𑌤𑍍𑌯𑍇 𑌤𑌦𑍈𑌵 𑌤𑍍𑌵𑌦𑍁𑌪𑌰𑌿 𑌪𑌤𑌿𑌤𑌾 𑌨𑌾𑌕𑌿𑌨𑌾𑌂 𑌪𑍁𑌷𑍍𑌪𑌵𑍃𑌷𑍍𑌟𑌿𑌃 ।
𑌕𑌿𑌂 𑌕𑌿𑌂 𑌬𑍍𑌰𑍂𑌮𑌸𑍍𑌤𑌦𑌾𑌨𑍀𑌂 𑌸𑌤𑌤𑌮𑌪𑌿 𑌭𑌿𑌯𑌾 𑌤𑍍𑌵𑌦𑍍𑌗𑌤𑌾𑌤𑍍𑌮𑌾 𑌸 𑌭𑍇𑌜𑍇
𑌸𑌾𑌯𑍁𑌜𑍍𑌯𑌂 𑌤𑍍𑌵𑌦𑍍𑌵𑌧𑍋𑌤𑍍𑌥𑌾 𑌪𑌰𑌮 𑌪𑌰𑌮𑌿𑌯𑌂 𑌵𑌾𑌸𑌨𑌾 𑌕𑌾𑌲𑌨𑍇𑌮𑍇𑌃 ॥𑍯॥

𑌤𑌦𑍍𑌭𑍍𑌰𑌾𑌤𑍃𑌨𑌷𑍍𑌟 𑌪𑌿𑌷𑍍𑌟𑍍𑌵𑌾 𑌦𑍍𑌰𑍁𑌤𑌮𑌥 𑌪𑌿𑌤𑌰𑍌 𑌸𑌨𑍍𑌨𑌮𑌨𑍍𑌨𑍁𑌗𑍍𑌰𑌸𑍇𑌨𑌂
𑌕𑍃𑌤𑍍𑌵𑌾 𑌰𑌾𑌜𑌾𑌨𑌮𑍁𑌚𑍍𑌚𑍈𑌰𑍍𑌯𑌦𑍁𑌕𑍁𑌲𑌮𑌖𑌿𑌲𑌂 𑌮𑍋𑌦𑌯𑌨𑍍 𑌕𑌾𑌮𑌦𑌾𑌨𑍈𑌃 ।
𑌭𑌕𑍍𑌤𑌾𑌨𑌾𑌮𑍁𑌤𑍍𑌤𑌮𑌂 𑌚𑍋𑌦𑍍𑌧𑌵𑌮𑌮𑌰𑌗𑍁𑌰𑍋𑌰𑌾𑌪𑍍𑌤𑌨𑍀𑌤𑌿𑌂 𑌸𑌖𑌾𑌯𑌂
𑌲𑌬𑍍𑌧𑍍𑌵𑌾 𑌤𑍁𑌷𑍍𑌟𑍋 𑌨𑌗𑌰𑍍𑌯𑌾𑌂 𑌪𑌵𑌨𑌪𑍁𑌰𑌪𑌤𑍇 𑌰𑍁𑌂𑌧𑌿 𑌮𑍇 𑌸𑌰𑍍𑌵𑌰𑍋𑌗𑌾𑌨𑍍 ॥10॥

Browse Related Categories: