Narayaniyam Dashaka 23 - Grantha

Collection of Spiritual and Devotional Literature in Various Indian Languages

View this in:

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 23

𑌪𑍍𑌰𑌾𑌚𑍇𑌤𑌸𑌸𑍍𑌤𑍁 𑌭𑌗𑌵𑌨𑍍𑌨𑌪𑌰𑍋 𑌹𑌿 𑌦𑌕𑍍𑌷-
𑌸𑍍𑌤𑍍𑌵𑌤𑍍𑌸𑍇𑌵𑌨𑌂 𑌵𑍍𑌯𑌧𑌿𑌤 𑌸𑌰𑍍𑌗𑌵𑌿𑌵𑍃𑌦𑍍𑌧𑌿𑌕𑌾𑌮𑌃 ।
𑌆𑌵𑌿𑌰𑍍𑌬𑌭𑍂𑌵𑌿𑌥 𑌤𑌦𑌾 𑌲𑌸𑌦𑌷𑍍𑌟𑌬𑌾𑌹𑍁-
𑌸𑍍𑌤𑌸𑍍𑌮𑍈 𑌵𑌰𑌂 𑌦𑌦𑌿𑌥 𑌤𑌾𑌂 𑌚 𑌵𑌧𑍂𑌮𑌸𑌿𑌕𑍍𑌨𑍀𑌮𑍍 ॥1॥

𑌤𑌸𑍍𑌯𑌾𑌤𑍍𑌮𑌜𑌾𑌸𑍍𑌤𑍍𑌵𑌯𑍁𑌤𑌮𑍀𑌶 𑌪𑍁𑌨𑌸𑍍𑌸𑌹𑌸𑍍𑌰𑌂
𑌶𑍍𑌰𑍀𑌨𑌾𑌰𑌦𑌸𑍍𑌯 𑌵𑌚𑌸𑌾 𑌤𑌵 𑌮𑌾𑌰𑍍𑌗𑌮𑌾𑌪𑍁𑌃 ।
𑌨𑍈𑌕𑌤𑍍𑌰𑌵𑌾𑌸𑌮𑍃𑌷𑌯𑍇 𑌸 𑌮𑍁𑌮𑍋𑌚 𑌶𑌾𑌪𑌂
𑌭𑌕𑍍𑌤𑍋𑌤𑍍𑌤𑌮𑌸𑍍𑌤𑍍𑌵𑍃𑌷𑌿𑌰𑌨𑍁𑌗𑍍𑌰𑌹𑌮𑍇𑌵 𑌮𑍇𑌨𑍇 ॥2॥

𑌷𑌷𑍍𑌟𑍍𑌯𑌾 𑌤𑌤𑍋 𑌦𑍁𑌹𑌿𑌤𑍃𑌭𑌿𑌃 𑌸𑍃𑌜𑌤𑌃 𑌕𑍁𑌲𑍌𑌘𑌾𑌨𑍍
𑌦𑍌𑌹𑌿𑌤𑍍𑌰𑌸𑍂𑌨𑍁𑌰𑌥 𑌤𑌸𑍍𑌯 𑌸 𑌵𑌿𑌶𑍍𑌵𑌰𑍂𑌪𑌃 ।
𑌤𑍍𑌵𑌤𑍍𑌸𑍍𑌤𑍋𑌤𑍍𑌰𑌵𑌰𑍍𑌮𑌿𑌤𑌮𑌜𑌾𑌪𑌯𑌦𑌿𑌂𑌦𑍍𑌰𑌮𑌾𑌜𑍌
𑌦𑍇𑌵 𑌤𑍍𑌵𑌦𑍀𑌯𑌮𑌹𑌿𑌮𑌾 𑌖𑌲𑍁 𑌸𑌰𑍍𑌵𑌜𑍈𑌤𑍍𑌰𑌃 ॥3॥

𑌪𑍍𑌰𑌾𑌕𑍍𑌶𑍂𑌰𑌸𑍇𑌨𑌵𑌿𑌷𑌯𑍇 𑌕𑌿𑌲 𑌚𑌿𑌤𑍍𑌰𑌕𑍇𑌤𑍁𑌃
𑌪𑍁𑌤𑍍𑌰𑌾𑌗𑍍𑌰𑌹𑍀 𑌨𑍃𑌪𑌤𑌿𑌰𑌂𑌗𑌿𑌰𑌸𑌃 𑌪𑍍𑌰𑌭𑌾𑌵𑌾𑌤𑍍 ।
𑌲𑌬𑍍𑌧𑍍𑌵𑍈𑌕𑌪𑍁𑌤𑍍𑌰𑌮𑌥 𑌤𑌤𑍍𑌰 𑌹𑌤𑍇 𑌸𑌪𑌤𑍍𑌨𑍀-
𑌸𑌂𑌘𑍈𑌰𑌮𑍁𑌹𑍍𑌯𑌦𑌵𑌶𑌸𑍍𑌤𑌵 𑌮𑌾𑌯𑌯𑌾𑌸𑍌 ॥4॥

𑌤𑌂 𑌨𑌾𑌰𑌦𑌸𑍍𑌤𑍁 𑌸𑌮𑌮𑌂𑌗𑌿𑌰𑌸𑌾 𑌦𑌯𑌾𑌲𑍁𑌃
𑌸𑌂𑌪𑍍𑌰𑌾𑌪𑍍𑌯 𑌤𑌾𑌵𑌦𑍁𑌪𑌦𑌰𑍍𑌶𑍍𑌯 𑌸𑍁𑌤𑌸𑍍𑌯 𑌜𑍀𑌵𑌮𑍍 ।
𑌕𑌸𑍍𑌯𑌾𑌸𑍍𑌮𑌿 𑌪𑍁𑌤𑍍𑌰 𑌇𑌤𑌿 𑌤𑌸𑍍𑌯 𑌗𑌿𑌰𑌾 𑌵𑌿𑌮𑍋𑌹𑌂
𑌤𑍍𑌯𑌕𑍍𑌤𑍍𑌵𑌾 𑌤𑍍𑌵𑌦𑌰𑍍𑌚𑌨𑌵𑌿𑌧𑍌 𑌨𑍃𑌪𑌤𑌿𑌂 𑌨𑍍𑌯𑌯𑍁𑌂𑌕𑍍𑌤 ॥5॥

𑌸𑍍𑌤𑍋𑌤𑍍𑌰𑌂 𑌚 𑌮𑌂𑌤𑍍𑌰𑌮𑌪𑌿 𑌨𑌾𑌰𑌦𑌤𑍋𑌽𑌥 𑌲𑌬𑍍𑌧𑍍𑌵𑌾
𑌤𑍋𑌷𑌾𑌯 𑌶𑍇𑌷𑌵𑌪𑍁𑌷𑍋 𑌨𑌨𑍁 𑌤𑍇 𑌤𑌪𑌸𑍍𑌯𑌨𑍍 ।
𑌵𑌿𑌦𑍍𑌯𑌾𑌧𑌰𑌾𑌧𑌿𑌪𑌤𑌿𑌤𑌾𑌂 𑌸 𑌹𑌿 𑌸𑌪𑍍𑌤𑌰𑌾𑌤𑍍𑌰𑍇
𑌲𑌬𑍍𑌧𑍍𑌵𑌾𑌪𑍍𑌯𑌕𑍁𑌂𑌠𑌮𑌤𑌿𑌰𑌨𑍍𑌵𑌭𑌜𑌦𑍍𑌭𑌵𑌂𑌤𑌮𑍍 ॥6॥

𑌤𑌸𑍍𑌮𑍈 𑌮𑍃𑌣𑌾𑌲𑌧𑌵𑌲𑍇𑌨 𑌸𑌹𑌸𑍍𑌰𑌶𑍀𑌰𑍍𑌷𑍍𑌣𑌾
𑌰𑍂𑌪𑍇𑌣 𑌬𑌦𑍍𑌧𑌨𑍁𑌤𑌿𑌸𑌿𑌦𑍍𑌧𑌗𑌣𑌾𑌵𑍃𑌤𑍇𑌨 ।
𑌪𑍍𑌰𑌾𑌦𑍁𑌰𑍍𑌭𑌵𑌨𑍍𑌨𑌚𑌿𑌰𑌤𑍋 𑌨𑍁𑌤𑌿𑌭𑌿𑌃 𑌪𑍍𑌰𑌸𑌨𑍍𑌨𑍋
𑌦𑌤𑍍𑌵𑌾𑌽𑌽𑌤𑍍𑌮𑌤𑌤𑍍𑌤𑍍𑌵𑌮𑌨𑍁𑌗𑍃𑌹𑍍𑌯 𑌤𑌿𑌰𑍋𑌦𑌧𑌾𑌥 ॥𑍭॥

𑌤𑍍𑌵𑌦𑍍𑌭𑌕𑍍𑌤𑌮𑍌𑌲𑌿𑌰𑌥 𑌸𑍋𑌽𑌪𑌿 𑌚 𑌲𑌕𑍍𑌷𑌲𑌕𑍍𑌷𑌂
𑌵𑌰𑍍𑌷𑌾𑌣𑌿 𑌹𑌰𑍍𑌷𑍁𑌲𑌮𑌨𑌾 𑌭𑍁𑌵𑌨𑍇𑌷𑍁 𑌕𑌾𑌮𑌮𑍍 ।
𑌸𑌂𑌗𑌾𑌪𑌯𑌨𑍍 𑌗𑍁𑌣𑌗𑌣𑌂 𑌤𑌵 𑌸𑍁𑌂𑌦𑌰𑍀𑌭𑌿𑌃
𑌸𑌂𑌗𑌾𑌤𑌿𑌰𑍇𑌕𑌰𑌹𑌿𑌤𑍋 𑌲𑌲𑌿𑌤𑌂 𑌚𑌚𑌾𑌰 ॥𑍮॥

𑌅𑌤𑍍𑌯𑌂𑌤𑌸𑌂𑌗𑌵𑌿𑌲𑌯𑌾𑌯 𑌭𑌵𑌤𑍍𑌪𑍍𑌰𑌣𑍁𑌨𑍍𑌨𑍋
𑌨𑍂𑌨𑌂 𑌸 𑌰𑍂𑌪𑍍𑌯𑌗𑌿𑌰𑌿𑌮𑌾𑌪𑍍𑌯 𑌮𑌹𑌤𑍍𑌸𑌮𑌾𑌜𑍇 ।
𑌨𑌿𑌶𑍍𑌶𑌂𑌕𑌮𑌂𑌕𑌕𑍃𑌤𑌵𑌲𑍍𑌲𑌭𑌮𑌂𑌗𑌜𑌾𑌰𑌿𑌂
𑌤𑌂 𑌶𑌂𑌕𑌰𑌂 𑌪𑌰𑌿𑌹𑌸𑌨𑍍𑌨𑍁𑌮𑌯𑌾𑌭𑌿𑌶𑍇𑌪𑍇 ॥𑍯॥

𑌨𑌿𑌸𑍍𑌸𑌂𑌭𑍍𑌰𑌮𑌸𑍍𑌤𑍍𑌵𑌯𑌮𑌯𑌾𑌚𑌿𑌤𑌶𑌾𑌪𑌮𑍋𑌕𑍍𑌷𑍋
𑌵𑍃𑌤𑍍𑌰𑌾𑌸𑍁𑌰𑌤𑍍𑌵𑌮𑍁𑌪𑌗𑌮𑍍𑌯 𑌸𑍁𑌰𑍇𑌂𑌦𑍍𑌰𑌯𑍋𑌧𑍀 ।
𑌭𑌕𑍍𑌤𑍍𑌯𑌾𑌤𑍍𑌮𑌤𑌤𑍍𑌤𑍍𑌵𑌕𑌥𑌨𑍈𑌃 𑌸𑌮𑌰𑍇 𑌵𑌿𑌚𑌿𑌤𑍍𑌰𑌂
𑌶𑌤𑍍𑌰𑍋𑌰𑌪𑌿 𑌭𑍍𑌰𑌮𑌮𑌪𑌾𑌸𑍍𑌯 𑌗𑌤𑌃 𑌪𑌦𑌂 𑌤𑍇 ॥10॥

𑌤𑍍𑌵𑌤𑍍𑌸𑍇𑌵𑌨𑍇𑌨 𑌦𑌿𑌤𑌿𑌰𑌿𑌂𑌦𑍍𑌰𑌵𑌧𑍋𑌦𑍍𑌯𑌤𑌾𑌽𑌪𑌿
𑌤𑌾𑌨𑍍𑌪𑍍𑌰𑌤𑍍𑌯𑍁𑌤𑍇𑌂𑌦𑍍𑌰𑌸𑍁𑌹𑍃𑌦𑍋 𑌮𑌰𑍁𑌤𑍋𑌽𑌭𑌿𑌲𑍇𑌭𑍇 ।
𑌦𑍁𑌷𑍍𑌟𑌾𑌶𑌯𑍇𑌽𑌪𑌿 𑌶𑍁𑌭𑌦𑍈𑌵 𑌭𑌵𑌨𑍍𑌨𑌿𑌷𑍇𑌵𑌾
𑌤𑌤𑍍𑌤𑌾𑌦𑍃𑌶𑌸𑍍𑌤𑍍𑌵𑌮𑌵 𑌮𑌾𑌂 𑌪𑌵𑌨𑌾𑌲𑌯𑍇𑌶 ॥11॥

Browse Related Categories: