Narayaniyam Dashaka 93 - Grantha

𑌬𑌂𑌧𑍁𑌸𑍍𑌨𑍇𑌹𑌂 𑌵𑌿𑌜𑌹𑍍𑌯𑌾𑌂 𑌤𑌵 𑌹𑌿 𑌕𑌰𑍁𑌣𑌯𑌾 𑌤𑍍𑌵𑌯𑍍𑌯𑍁𑌪𑌾𑌵𑍇𑌶𑌿𑌤𑌾𑌤𑍍𑌮𑌾
𑌸𑌰𑍍𑌵𑌂 𑌤𑍍𑌯𑌕𑍍𑌤𑍍𑌵𑌾 𑌚𑌰𑍇𑌯𑌂 𑌸𑌕𑌲𑌮𑌪𑌿 𑌜𑌗𑌦𑍍𑌵𑍀𑌕𑍍𑌷𑍍𑌯 𑌮𑌾𑌯𑌾𑌵𑌿𑌲𑌾𑌸𑌮𑍍 ।
𑌨𑌾𑌨𑌾𑌤𑍍𑌵𑌾𑌦𑍍𑌭𑍍𑌰𑌾𑌂𑌤𑌿𑌜𑌨𑍍𑌯𑌾𑌤𑍍 𑌸𑌤𑌿 𑌖𑌲𑍁 𑌗𑍁𑌣𑌦𑍋𑌷𑌾𑌵𑌬𑍋𑌧𑍇 𑌵𑌿𑌧𑌿𑌰𑍍𑌵𑌾
𑌵𑍍𑌯𑌾𑌸𑍇𑌧𑍋 𑌵𑌾 𑌕𑌥𑌂 𑌤𑍌 𑌤𑍍𑌵𑌯𑌿 𑌨𑌿𑌹𑌿𑌤𑌮𑌤𑍇𑌰𑍍𑌵𑍀𑌤𑌵𑍈𑌷𑌮𑍍𑌯𑌬𑍁𑌦𑍍𑌧𑍇𑌃 ॥1॥

𑌕𑍍𑌷𑍁𑌤𑍍𑌤𑍃𑌷𑍍𑌣𑌾𑌲𑍋𑌪𑌮𑌾𑌤𑍍𑌰𑍇 𑌸𑌤𑌤𑌕𑍃𑌤𑌧𑌿𑌯𑍋 𑌜𑌂𑌤𑌵𑌃 𑌸𑌂𑌤𑍍𑌯𑌨𑌂𑌤𑌾-
𑌸𑍍𑌤𑍇𑌭𑍍𑌯𑍋 𑌵𑌿𑌜𑍍𑌞𑌾𑌨𑌵𑌤𑍍𑌤𑍍𑌵𑌾𑌤𑍍 𑌪𑍁𑌰𑍁𑌷 𑌇𑌹 𑌵𑌰𑌸𑍍𑌤𑌜𑍍𑌜𑌨𑌿𑌰𑍍𑌦𑍁𑌰𑍍𑌲𑌭𑍈𑌵 ।
𑌤𑌤𑍍𑌰𑌾𑌪𑍍𑌯𑌾𑌤𑍍𑌮𑌾𑌤𑍍𑌮𑌨𑌃 𑌸𑍍𑌯𑌾𑌤𑍍𑌸𑍁𑌹𑍃𑌦𑌪𑌿 𑌚 𑌰𑌿𑌪𑍁𑌰𑍍𑌯𑌸𑍍𑌤𑍍𑌵𑌯𑌿 𑌨𑍍𑌯𑌸𑍍𑌤𑌚𑍇𑌤𑌾-
𑌸𑍍𑌤𑌾𑌪𑍋𑌚𑍍𑌛𑌿𑌤𑍍𑌤𑍇𑌰𑍁𑌪𑌾𑌯𑌂 𑌸𑍍𑌮𑌰𑌤𑌿 𑌸 𑌹𑌿 𑌸𑍁𑌹𑍃𑌤𑍍 𑌸𑍍𑌵𑌾𑌤𑍍𑌮𑌵𑍈𑌰𑍀 𑌤𑌤𑍋𑌽𑌨𑍍𑌯𑌃 ॥2॥

𑌤𑍍𑌵𑌤𑍍𑌕𑌾𑌰𑍁𑌣𑍍𑌯𑍇 𑌪𑍍𑌰𑌵𑍃𑌤𑍍𑌤𑍇 𑌕 𑌇𑌵 𑌨𑌹𑌿 𑌗𑍁𑌰𑍁𑌰𑍍𑌲𑍋𑌕𑌵𑍃𑌤𑍍𑌤𑍇𑌽𑌪𑌿 𑌭𑍂𑌮𑌨𑍍
𑌸𑌰𑍍𑌵𑌾𑌕𑍍𑌰𑌾𑌂𑌤𑌾𑌪𑌿 𑌭𑍂𑌮𑌿𑌰𑍍𑌨𑌹𑌿 𑌚𑌲𑌤𑌿 𑌤𑌤𑌸𑍍𑌸𑌤𑍍𑌕𑍍𑌷𑌮𑌾𑌂 𑌶𑌿𑌕𑍍𑌷𑌯𑍇𑌯𑌮𑍍 ।
𑌗𑍃𑌹𑍍𑌣𑍀𑌯𑌾𑌮𑍀𑌶 𑌤𑌤𑍍𑌤𑌦𑍍𑌵𑌿𑌷𑌯𑌪𑌰𑌿𑌚𑌯𑍇𑌽𑌪𑍍𑌯𑌪𑍍𑌰𑌸𑌕𑍍𑌤𑌿𑌂 𑌸𑌮𑍀𑌰𑌾𑌤𑍍
𑌵𑍍𑌯𑌾𑌪𑍍𑌤𑌤𑍍𑌵𑌂𑌚𑌾𑌤𑍍𑌮𑌨𑍋 𑌮𑍇 𑌗𑌗𑌨𑌗𑍁𑌰𑍁𑌵𑌶𑌾𑌦𑍍𑌭𑌾𑌤𑍁 𑌨𑌿𑌰𑍍𑌲𑍇𑌪𑌤𑌾 𑌚 ॥3

𑌸𑍍𑌵𑌚𑍍𑌛𑌃 𑌸𑍍𑌯𑌾𑌂 𑌪𑌾𑌵𑌨𑍋𑌽𑌹𑌂 𑌮𑌧𑍁𑌰 𑌉𑌦𑌕𑌵𑌦𑍍𑌵𑌹𑍍𑌨𑌿𑌵𑌨𑍍𑌮𑌾 𑌸𑍍𑌮 𑌗𑍃𑌹𑍍𑌣𑌾𑌂
𑌸𑌰𑍍𑌵𑌾𑌨𑍍𑌨𑍀𑌨𑍋𑌽𑌪𑌿 𑌦𑍋𑌷𑌂 𑌤𑌰𑍁𑌷𑍁 𑌤𑌮𑌿𑌵 𑌮𑌾𑌂 𑌸𑌰𑍍𑌵𑌭𑍂𑌤𑍇𑌷𑍍𑌵𑌵𑍇𑌯𑌾𑌮𑍍 ।
𑌪𑍁𑌷𑍍𑌟𑌿𑌰𑍍𑌨𑌷𑍍𑌟𑌿𑌃 𑌕𑌲𑌾𑌨𑌾𑌂 𑌶𑌶𑌿𑌨 𑌇𑌵 𑌤𑌨𑍋𑌰𑍍𑌨𑌾𑌤𑍍𑌮𑌨𑍋𑌽𑌸𑍍𑌤𑍀𑌤𑌿 𑌵𑌿𑌦𑍍𑌯𑌾𑌂
𑌤𑍋𑌯𑌾𑌦𑌿𑌵𑍍𑌯𑌸𑍍𑌤𑌮𑌾𑌰𑍍𑌤𑌾𑌂𑌡𑌵𑌦𑌪𑌿 𑌚 𑌤𑌨𑍁𑌷𑍍𑌵𑍇𑌕𑌤𑌾𑌂 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌤𑍍 ॥4॥

𑌸𑍍𑌨𑍇𑌹𑌾𑌦𑍍𑌵𑍍𑌯𑌾𑌧𑌾𑌤𑍍𑌤𑌪𑍁𑌤𑍍𑌰𑌪𑍍𑌰𑌣𑌯𑌮𑍃𑌤𑌕𑌪𑍋𑌤𑌾𑌯𑌿𑌤𑍋 𑌮𑌾 𑌸𑍍𑌮 𑌭𑍂𑌵𑌂
𑌪𑍍𑌰𑌾𑌪𑍍𑌤𑌂 𑌪𑍍𑌰𑌾𑌶𑍍𑌨𑌨𑍍 𑌸𑌹𑍇𑌯 𑌕𑍍𑌷𑍁𑌧𑌮𑌪𑌿 𑌶𑌯𑍁𑌵𑌤𑍍 𑌸𑌿𑌂𑌧𑍁𑌵𑌤𑍍𑌸𑍍𑌯𑌾𑌮𑌗𑌾𑌧𑌃 ।
𑌮𑌾 𑌪𑌪𑍍𑌤𑌂 𑌯𑍋𑌷𑌿𑌦𑌾𑌦𑍌 𑌶𑌿𑌖𑌿𑌨𑌿 𑌶𑌲𑌭𑌵𑌤𑍍 𑌭𑍃𑌂𑌗𑌵𑌤𑍍𑌸𑌾𑌰𑌭𑌾𑌗𑍀
𑌭𑍂𑌯𑌾𑌸𑌂 𑌕𑌿𑌂𑌤𑍁 𑌤𑌦𑍍𑌵𑌦𑍍𑌧𑌨𑌚𑌯𑌨𑌵𑌶𑌾𑌨𑍍𑌮𑌾𑌹𑌮𑍀𑌶 𑌪𑍍𑌰𑌣𑍇𑌶𑌮𑍍 ॥5॥

𑌮𑌾 𑌬𑌦𑍍𑌧𑍍𑌯𑌾𑌸𑌂 𑌤𑌰𑍁𑌣𑍍𑌯𑌾 𑌗𑌜 𑌇𑌵 𑌵𑌶𑌯𑌾 𑌨𑌾𑌰𑍍𑌜𑌯𑍇𑌯𑌂 𑌧𑌨𑍌𑌘𑌂
𑌹𑌰𑍍𑌤𑌾𑌨𑍍𑌯𑌸𑍍𑌤𑌂 𑌹𑌿 𑌮𑌾𑌧𑍍𑌵𑍀𑌹𑌰 𑌇𑌵 𑌮𑍃𑌗𑌵𑌨𑍍𑌮𑌾 𑌮𑍁𑌹𑌂 𑌗𑍍𑌰𑌾𑌮𑍍𑌯𑌗𑍀𑌤𑍈𑌃 ।
𑌨𑌾𑌤𑍍𑌯𑌾𑌸𑌜𑍍𑌜𑍇𑌯 𑌭𑍋𑌜𑍍𑌯𑍇 𑌝𑌷 𑌇𑌵 𑌬𑌲𑌿𑌶𑍇 𑌪𑌿𑌂𑌗𑌲𑌾𑌵𑌨𑍍𑌨𑌿𑌰𑌾𑌶𑌃
𑌸𑍁𑌪𑍍𑌯𑌾𑌂 𑌭𑌰𑍍𑌤𑌵𑍍𑌯𑌯𑍋𑌗𑌾𑌤𑍍 𑌕𑍁𑌰𑌰 𑌇𑌵 𑌵𑌿𑌭𑍋 𑌸𑌾𑌮𑌿𑌷𑍋𑌽𑌨𑍍𑌯𑍈𑌰𑍍𑌨 𑌹𑌨𑍍𑌯𑍈 ॥6॥

𑌵𑌰𑍍𑌤𑍇𑌯 𑌤𑍍𑌯𑌕𑍍𑌤𑌮𑌾𑌨𑌃 𑌸𑍁𑌖𑌮𑌤𑌿𑌶𑌿𑌶𑍁𑌵𑌨𑍍𑌨𑌿𑌸𑍍𑌸𑌹𑌾𑌯𑌶𑍍𑌚𑌰𑍇𑌯𑌂
𑌕𑌨𑍍𑌯𑌾𑌯𑌾 𑌏𑌕𑌶𑍇𑌷𑍋 𑌵𑌲𑌯 𑌇𑌵 𑌵𑌿𑌭𑍋 𑌵𑌰𑍍𑌜𑌿𑌤𑌾𑌨𑍍𑌯𑍋𑌨𑍍𑌯𑌘𑍋𑌷𑌃 ।
𑌤𑍍𑌵𑌚𑍍𑌚𑌿𑌤𑍍𑌤𑍋 𑌨𑌾𑌵𑌬𑍁𑌧𑍍𑌯𑍈 𑌪𑌰𑌮𑌿𑌷𑍁𑌕𑍃𑌦𑌿𑌵 𑌕𑍍𑌷𑍍𑌮𑌾𑌭𑍃𑌦𑌾𑌯𑌾𑌨𑌘𑍋𑌷𑌂
𑌗𑍇𑌹𑍇𑌷𑍍𑌵𑌨𑍍𑌯𑌪𑍍𑌰𑌣𑍀𑌤𑍇𑌷𑍍𑌵𑌹𑌿𑌰𑌿𑌵 𑌨𑌿𑌵𑌸𑌾𑌨𑍍𑌯𑍁𑌂𑌦𑍁𑌰𑍋𑌰𑍍𑌮𑌂𑌦𑌿𑌰𑍇𑌷𑍁 ॥𑍭॥

𑌤𑍍𑌵𑌯𑍍𑌯𑍇𑌵 𑌤𑍍𑌵𑌤𑍍𑌕𑍃𑌤𑌂 𑌤𑍍𑌵𑌂 𑌕𑍍𑌷𑌪𑌯𑌸𑌿 𑌜𑌗𑌦𑌿𑌤𑍍𑌯𑍂𑌰𑍍𑌣𑌨𑌾𑌭𑌾𑌤𑍍 𑌪𑍍𑌰𑌤𑍀𑌯𑌾𑌂
𑌤𑍍𑌵𑌚𑍍𑌚𑌿𑌂𑌤𑌾 𑌤𑍍𑌵𑌤𑍍𑌸𑍍𑌵𑌰𑍂𑌪𑌂 𑌕𑍁𑌰𑍁𑌤 𑌇𑌤𑌿 𑌦𑍃𑌢𑌂 𑌶𑌿𑌕𑍍𑌷𑌯𑍇 𑌪𑍇𑌶𑌕𑌾𑌰𑌾𑌤𑍍 ।
𑌵𑌿𑌡𑍍𑌭𑌸𑍍𑌮𑌾𑌤𑍍𑌮𑌾 𑌚 𑌦𑍇𑌹𑍋 𑌭𑌵𑌤𑌿 𑌗𑍁𑌰𑍁𑌵𑌰𑍋 𑌯𑍋 𑌵𑌿𑌵𑍇𑌕𑌂 𑌵𑌿𑌰𑌕𑍍𑌤𑌿𑌂
𑌧𑌤𑍍𑌤𑍇 𑌸𑌂𑌚𑌿𑌂𑌤𑍍𑌯𑌮𑌾𑌨𑍋 𑌮𑌮 𑌤𑍁 𑌬𑌹𑍁𑌰𑍁𑌜𑌾𑌪𑍀𑌡𑌿𑌤𑍋𑌽𑌯𑌂 𑌵𑌿𑌶𑍇𑌷𑌾𑌤𑍍 ॥𑍮॥

𑌹𑍀 𑌹𑍀 𑌮𑍇 𑌦𑍇𑌹𑌮𑍋𑌹𑌂 𑌤𑍍𑌯𑌜 𑌪𑌵𑌨𑌪𑍁𑌰𑌾𑌧𑍀𑌶 𑌯𑌤𑍍𑌪𑍍𑌰𑍇𑌮𑌹𑍇𑌤𑍋-
𑌰𑍍𑌗𑍇𑌹𑍇 𑌵𑌿𑌤𑍍𑌤𑍇 𑌕𑌲𑌤𑍍𑌰𑌾𑌦𑌿𑌷𑍁 𑌚 𑌵𑌿𑌵𑌶𑌿𑌤𑌾𑌸𑍍𑌤𑍍𑌵𑌤𑍍𑌪𑌦𑌂 𑌵𑌿𑌸𑍍𑌮𑌰𑌂𑌤𑌿 ।
𑌸𑍋𑌽𑌯𑌂 𑌵𑌹𑍍𑌨𑍇𑌶𑍍𑌶𑍁𑌨𑍋 𑌵𑌾 𑌪𑌰𑌮𑌿𑌹 𑌪𑌰𑌤𑌃 𑌸𑌾𑌂𑌪𑍍𑌰𑌤𑌂𑌚𑌾𑌕𑍍𑌷𑌿𑌕𑌰𑍍𑌣-
𑌤𑍍𑌵𑌗𑍍𑌜𑌿𑌹𑍍𑌵𑌾𑌦𑍍𑌯𑌾 𑌵𑌿𑌕𑌰𑍍𑌷𑌂𑌤𑍍𑌯𑌵𑌶𑌮𑌤 𑌇𑌤𑌃 𑌕𑍋𑌽𑌪𑌿 𑌨 𑌤𑍍𑌵𑌤𑍍𑌪𑌦𑌾𑌬𑍍𑌜𑍇 ॥𑍯॥

𑌦𑍁𑌰𑍍𑌵𑌾𑌰𑍋 𑌦𑍇𑌹𑌮𑍋𑌹𑍋 𑌯𑌦𑌿 𑌪𑍁𑌨𑌰𑌧𑍁𑌨𑌾 𑌤𑌰𑍍𑌹𑌿 𑌨𑌿𑌶𑍍𑌶𑍇𑌷𑌰𑍋𑌗𑌾𑌨𑍍
𑌹𑍃𑌤𑍍𑌵𑌾 𑌭𑌕𑍍𑌤𑌿𑌂 𑌦𑍍𑌰𑌢𑌿𑌷𑍍𑌠𑌾𑌂 𑌕𑍁𑌰𑍁 𑌤𑌵 𑌪𑌦𑌪𑌂𑌕𑍇𑌰𑍁𑌹𑍇 𑌪𑌂𑌕𑌜𑌾𑌕𑍍𑌷 ।
𑌨𑍂𑌨𑌂 𑌨𑌾𑌨𑌾𑌭𑌵𑌾𑌂𑌤𑍇 𑌸𑌮𑌧𑌿𑌗𑌤𑌮𑌮𑍁𑌂 𑌮𑍁𑌕𑍍𑌤𑌿𑌦𑌂 𑌵𑌿𑌪𑍍𑌰𑌦𑍇𑌹𑌂
𑌕𑍍𑌷𑍁𑌦𑍍𑌰𑍇 𑌹𑌾 𑌹𑌂𑌤 𑌮𑌾 𑌮𑌾 𑌕𑍍𑌷𑌿𑌪 𑌵𑌿𑌷𑌯𑌰𑌸𑍇 𑌪𑌾𑌹𑌿 𑌮𑌾𑌂 𑌮𑌾𑌰𑍁𑌤𑍇𑌶 ॥10॥

Browse Related Categories: