Narayaniyam Dashaka 62 - Grantha

𑌕𑌦𑌾𑌚𑌿𑌦𑍍𑌗𑍋𑌪𑌾𑌲𑌾𑌨𑍍 𑌵𑌿𑌹𑌿𑌤𑌮𑌖𑌸𑌂𑌭𑌾𑌰𑌵𑌿𑌭𑌵𑌾𑌨𑍍
𑌨𑌿𑌰𑍀𑌕𑍍𑌷𑍍𑌯 𑌤𑍍𑌵𑌂 𑌶𑍌𑌰𑍇 𑌮𑌘𑌵𑌮𑌦𑌮𑍁𑌦𑍍𑌧𑍍𑌵𑌂𑌸𑌿𑌤𑍁𑌮𑌨𑌾𑌃 ।
𑌵𑌿𑌜𑌾𑌨𑌨𑍍𑌨𑌪𑍍𑌯𑍇𑌤𑌾𑌨𑍍 𑌵𑌿𑌨𑌯𑌮𑍃𑌦𑍁 𑌨𑌂𑌦𑌾𑌦𑌿𑌪𑌶𑍁𑌪𑌾-
𑌨𑌪𑍃𑌚𑍍𑌛𑌃 𑌕𑍋 𑌵𑌾𑌽𑌯𑌂 𑌜𑌨𑌕 𑌭𑌵𑌤𑌾𑌮𑍁𑌦𑍍𑌯𑌮 𑌇𑌤𑌿 ॥1॥

𑌬𑌭𑌾𑌷𑍇 𑌨𑌂𑌦𑌸𑍍𑌤𑍍𑌵𑌾𑌂 𑌸𑍁𑌤 𑌨𑌨𑍁 𑌵𑌿𑌧𑍇𑌯𑍋 𑌮𑌘𑌵𑌤𑍋
𑌮𑌖𑍋 𑌵𑌰𑍍𑌷𑍇 𑌵𑌰𑍍𑌷𑍇 𑌸𑍁𑌖𑌯𑌤𑌿 𑌸 𑌵𑌰𑍍𑌷𑍇𑌣 𑌪𑍃𑌥𑌿𑌵𑍀𑌮𑍍 ।
𑌨𑍃𑌣𑌾𑌂 𑌵𑌰𑍍𑌷𑌾𑌯𑌤𑍍𑌤𑌂 𑌨𑌿𑌖𑌿𑌲𑌮𑍁𑌪𑌜𑍀𑌵𑍍𑌯𑌂 𑌮𑌹𑌿𑌤𑌲𑍇
𑌵𑌿𑌶𑍇𑌷𑌾𑌦𑌸𑍍𑌮𑌾𑌕𑌂 𑌤𑍃𑌣𑌸𑌲𑌿𑌲𑌜𑍀𑌵𑌾 𑌹𑌿 𑌪𑌶𑌵𑌃 ॥2॥

𑌇𑌤𑌿 𑌶𑍍𑌰𑍁𑌤𑍍𑌵𑌾 𑌵𑌾𑌚𑌂 𑌪𑌿𑌤𑍁𑌰𑌯𑌿 𑌭𑌵𑌾𑌨𑌾𑌹 𑌸𑌰𑌸𑌂
𑌧𑌿𑌗𑍇𑌤𑌨𑍍𑌨𑍋 𑌸𑌤𑍍𑌯𑌂 𑌮𑌘𑌵𑌜𑌨𑌿𑌤𑌾 𑌵𑍃𑌷𑍍𑌟𑌿𑌰𑌿𑌤𑌿 𑌯𑌤𑍍 ।
𑌅𑌦𑍃𑌷𑍍𑌟𑌂 𑌜𑍀𑌵𑌾𑌨𑌾𑌂 𑌸𑍃𑌜𑌤𑌿 𑌖𑌲𑍁 𑌵𑍃𑌷𑍍𑌟𑌿𑌂 𑌸𑌮𑍁𑌚𑌿𑌤𑌾𑌂
𑌮𑌹𑌾𑌰𑌣𑍍𑌯𑍇 𑌵𑍃𑌕𑍍𑌷𑌾𑌃 𑌕𑌿𑌮𑌿𑌵 𑌬𑌲𑌿𑌮𑌿𑌂𑌦𑍍𑌰𑌾𑌯 𑌦𑌦𑌤𑍇 ॥3॥

𑌇𑌦𑌂 𑌤𑌾𑌵𑌤𑍍 𑌸𑌤𑍍𑌯𑌂 𑌯𑌦𑌿𑌹 𑌪𑌶𑌵𑍋 𑌨𑌃 𑌕𑍁𑌲𑌧𑌨𑌂
𑌤𑌦𑌾𑌜𑍀𑌵𑍍𑌯𑌾𑌯𑌾𑌸𑍌 𑌬𑌲𑌿𑌰𑌚𑌲𑌭𑌰𑍍𑌤𑍍𑌰𑍇 𑌸𑌮𑍁𑌚𑌿𑌤𑌃 ।
𑌸𑍁𑌰𑍇𑌭𑍍𑌯𑍋𑌽𑌪𑍍𑌯𑍁𑌤𑍍𑌕𑍃𑌷𑍍𑌟𑌾 𑌨𑌨𑍁 𑌧𑌰𑌣𑌿𑌦𑍇𑌵𑌾𑌃 𑌕𑍍𑌷𑌿𑌤𑌿𑌤𑌲𑍇
𑌤𑌤𑌸𑍍𑌤𑍇𑌽𑌪𑍍𑌯𑌾𑌰𑌾𑌧𑍍𑌯𑌾 𑌇𑌤𑌿 𑌜𑌗𑌦𑌿𑌥 𑌤𑍍𑌵𑌂 𑌨𑌿𑌜𑌜𑌨𑌾𑌨𑍍 ॥4॥

𑌭𑌵𑌦𑍍𑌵𑌾𑌚𑌂 𑌶𑍍𑌰𑍁𑌤𑍍𑌵𑌾 𑌬𑌹𑍁𑌮𑌤𑌿𑌯𑍁𑌤𑌾𑌸𑍍𑌤𑍇𑌽𑌪𑌿 𑌪𑌶𑍁𑌪𑌾𑌃
𑌦𑍍𑌵𑌿𑌜𑍇𑌂𑌦𑍍𑌰𑌾𑌨𑌰𑍍𑌚𑌂𑌤𑍋 𑌬𑌲𑌿𑌮𑌦𑌦𑍁𑌰𑍁𑌚𑍍𑌚𑍈𑌃 𑌕𑍍𑌷𑌿𑌤𑌿𑌭𑍃𑌤𑍇 ।
𑌵𑍍𑌯𑌧𑍁𑌃 𑌪𑍍𑌰𑌾𑌦𑌕𑍍𑌷𑌿𑌣𑍍𑌯𑌂 𑌸𑍁𑌭𑍃𑌶𑌮𑌨𑌮𑌨𑍍𑌨𑌾𑌦𑌰𑌯𑍁𑌤𑌾-
𑌸𑍍𑌤𑍍𑌵𑌮𑌾𑌦𑌶𑍍𑌶𑍈𑌲𑌾𑌤𑍍𑌮𑌾 𑌬𑌲𑌿𑌮𑌖𑌿𑌲𑌮𑌾𑌭𑍀𑌰𑌪𑍁𑌰𑌤𑌃 ॥5॥

𑌅𑌵𑍋𑌚𑌶𑍍𑌚𑍈𑌵𑌂 𑌤𑌾𑌨𑍍 𑌕𑌿𑌮𑌿𑌹 𑌵𑌿𑌤𑌥𑌂 𑌮𑍇 𑌨𑌿𑌗𑌦𑌿𑌤𑌂
𑌗𑌿𑌰𑍀𑌂𑌦𑍍𑌰𑍋 𑌨𑌨𑍍𑌵𑍇𑌷 𑌸𑍍𑌵𑌬𑌲𑌿𑌮𑍁𑌪𑌭𑍁𑌂𑌕𑍍𑌤𑍇 𑌸𑍍𑌵𑌵𑌪𑍁𑌷𑌾 ।
𑌅𑌯𑌂 𑌗𑍋𑌤𑍍𑌰𑍋 𑌗𑍋𑌤𑍍𑌰𑌦𑍍𑌵𑌿𑌷𑌿 𑌚 𑌕𑍁𑌪𑌿𑌤𑍇 𑌰𑌕𑍍𑌷𑌿𑌤𑍁𑌮𑌲𑌂
𑌸𑌮𑌸𑍍𑌤𑌾𑌨𑌿𑌤𑍍𑌯𑍁𑌕𑍍𑌤𑌾 𑌜𑌹𑍃𑌷𑍁𑌰𑌖𑌿𑌲𑌾 𑌗𑍋𑌕𑍁𑌲𑌜𑍁𑌷𑌃 ॥6॥

𑌪𑌰𑌿𑌪𑍍𑌰𑍀𑌤𑌾 𑌯𑌾𑌤𑌾𑌃 𑌖𑌲𑍁 𑌭𑌵𑌦𑍁𑌪𑍇𑌤𑌾 𑌵𑍍𑌰𑌜𑌜𑍁𑌷𑍋
𑌵𑍍𑌰𑌜𑌂 𑌯𑌾𑌵𑌤𑍍𑌤𑌾𑌵𑌨𑍍𑌨𑌿𑌜𑌮𑌖𑌵𑌿𑌭𑌂𑌗𑌂 𑌨𑌿𑌶𑌮𑌯𑌨𑍍 ।
𑌭𑌵𑌂𑌤𑌂 𑌜𑌾𑌨𑌨𑍍𑌨𑌪𑍍𑌯𑌧𑌿𑌕𑌰𑌜𑌸𑌾𑌽𑌽𑌕𑍍𑌰𑌾𑌂𑌤𑌹𑍃𑌦𑌯𑍋
𑌨 𑌸𑍇𑌹𑍇 𑌦𑍇𑌵𑍇𑌂𑌦𑍍𑌰𑌸𑍍𑌤𑍍𑌵𑌦𑍁𑌪𑌰𑌚𑌿𑌤𑌾𑌤𑍍𑌮𑍋𑌨𑍍𑌨𑌤𑌿𑌰𑌪𑌿 ॥𑍭॥

𑌮𑌨𑍁𑌷𑍍𑌯𑌤𑍍𑌵𑌂 𑌯𑌾𑌤𑍋 𑌮𑌧𑍁𑌭𑌿𑌦𑌪𑌿 𑌦𑍇𑌵𑍇𑌷𑍍𑌵𑌵𑌿𑌨𑌯𑌂
𑌵𑌿𑌧𑌤𑍍𑌤𑍇 𑌚𑍇𑌨𑍍𑌨𑌷𑍍𑌟𑌸𑍍𑌤𑍍𑌰𑌿𑌦𑌶𑌸𑌦𑌸𑌾𑌂 𑌕𑍋𑌽𑌪𑌿 𑌮𑌹𑌿𑌮𑌾 ।
𑌤𑌤𑌶𑍍𑌚 𑌧𑍍𑌵𑌂𑌸𑌿𑌷𑍍𑌯𑍇 𑌪𑌶𑍁𑌪𑌹𑌤𑌕𑌸𑍍𑌯 𑌶𑍍𑌰𑌿𑌯𑌮𑌿𑌤𑌿
𑌪𑍍𑌰𑌵𑍃𑌤𑍍𑌤𑌸𑍍𑌤𑍍𑌵𑌾𑌂 𑌜𑍇𑌤𑍁𑌂 𑌸 𑌕𑌿𑌲 𑌮𑌘𑌵𑌾 𑌦𑍁𑌰𑍍𑌮𑌦𑌨𑌿𑌧𑌿𑌃 ॥𑍮॥

𑌤𑍍𑌵𑌦𑌾𑌵𑌾𑌸𑌂 𑌹𑌂𑌤𑍁𑌂 𑌪𑍍𑌰𑌲𑌯𑌜𑌲𑌦𑌾𑌨𑌂𑌬𑌰𑌭𑍁𑌵𑌿
𑌪𑍍𑌰𑌹𑌿𑌣𑍍𑌵𑌨𑍍 𑌬𑌿𑌭𑍍𑌰𑌾𑌣; 𑌕𑍁𑌲𑌿𑌶𑌮𑌯𑌮𑌭𑍍𑌰𑍇𑌭𑌗𑌮𑌨𑌃 ।
𑌪𑍍𑌰𑌤𑌸𑍍𑌥𑍇𑌽𑌨𑍍𑌯𑍈𑌰𑌂𑌤𑌰𑍍𑌦𑌹𑌨𑌮𑌰𑍁𑌦𑌾𑌦𑍍𑌯𑍈𑌵𑌿𑌂𑌹𑌸𑌿𑌤𑍋
𑌭𑌵𑌨𑍍𑌮𑌾𑌯𑌾 𑌨𑍈𑌵 𑌤𑍍𑌰𑌿𑌭𑍁𑌵𑌨𑌪𑌤𑍇 𑌮𑍋𑌹𑌯𑌤𑌿 𑌕𑌮𑍍 ॥𑍯॥

𑌸𑍁𑌰𑍇𑌂𑌦𑍍𑌰𑌃 𑌕𑍍𑌰𑍁𑌦𑍍𑌧𑌶𑍍𑌚𑍇𑌤𑍍 𑌦𑍍𑌵𑌿𑌜𑌕𑌰𑍁𑌣𑌯𑌾 𑌶𑍈𑌲𑌕𑍃𑌪𑌯𑌾𑌽-
𑌪𑍍𑌯𑌨𑌾𑌤𑌂𑌕𑍋𑌽𑌸𑍍𑌮𑌾𑌕𑌂 𑌨𑌿𑌯𑌤 𑌇𑌤𑌿 𑌵𑌿𑌶𑍍𑌵𑌾𑌸𑍍𑌯 𑌪𑌶𑍁𑌪𑌾𑌨𑍍 ।
𑌅𑌹𑍋 𑌕𑌿𑌨𑍍𑌨𑌾𑌯𑌾𑌤𑍋 𑌗𑌿𑌰𑌿𑌭𑌿𑌦𑌿𑌤𑌿 𑌸𑌂𑌚𑌿𑌂𑌤𑍍𑌯 𑌨𑌿𑌵𑌸𑌨𑍍
𑌮𑌰𑍁𑌦𑍍𑌗𑍇𑌹𑌾𑌧𑍀𑌶 𑌪𑍍𑌰𑌣𑍁𑌦 𑌮𑍁𑌰𑌵𑍈𑌰𑌿𑌨𑍍 𑌮𑌮 𑌗𑌦𑌾𑌨𑍍 ॥10॥

Browse Related Categories: