𑌘𑍁𑌷𑍍𑌯𑌤𑍇 𑌯𑌸𑍍𑌯 𑌨𑌗𑌰𑍇 𑌰𑌂𑌗𑌯𑌾𑌤𑍍𑌰𑌾 𑌦𑌿𑌨𑍇 𑌦𑌿𑌨𑍇 ।
𑌤𑌮𑌹𑌂 𑌶𑌿𑌰𑌸𑌾 𑌵𑌂𑌦𑍇 𑌰𑌾𑌜𑌾𑌨𑌂 𑌕𑍁𑌲𑌶𑍇𑌖𑌰𑌮𑍍 ॥
𑌶𑍍𑌰𑍀𑌵𑌲𑍍𑌲𑌭𑍇𑌤𑌿 𑌵𑌰𑌦𑍇𑌤𑌿 𑌦𑌯𑌾𑌪𑌰𑍇𑌤𑌿
𑌭𑌕𑍍𑌤𑌪𑍍𑌰𑌿𑌯𑍇𑌤𑌿 𑌭𑌵𑌲𑍁𑌂𑌠𑌨𑌕𑍋𑌵𑌿𑌦𑍇𑌤𑌿 ।
𑌨𑌾𑌥𑍇𑌤𑌿 𑌨𑌾𑌗𑌶𑌯𑌨𑍇𑌤𑌿 𑌜𑌗𑌨𑍍𑌨𑌿𑌵𑌾𑌸𑍇-
-𑌤𑍍𑌯𑌾𑌲𑌾𑌪𑌨𑌂 𑌪𑍍𑌰𑌤𑌿𑌪𑌦𑌂 𑌕𑍁𑌰𑍁 𑌮𑍇 𑌮𑍁𑌕𑍁𑌂𑌦 ॥ 1 ॥
𑌜𑌯𑌤𑍁 𑌜𑌯𑌤𑍁 𑌦𑍇𑌵𑍋 𑌦𑍇𑌵𑌕𑍀𑌨𑌂𑌦𑌨𑍋𑌽𑌯𑌂
𑌜𑌯𑌤𑍁 𑌜𑌯𑌤𑍁 𑌕𑍃𑌷𑍍𑌣𑍋 𑌵𑍃𑌷𑍍𑌣𑌿𑌵𑌂𑌶𑌪𑍍𑌰𑌦𑍀𑌪𑌃 ।
𑌜𑌯𑌤𑍁 𑌜𑌯𑌤𑍁 𑌮𑍇𑌘𑌶𑍍𑌯𑌾𑌮𑌲𑌃 𑌕𑍋𑌮𑌲𑌾𑌂𑌗𑍋
𑌜𑌯𑌤𑍁 𑌜𑌯𑌤𑍁 𑌪𑍃𑌥𑍍𑌵𑍀𑌭𑌾𑌰𑌨𑌾𑌶𑍋 𑌮𑍁𑌕𑍁𑌂𑌦𑌃 ॥ 2 ॥
𑌮𑍁𑌕𑍁𑌂𑌦 𑌮𑍂𑌰𑍍𑌧𑍍𑌨𑌾 𑌪𑍍𑌰𑌣𑌿𑌪𑌤𑍍𑌯 𑌯𑌾𑌚𑍇
𑌭𑌵𑌂𑌤𑌮𑍇𑌕𑌾𑌂𑌤𑌮𑌿𑌯𑌂𑌤𑌮𑌰𑍍𑌥𑌮𑍍 ।
𑌅𑌵𑌿𑌸𑍍𑌮𑍃𑌤𑌿𑌸𑍍𑌤𑍍𑌵𑌚𑍍𑌚𑌰𑌣𑌾𑌰𑌵𑌿𑌂𑌦𑍇
𑌭𑌵𑍇 𑌭𑌵𑍇 𑌮𑍇𑌽𑌸𑍍𑌤𑍁 𑌭𑌵𑌤𑍍𑌪𑍍𑌰𑌸𑌾𑌦𑌾𑌤𑍍 ॥ 3 ॥
𑌨𑌾𑌹𑌂 𑌵𑌂𑌦𑍇 𑌤𑌵 𑌚𑌰𑌣𑌯𑍋𑌰𑍍𑌦𑍍𑌵𑌂𑌦𑍍𑌵𑌮𑌦𑍍𑌵𑌂𑌦𑍍𑌵𑌹𑍇𑌤𑍋𑌃
𑌕𑍁𑌂𑌭𑍀𑌪𑌾𑌕𑌂 𑌗𑍁𑌰𑍁𑌮𑌪𑌿 𑌹𑌰𑍇 𑌨𑌾𑌰𑌕𑌂 𑌨𑌾𑌪𑌨𑍇𑌤𑍁𑌮𑍍 ।
𑌰𑌮𑍍𑌯𑌾𑌰𑌾𑌮𑌾𑌮𑍃𑌦𑍁𑌤𑌨𑍁𑌲𑌤𑌾 𑌨𑌂𑌦𑌨𑍇 𑌨𑌾𑌪𑌿 𑌰𑌂𑌤𑍁𑌂
𑌭𑌾𑌵𑍇 𑌭𑌾𑌵𑍇 𑌹𑍃𑌦𑌯𑌭𑌵𑌨𑍇 𑌭𑌾𑌵𑌯𑍇𑌯𑌂 𑌭𑌵𑌂𑌤𑌮𑍍 ॥ 4 ॥
𑌨𑌾𑌸𑍍𑌥𑌾 𑌧𑌰𑍍𑌮𑍇 𑌨 𑌵𑌸𑍁𑌨𑌿𑌚𑌯𑍇 𑌨𑍈𑌵 𑌕𑌾𑌮𑍋𑌪𑌭𑍋𑌗𑍇
𑌯𑌦𑍍𑌯𑌦𑍍𑌭𑌵𑍍𑌯𑌂 𑌭𑌵𑌤𑍁 𑌭𑌗𑌵𑌨𑍍 𑌪𑍂𑌰𑍍𑌵𑌕𑌰𑍍𑌮𑌾𑌨𑍁𑌰𑍂𑌪𑌮𑍍 ।
𑌏𑌤𑌤𑍍𑌪𑍍𑌰𑌾𑌰𑍍𑌥𑍍𑌯𑌂 𑌮𑌮 𑌬𑌹𑍁𑌮𑌤𑌂 𑌜𑌨𑍍𑌮𑌜𑌨𑍍𑌮𑌾𑌂𑌤𑌰𑍇𑌽𑌪𑌿
𑌤𑍍𑌵𑌤𑍍𑌪𑌾𑌦𑌾𑌂𑌭𑍋𑌰𑍁𑌹𑌯𑍁𑌗𑌗𑌤𑌾 𑌨𑌿𑌶𑍍𑌚𑌲𑌾 𑌭𑌕𑍍𑌤𑌿𑌰𑌸𑍍𑌤𑍁 ॥ 5 ॥
𑌦𑌿𑌵𑌿 𑌵𑌾 𑌭𑍁𑌵𑌿 𑌵𑌾 𑌮𑌮𑌾𑌸𑍍𑌤𑍁 𑌵𑌾𑌸𑍋
𑌨𑌰𑌕𑍇 𑌵𑌾 𑌨𑌰𑌕𑌾𑌂𑌤𑌕 𑌪𑍍𑌰𑌕𑌾𑌮𑌮𑍍 ।
𑌅𑌵𑌧𑍀𑌰𑌿𑌤 𑌶𑌾𑌰𑌦𑌾𑌰𑌵𑌿𑌂𑌦𑍌
𑌚𑌰𑌣𑍌 𑌤𑍇 𑌮𑌰𑌣𑍇𑌽𑌪𑌿 𑌚𑌿𑌂𑌤𑌯𑌾𑌮𑌿 ॥ 6 ॥
𑌕𑍃𑌷𑍍𑌣 𑌤𑍍𑌵𑌦𑍀𑌯 𑌪𑌦𑌪𑌂𑌕𑌜𑌪𑌂𑌜𑌰𑌾𑌂𑌤-
-𑌮𑌦𑍍𑌯𑍈𑌵 𑌮𑍇 𑌵𑌿𑌶𑌤𑍁 𑌮𑌾𑌨𑌸𑌰𑌾𑌜𑌹𑌂𑌸𑌃 ।
𑌪𑍍𑌰𑌾𑌣𑌪𑍍𑌰𑌯𑌾𑌣𑌸𑌮𑌯𑍇 𑌕𑌫𑌵𑌾𑌤𑌪𑌿𑌤𑍍𑌤𑍈𑌃
𑌕𑌂𑌠𑌾𑌵𑌰𑍋𑌧𑌨𑌵𑌿𑌧𑍌 𑌸𑍍𑌮𑌰𑌣𑌂 𑌕𑍁𑌤𑌸𑍍𑌤𑍇 ॥ ॥
𑌚𑌿𑌂𑌤𑌯𑌾𑌮𑌿 𑌹𑌰𑌿𑌮𑍇𑌵 𑌸𑌂𑌤𑌤𑌂
𑌮𑌂𑌦𑌮𑌂𑌦 𑌹𑌸𑌿𑌤𑌾𑌨𑌨𑌾𑌂𑌬𑍁𑌜𑌂
𑌨𑌂𑌦𑌗𑍋𑌪𑌤𑌨𑌯𑌂 𑌪𑌰𑌾𑌤𑍍𑌪𑌰𑌂
𑌨𑌾𑌰𑌦𑌾𑌦𑌿𑌮𑍁𑌨𑌿𑌬𑍃𑌂𑌦𑌵𑌂𑌦𑌿𑌤𑌮𑍍 ॥ ॥
𑌕𑌰𑌚𑌰𑌣𑌸𑌰𑍋𑌜𑍇 𑌕𑌾𑌂𑌤𑌿𑌮𑌨𑍍𑌨𑍇𑌤𑍍𑌰𑌮𑍀𑌨𑍇
𑌶𑍍𑌰𑌮𑌮𑍁𑌷𑌿 𑌭𑍁𑌜𑌵𑍀𑌚𑌿𑌵𑍍𑌯𑌾𑌕𑍁𑌲𑍇𑌽𑌗𑌾𑌧𑌮𑌾𑌰𑍍𑌗𑍇 ।
𑌹𑌰𑌿𑌸𑌰𑌸𑌿 𑌵𑌿𑌗𑌾𑌹𑍍𑌯𑌾𑌪𑍀𑌯 𑌤𑍇𑌜𑍋𑌜𑌲𑍌𑌘𑌂
𑌭𑌵𑌮𑌰𑍁𑌪𑌰𑌿𑌖𑌿𑌨𑍍𑌨𑌃 𑌖𑍇𑌦𑌮𑌦𑍍𑌯 𑌤𑍍𑌯𑌜𑌾𑌮𑌿 ॥ ॥
𑌸𑌰𑌸𑌿𑌜𑌨𑌯𑌨𑍇 𑌸𑌶𑌂𑌖𑌚𑌕𑍍𑌰𑍇
𑌮𑍁𑌰𑌭𑌿𑌦𑌿 𑌮𑌾 𑌵𑌿𑌰𑌮 𑌸𑍍𑌵𑌚𑌿𑌤𑍍𑌤 𑌰𑌂𑌤𑍁𑌮𑍍 ।
𑌸𑍁𑌖𑌤𑌰𑌮𑌪𑌰𑌂 𑌨 𑌜𑌾𑌤𑍁 𑌜𑌾𑌨𑍇
𑌹𑌰𑌿𑌚𑌰𑌣𑌸𑍍𑌮𑌰𑌣𑌾𑌮𑍃𑌤𑍇𑌨 𑌤𑍁𑌲𑍍𑌯𑌮𑍍 ॥ 10 ॥
𑌮𑌾 𑌭𑍀𑌰𑍍𑌮𑌂𑌦𑌮𑌨𑍋 𑌵𑌿𑌚𑌿𑌂𑌤𑍍𑌯 𑌬𑌹𑍁𑌧𑌾 𑌯𑌾𑌮𑍀𑌶𑍍𑌚𑌿𑌰𑌂 𑌯𑌾𑌤𑌨𑌾𑌃
𑌨𑌾𑌮𑍀 𑌨𑌃 𑌪𑍍𑌰𑌭𑌵𑌂𑌤𑌿 𑌪𑌾𑌪𑌰𑌿𑌪𑌵𑌃 𑌸𑍍𑌵𑌾𑌮𑍀 𑌨𑌨𑍁 𑌶𑍍𑌰𑍀𑌧𑌰𑌃 ।
𑌆𑌲𑌸𑍍𑌯𑌂 𑌵𑍍𑌯𑌪𑌨𑍀𑌯 𑌭𑌕𑍍𑌤𑌿𑌸𑍁𑌲𑌭𑌂 𑌧𑍍𑌯𑌾𑌯𑌸𑍍𑌵 𑌨𑌾𑌰𑌾𑌯𑌣𑌂
𑌲𑍋𑌕𑌸𑍍𑌯 𑌵𑍍𑌯𑌸𑌨𑌾𑌪𑌨𑍋𑌦𑌨𑌕𑌰𑍋 𑌦𑌾𑌸𑌸𑍍𑌯 𑌕𑌿𑌂 𑌨 𑌕𑍍𑌷𑌮𑌃 ॥ 11 ॥
𑌭𑌵𑌜𑌲𑌧𑌿𑌗𑌤𑌾𑌨𑌾𑌂 𑌦𑍍𑌵𑌂𑌦𑍍𑌵𑌵𑌾𑌤𑌾𑌹𑌤𑌾𑌨𑌾𑌂
𑌸𑍁𑌤𑌦𑍁𑌹𑌿𑌤𑍃𑌕𑌳𑌤𑍍𑌰𑌤𑍍𑌰𑌾𑌣𑌭𑌾𑌰𑌾𑌰𑍍𑌦𑌿𑌤𑌾𑌨𑌾𑌮𑍍 ।
𑌵𑌿𑌷𑌮𑌵𑌿𑌷𑌯𑌤𑍋𑌯𑍇 𑌮𑌜𑍍𑌜𑌤𑌾𑌮𑌪𑍍𑌲𑌵𑌾𑌨𑌾𑌂
𑌭𑌵𑌤𑍁 𑌶𑌰𑌣𑌮𑍇𑌕𑍋 𑌵𑌿𑌷𑍍𑌣𑍁𑌪𑍋𑌤𑍋 𑌨𑌰𑌾𑌣𑌾𑌮𑍍 ॥ 12 ॥
𑌭𑌵𑌜𑌲𑌧𑌿𑌮𑌗𑌾𑌧𑌂 𑌦𑍁𑌸𑍍𑌤𑌰𑌂 𑌨𑌿𑌸𑍍𑌤𑌰𑍇𑌯𑌂
𑌕𑌥𑌮𑌹𑌮𑌿𑌤𑌿 𑌚𑍇𑌤𑍋 𑌮𑌾 𑌸𑍍𑌮 𑌗𑌾𑌃 𑌕𑌾𑌤𑌰𑌤𑍍𑌵𑌮𑍍 ।
𑌸𑌰𑌸𑌿𑌜𑌦𑍃𑌶𑌿 𑌦𑍇𑌵𑍇 𑌤𑌾𑌵𑌕𑍀 𑌭𑌕𑍍𑌤𑌿𑌰𑍇𑌕𑌾
𑌨𑌰𑌕𑌭𑌿𑌦𑌿 𑌨𑌿𑌷𑌣𑍍𑌣𑌾 𑌤𑌾𑌰𑌯𑌿𑌷𑍍𑌯𑌤𑍍𑌯𑌵𑌶𑍍𑌯𑌮𑍍 ॥ 13 ॥
𑌤𑍃𑌷𑍍𑌣𑌾𑌤𑍋𑌯𑍇 𑌮𑌦𑌨𑌪𑌵𑌨𑍋𑌦𑍍𑌧𑍂𑌤 𑌮𑍋𑌹𑍋𑌰𑍍𑌮𑌿𑌮𑌾𑌲𑍇
𑌦𑌾𑌰𑌾𑌵𑌰𑍍𑌤𑍇 𑌤𑌨𑌯𑌸𑌹𑌜𑌗𑍍𑌰𑌾𑌹𑌸𑌂𑌘𑌾𑌕𑍁𑌲𑍇 𑌚 ।
𑌸𑌂𑌸𑌾𑌰𑌾𑌖𑍍𑌯𑍇 𑌮𑌹𑌤𑌿 𑌜𑌲𑌧𑍌 𑌮𑌜𑍍𑌜𑌤𑌾𑌂 𑌨𑌸𑍍𑌤𑍍𑌰𑌿𑌧𑌾𑌮𑌨𑍍
𑌪𑌾𑌦𑌾𑌂𑌭𑍋𑌜𑍇 𑌵𑌰𑌦 𑌭𑌵𑌤𑍋 𑌭𑌕𑍍𑌤𑌿𑌨𑌾𑌵𑌂 𑌪𑍍𑌰𑌯𑌚𑍍𑌛 ॥ 14 ॥
𑌮𑌾𑌦𑍍𑌰𑌾𑌕𑍍𑌷𑌂 𑌕𑍍𑌷𑍀𑌣𑌪𑍁𑌣𑍍𑌯𑌾𑌨𑍍 𑌕𑍍𑌷𑌣𑌮𑌪𑌿 𑌭𑌵𑌤𑍋 𑌭𑌕𑍍𑌤𑌿𑌹𑍀𑌨𑌾𑌨𑍍𑌪𑌦𑌾𑌬𑍍𑌜𑍇
𑌮𑌾𑌶𑍍𑌰𑍌𑌷𑌂 𑌶𑍍𑌰𑌾𑌵𑍍𑌯𑌬𑌂𑌧𑌂 𑌤𑌵 𑌚𑌰𑌿𑌤𑌮𑌪𑌾𑌸𑍍𑌯𑌾𑌨𑍍𑌯𑌦𑌾𑌖𑍍𑌯𑌾𑌨𑌜𑌾𑌤𑌮𑍍 ।
𑌮𑌾𑌸𑍍𑌮𑌾𑌰𑍍𑌷𑌂 𑌮𑌾𑌧𑌵 𑌤𑍍𑌵𑌾𑌮𑌪𑌿 𑌭𑍁𑌵𑌨𑌪𑌤𑍇 𑌚𑍇𑌤𑌸𑌾𑌪𑌹𑍍𑌨𑍁𑌵𑌾𑌨𑌾-
-𑌨𑍍𑌮𑌾𑌭𑍂𑌵𑌂 𑌤𑍍𑌵𑌤𑍍𑌸𑌪𑌰𑍍𑌯𑌾𑌵𑍍𑌯𑌤𑌿𑌕𑌰𑌰𑌹𑌿𑌤𑍋 𑌜𑌨𑍍𑌮𑌜𑌨𑍍𑌮𑌾𑌂𑌤𑌰𑍇𑌽𑌪𑌿 ॥ 15 ॥
𑌜𑌿𑌹𑍍𑌵𑍇 𑌕𑍀𑌰𑍍𑌤𑌯 𑌕𑍇𑌶𑌵𑌂 𑌮𑍁𑌰𑌰𑌿𑌪𑍁𑌂 𑌚𑍇𑌤𑍋 𑌭𑌜 𑌶𑍍𑌰𑍀𑌧𑌰𑌂
𑌪𑌾𑌣𑌿𑌦𑍍𑌵𑌂𑌦𑍍𑌵 𑌸𑌮𑌰𑍍𑌚𑌯𑌾𑌚𑍍𑌯𑍁𑌤𑌕𑌥𑌾𑌃 𑌶𑍍𑌰𑍋𑌤𑍍𑌰𑌦𑍍𑌵𑌯 𑌤𑍍𑌵𑌂 𑌶𑍃𑌣𑍁 ।
𑌕𑍃𑌷𑍍𑌣𑌂 𑌲𑍋𑌕𑌯 𑌲𑍋𑌚𑌨𑌦𑍍𑌵𑌯 𑌹𑌰𑍇𑌰𑍍𑌗𑌚𑍍𑌛𑌾𑌂𑌘𑍍𑌰𑌿𑌯𑍁𑌗𑍍𑌮𑌾𑌲𑌯𑌂
𑌜𑌿𑌘𑍍𑌰 𑌘𑍍𑌰𑌾𑌣 𑌮𑍁𑌕𑍁𑌂𑌦𑌪𑌾𑌦𑌤𑍁𑌲𑌸𑍀𑌂 𑌮𑍂𑌰𑍍𑌧𑌨𑍍𑌨𑌮𑌾𑌧𑍋𑌕𑍍𑌷𑌜𑌮𑍍 ॥ 16 ॥
𑌹𑍇 𑌲𑍋𑌕𑌾𑌃 𑌶𑍃𑌣𑍁𑌤 𑌪𑍍𑌰𑌸𑍂𑌤𑌿𑌮𑌰𑌣𑌵𑍍𑌯𑌾𑌧𑍇𑌶𑍍𑌚𑌿𑌕𑌿𑌤𑍍𑌸𑌾𑌮𑌿𑌮𑌾𑌂
𑌯𑍋𑌗𑌜𑍍𑌞𑌾𑌃 𑌸𑌮𑍁𑌦𑌾𑌹𑌰𑌂𑌤𑌿 𑌮𑍁𑌨𑌯𑍋 𑌯𑌾𑌂 𑌯𑌾𑌜𑍍𑌞𑌵𑌲𑍍𑌕𑍍𑌯𑌾𑌦𑌯𑌃 ।
𑌅𑌂𑌤𑌰𑍍𑌜𑍍𑌯𑍋𑌤𑌿𑌰𑌮𑍇𑌯𑌮𑍇𑌕𑌮𑌮𑍃𑌤𑌂 𑌕𑍃𑌷𑍍𑌣𑌾𑌖𑍍𑌯𑌮𑌾𑌪𑍀𑌯𑌤𑌾𑌂
𑌤𑌤𑍍𑌪𑍀𑌤𑌂 𑌪𑌰𑌮𑍌𑌷𑌧𑌂 𑌵𑌿𑌤𑌨𑍁𑌤𑍇 𑌨𑌿𑌰𑍍𑌵𑌾𑌣𑌮𑌾𑌤𑍍𑌯𑌂𑌤𑌿𑌕𑌮𑍍 ॥ 1 ।
𑌹𑍇 𑌮𑌰𑍍𑌤𑍍𑌯𑌾𑌃 𑌪𑌰𑌮𑌂 𑌹𑌿𑌤𑌂 𑌶𑍃𑌣𑍁𑌤 𑌵𑍋 𑌵𑌕𑍍𑌷𑍍𑌯𑌾𑌮𑌿 𑌸𑌂𑌕𑍍𑌷𑍇𑌪𑌤𑌃
𑌸𑌂𑌸𑌾𑌰𑌾𑌰𑍍𑌣𑌵𑌮𑌾𑌪𑌦𑍂𑌰𑍍𑌮𑌿𑌬𑌹𑍁𑌳𑌂 𑌸𑌮𑍍𑌯𑌕𑍍𑌪𑍍𑌰𑌵𑌿𑌶𑍍𑌯 𑌸𑍍𑌥𑌿𑌤𑌾𑌃 ।
𑌨𑌾𑌨𑌾𑌜𑍍𑌞𑌾𑌨𑌮𑌪𑌾𑌸𑍍𑌯 𑌚𑍇𑌤𑌸𑌿 𑌨𑌮𑍋 𑌨𑌾𑌰𑌾𑌯𑌣𑌾𑌯𑍇𑌤𑍍𑌯𑌮𑍁𑌂
𑌮𑌂𑌤𑍍𑌰𑌂 𑌸𑌪𑍍𑌰𑌣𑌵𑌂 𑌪𑍍𑌰𑌣𑌾𑌮𑌸𑌹𑌿𑌤𑌂 𑌪𑍍𑌰𑌾𑌵𑌰𑍍𑌤𑌯𑌧𑍍𑌵𑌂 𑌮𑍁𑌹𑍁𑌃 ॥ 1 ॥
𑌪𑍃𑌥𑍍𑌵𑍀𑌰𑍇𑌣𑍁𑌰𑌣𑍁𑌃 𑌪𑌯𑌾𑌂𑌸𑌿 𑌕𑌣𑌿𑌕𑌾𑌃 𑌫𑌲𑍍𑌗𑍁𑌃 𑌸𑍍𑌫𑍁𑌲𑌿𑌂𑌗𑍋𑌽𑌲𑌘𑍁-
-𑌸𑍍𑌤𑍇𑌜𑍋 𑌨𑌿𑌃𑌶𑍍𑌵𑌸𑌨𑌂 𑌮𑌰𑍁𑌤𑍍𑌤𑌨𑍁𑌤𑌰𑌂 𑌰𑌂𑌧𑍍𑌰𑌂 𑌸𑍁𑌸𑍂𑌕𑍍𑌷𑍍𑌮𑌂 𑌨𑌭𑌃 ।
𑌕𑍍𑌷𑍁𑌦𑍍𑌰𑌾 𑌰𑍁𑌦𑍍𑌰𑌪𑌿𑌤𑌾𑌮𑌹𑌪𑍍𑌰𑌭𑍃𑌤𑌯𑌃 𑌕𑍀𑌟𑌾𑌃 𑌸𑌮𑌸𑍍𑌤𑌾𑌃 𑌸𑍁𑌰𑌾𑌃
𑌦𑍃𑌷𑍍𑌟𑍇 𑌯𑌤𑍍𑌰 𑌸 𑌤𑌾𑌵𑌕𑍋 𑌵𑌿𑌜𑌯𑌤𑍇 𑌭𑍂𑌮𑌾𑌵𑌧𑍂𑌤𑌾𑌵𑌧𑌿𑌃 ॥ 1 ॥
𑌬𑌦𑍍𑌧𑍇𑌨𑌾𑌂𑌜𑌲𑌿𑌨𑌾 𑌨𑌤𑍇𑌨 𑌶𑌿𑌰𑌸𑌾 𑌗𑌾𑌤𑍍𑌰𑍈𑌃 𑌸𑌰𑍋𑌮𑍋𑌦𑍍𑌗𑌮𑍈𑌃
𑌕𑌂𑌠𑍇𑌨 𑌸𑍍𑌵𑌰𑌗𑌦𑍍𑌗𑌦𑍇𑌨 𑌨𑌯𑌨𑍇𑌨𑍋𑌦𑍍𑌗𑍀𑌰𑍍𑌣𑌬𑌾𑌷𑍍𑌪𑌾𑌂𑌬𑍁𑌨𑌾 ।
𑌨𑌿𑌤𑍍𑌯𑌂 𑌤𑍍𑌵𑌚𑍍𑌚𑌰𑌣𑌾𑌰𑌵𑌿𑌂𑌦𑌯𑍁𑌗𑌳 𑌧𑍍𑌯𑌾𑌨𑌾𑌮𑍃𑌤𑌾𑌸𑍍𑌵𑌾𑌦𑌿𑌨𑌾-
-𑌮𑌸𑍍𑌮𑌾𑌕𑌂 𑌸𑌰𑌸𑍀𑌰𑍁𑌹𑌾𑌕𑍍𑌷 𑌸𑌤𑌤𑌂 𑌸𑌂𑌪𑌦𑍍𑌯𑌤𑌾𑌂 𑌜𑍀𑌵𑌿𑌤𑌮𑍍 ॥ 20 ॥
𑌹𑍇 𑌗𑍋𑌪𑌾𑌲𑌕 𑌹𑍇 𑌕𑍃𑌪𑌾𑌜𑌲𑌨𑌿𑌧𑍇 𑌹𑍇 𑌸𑌿𑌂𑌧𑍁𑌕𑌨𑍍𑌯𑌾𑌪𑌤𑍇
𑌹𑍇 𑌕𑌂𑌸𑌾𑌂𑌤𑌕 𑌹𑍇 𑌗𑌜𑍇𑌂𑌦𑍍𑌰𑌕𑌰𑍁𑌣𑌾𑌪𑌾𑌰𑍀𑌣 𑌹𑍇 𑌮𑌾𑌧𑌵 ।
𑌹𑍇 𑌰𑌾𑌮𑌾𑌨𑍁𑌜 𑌹𑍇 𑌜𑌗𑌤𑍍𑌤𑍍𑌰𑌯𑌗𑍁𑌰𑍋 𑌹𑍇 𑌪𑍁𑌂𑌡𑌰𑍀𑌕𑌾𑌕𑍍𑌷 𑌮𑌾𑌂
𑌹𑍇 𑌗𑍋𑌪𑍀𑌜𑌨𑌨𑌾𑌥 𑌪𑌾𑌲𑌯 𑌪𑌰𑌂 𑌜𑌾𑌨𑌾𑌮𑌿 𑌨 𑌤𑍍𑌵𑌾𑌂 𑌵𑌿𑌨𑌾 ॥ 21 ॥
𑌭𑌕𑍍𑌤𑌾𑌪𑌾𑌯𑌭𑍁𑌜𑌂𑌗𑌗𑌾𑌰𑍁𑌡𑌮𑌣𑌿𑌸𑍍𑌤𑍍𑌰𑍈𑌲𑍋𑌕𑍍𑌯𑌰𑌕𑍍𑌷𑌾𑌮𑌣𑌿𑌃
𑌗𑍋𑌪𑍀𑌲𑍋𑌚𑌨𑌚𑌾𑌤𑌕𑌾𑌂𑌬𑍁𑌦𑌮𑌣𑌿𑌃 𑌸𑍌𑌂𑌦𑌰𑍍𑌯𑌮𑍁𑌦𑍍𑌰𑌾𑌮𑌣𑌿𑌃 ।
𑌯𑌃 𑌕𑌾𑌂𑌤𑌾𑌮𑌣𑌿 𑌰𑍁𑌕𑍍𑌮𑌿𑌣𑍀 𑌘𑌨𑌕𑍁𑌚𑌦𑍍𑌵𑌂𑌦𑍍𑌵𑍈𑌕𑌭𑍂𑌷𑌾𑌮𑌣𑌿𑌃
𑌶𑍍𑌰𑍇𑌯𑍋 𑌦𑍇𑌵𑌶𑌿𑌖𑌾𑌮𑌣𑌿𑌰𑍍𑌦𑌿𑌶𑌤𑍁 𑌨𑍋 𑌗𑍋𑌪𑌾𑌲𑌚𑍂𑌡𑌾𑌮𑌣𑌿𑌃 ॥ 22 ॥
𑌶𑌤𑍍𑌰𑍁𑌚𑍍𑌛𑍇𑌦𑍈𑌕𑌮𑌂𑌤𑍍𑌰𑌂 𑌸𑌕𑌲𑌮𑍁𑌪𑌨𑌿𑌷𑌦𑍍𑌵𑌾𑌕𑍍𑌯𑌸𑌂𑌪𑍂𑌜𑍍𑌯𑌮𑌂𑌤𑍍𑌰𑌂
𑌸𑌂𑌸𑌾𑌰𑍋𑌤𑍍𑌤𑌾𑌰𑌮𑌂𑌤𑍍𑌰𑌂 𑌸𑌮𑍁𑌪𑌚𑌿𑌤𑌤𑌮𑌃 𑌸𑌂𑌘𑌨𑌿𑌰𑍍𑌯𑌾𑌣𑌮𑌂𑌤𑍍𑌰𑌮𑍍 ।
𑌸𑌰𑍍𑌵𑍈𑌶𑍍𑌵𑌰𑍍𑌯𑍈𑌕𑌮𑌂𑌤𑍍𑌰𑌂 𑌵𑍍𑌯𑌸𑌨𑌭𑍁𑌜𑌗𑌸𑌂𑌦𑌷𑍍𑌟𑌸𑌂𑌤𑍍𑌰𑌾𑌣𑌮𑌂𑌤𑍍𑌰𑌂
𑌜𑌿𑌹𑍍𑌵𑍇 𑌶𑍍𑌰𑍀𑌕𑍃𑌷𑍍𑌣𑌮𑌂𑌤𑍍𑌰𑌂 𑌜𑌪 𑌜𑌪 𑌸𑌤𑌤𑌂 𑌜𑌨𑍍𑌮𑌸𑌾𑌫𑌲𑍍𑌯𑌮𑌂𑌤𑍍𑌰𑌮𑍍 ॥ 23 ॥
𑌵𑍍𑌯𑌾𑌮𑍋𑌹 𑌪𑍍𑌰𑌶𑌮𑍌𑌷𑌧𑌂 𑌮𑍁𑌨𑌿𑌮𑌨𑍋𑌵𑍃𑌤𑍍𑌤𑌿 𑌪𑍍𑌰𑌵𑍃𑌤𑍍𑌤𑍍𑌯𑍌𑌷𑌧𑌂
𑌦𑍈𑌤𑍍𑌯𑍇𑌂𑌦𑍍𑌰𑌾𑌰𑍍𑌤𑌿𑌕𑌰𑍌𑌷𑌧𑌂 𑌤𑍍𑌰𑌿𑌭𑍁𑌵𑌨𑍀 𑌸𑌂𑌜𑍀𑌵𑌨𑍈𑌕𑍌𑌷𑌧𑌮𑍍 ।
𑌭𑌕𑍍𑌤𑌾𑌤𑍍𑌯𑌂𑌤𑌹𑌿𑌤𑍌𑌷𑌧𑌂 𑌭𑌵𑌭𑌯𑌪𑍍𑌰𑌧𑍍𑌵𑌂𑌸𑌨𑍈𑌕𑍌𑌷𑌧𑌂
𑌶𑍍𑌰𑍇𑌯𑌃𑌪𑍍𑌰𑌾𑌪𑍍𑌤𑌿𑌕𑌰𑍌𑌷𑌧𑌂 𑌪𑌿𑌬 𑌮𑌨𑌃 𑌶𑍍𑌰𑍀𑌕𑍃𑌷𑍍𑌣𑌦𑌿𑌵𑍍𑌯𑍌𑌷𑌧𑌮𑍍 ॥ 24 ॥
𑌆𑌮𑍍𑌨𑌾𑌯𑌾𑌭𑍍𑌯𑌸𑌨𑌾𑌨𑍍𑌯𑌰𑌣𑍍𑌯𑌰𑍁𑌦𑌿𑌤𑌂 𑌵𑍇𑌦𑌵𑍍𑌰𑌤𑌾𑌨𑍍𑌯𑌨𑍍𑌵𑌹𑌂
𑌮𑍇𑌦𑌶𑍍𑌛𑍇𑌦𑌫𑌲𑌾𑌨𑌿 𑌪𑍂𑌰𑍍𑌤𑌵𑌿𑌧𑌯𑌃 𑌸𑌰𑍍𑌵𑍇 𑌹𑍁𑌤𑌂 𑌭𑌸𑍍𑌮𑌨𑌿 ।
𑌤𑍀𑌰𑍍𑌥𑌾𑌨𑌾𑌮𑌵𑌗𑌾𑌹𑌨𑌾𑌨𑌿 𑌚 𑌗𑌜𑌸𑍍𑌨𑌾𑌨𑌂 𑌵𑌿𑌨𑌾 𑌯𑌤𑍍𑌪𑌦-
-𑌦𑍍𑌵𑌂𑌦𑍍𑌵𑌾𑌂𑌭𑍋𑌰𑍁𑌹𑌸𑌂𑌸𑍍𑌮𑍃𑌤𑌿𑌰𑍍𑌵𑌿𑌜𑌯𑌤𑍇 𑌦𑍇𑌵𑌃 𑌸 𑌨𑌾𑌰𑌾𑌯𑌣𑌃 ॥ 25 ॥
𑌶𑍍𑌰𑍀𑌮𑌨𑍍𑌨𑌾𑌮 𑌪𑍍𑌰𑍋𑌚𑍍𑌯 𑌨𑌾𑌰𑌾𑌯𑌣𑌾𑌖𑍍𑌯𑌂
𑌕𑍇 𑌨 𑌪𑍍𑌰𑌾𑌪𑍁𑌰𑍍𑌵𑌾𑌂𑌛𑌿𑌤𑌂 𑌪𑌾𑌪𑌿𑌨𑍋𑌽𑌪𑌿 ।
𑌹𑌾 𑌨𑌃 𑌪𑍂𑌰𑍍𑌵𑌂 𑌵𑌾𑌕𑍍𑌪𑍍𑌰𑌵𑍃𑌤𑍍𑌤𑌾 𑌨 𑌤𑌸𑍍𑌮𑌿𑌨𑍍
𑌤𑍇𑌨 𑌪𑍍𑌰𑌾𑌪𑍍𑌤𑌂 𑌗𑌰𑍍𑌭𑌵𑌾𑌸𑌾𑌦𑌿𑌦𑍁𑌃𑌖𑌮𑍍 ॥ 26 ॥
𑌮𑌜𑍍𑌜𑌨𑍍𑌮𑌨𑌃 𑌫𑌲𑌮𑌿𑌦𑌂 𑌮𑌧𑍁𑌕𑍈𑌟𑌭𑌾𑌰𑍇
𑌮𑌤𑍍𑌪𑍍𑌰𑌾𑌰𑍍𑌥𑌨𑍀𑌯 𑌮𑌦𑌨𑍁𑌗𑍍𑌰𑌹 𑌏𑌷 𑌏𑌵 ।
𑌤𑍍𑌵𑌦𑍍𑌭𑍃𑌤𑍍𑌯𑌭𑍃𑌤𑍍𑌯 𑌪𑌰𑌿𑌚𑌾𑌰𑌕 𑌭𑍃𑌤𑍍𑌯𑌭𑍃𑌤𑍍𑌯
𑌭𑍃𑌤𑍍𑌯𑌸𑍍𑌯 𑌭𑍃𑌤𑍍𑌯 𑌇𑌤𑌿 𑌮𑌾𑌂 𑌸𑍍𑌮𑌰 𑌲𑍋𑌕𑌨𑌾𑌥 ॥ 2 ॥
𑌨𑌾𑌥𑍇 𑌨𑌃 𑌪𑍁𑌰𑍁𑌷𑍋𑌤𑍍𑌤𑌮𑍇 𑌤𑍍𑌰𑌿𑌜𑌗𑌤𑌾𑌮𑍇𑌕𑌾𑌧𑌿𑌪𑍇 𑌚𑍇𑌤𑌸𑌾
𑌸𑍇𑌵𑍍𑌯𑍇 𑌸𑍍𑌵𑌸𑍍𑌯 𑌪𑌦𑌸𑍍𑌯 𑌦𑌾𑌤𑌰𑌿 𑌸𑍁𑌰𑍇 𑌨𑌾𑌰𑌾𑌯𑌣𑍇 𑌤𑌿𑌷𑍍𑌠𑌤𑌿 ।
𑌯𑌂 𑌕𑌂𑌚𑌿𑌤𑍍𑌪𑍁𑌰𑍁𑌷𑌾𑌧𑌮𑌂 𑌕𑌤𑌿𑌪𑌯𑌗𑍍𑌰𑌾𑌮𑍇𑌶𑌮𑌲𑍍𑌪𑌾𑌰𑍍𑌥𑌦𑌂
𑌸𑍇𑌵𑌾𑌯𑍈 𑌮𑍃𑌗𑌯𑌾𑌮𑌹𑍇 𑌨𑌰𑌮𑌹𑍋 𑌮𑍂𑌕𑌾 𑌵𑌰𑌾𑌕𑌾 𑌵𑌯𑌮𑍍 ॥ 2 ॥
𑌮𑌦𑌨 𑌪𑌰𑌿𑌹𑌰 𑌸𑍍𑌥𑌿𑌤𑌿𑌂 𑌮𑌦𑍀𑌯𑍇
𑌮𑌨𑌸𑌿 𑌮𑍁𑌕𑍁𑌂𑌦𑌪𑌦𑌾𑌰𑌵𑌿𑌂𑌦𑌧𑌾𑌮𑍍𑌨𑌿 ।
𑌹𑌰𑌨𑌯𑌨𑌕𑍃𑌶𑌾𑌨𑍁𑌨𑌾 𑌕𑍃𑌶𑍋𑌽𑌸𑌿
𑌸𑍍𑌮𑌰𑌸𑌿 𑌨 𑌚𑌕𑍍𑌰𑌪𑌰𑌾𑌕𑍍𑌰𑌮𑌂 𑌮𑍁𑌰𑌾𑌰𑍇𑌃 ॥ 2 ॥
𑌤𑌤𑍍𑌤𑍍𑌵𑌂 𑌬𑍍𑌰𑍁𑌵𑌾𑌣𑌾𑌨𑌿 𑌪𑌰𑌂 𑌪𑌰𑌸𑍍𑌮𑌾-
-𑌨𑍍𑌮𑌧𑍁 𑌕𑍍𑌷𑌰𑌂𑌤𑍀𑌵 𑌸𑌤𑌾𑌂 𑌫𑌲𑌾𑌨𑌿 ।
𑌪𑍍𑌰𑌾𑌵𑌰𑍍𑌤𑌯 𑌪𑍍𑌰𑌾𑌂𑌜𑌲𑌿𑌰𑌸𑍍𑌮𑌿 𑌜𑌿𑌹𑍍𑌵𑍇
𑌨𑌾𑌮𑌾𑌨𑌿 𑌨𑌾𑌰𑌾𑌯𑌣 𑌗𑍋𑌚𑌰𑌾𑌣𑌿 ॥ 30 ॥
𑌇𑌦𑌂 𑌶𑌰𑍀𑌰𑌂 𑌪𑌰𑌿𑌣𑌾𑌮𑌪𑍇𑌶𑌲𑌂
𑌪𑌤𑌤𑍍𑌯𑌵𑌶𑍍𑌯𑌂 𑌶𑍍𑌲𑌥𑌸𑌂𑌧𑌿𑌜𑌰𑍍𑌜𑌰𑌮𑍍 ।
𑌕𑌿𑌮𑍌𑌷𑌧𑍈𑌃 𑌕𑍍𑌲𑌿𑌶𑍍𑌯𑌸𑌿 𑌮𑍂𑌢 𑌦𑍁𑌰𑍍𑌮𑌤𑍇
𑌨𑌿𑌰𑌾𑌮𑌯𑌂 𑌕𑍃𑌷𑍍𑌣𑌰𑌸𑌾𑌯𑌨𑌂 𑌪𑌿𑌬 ॥ 31 ॥
𑌦𑌾𑌰𑌾 𑌵𑌾𑌰𑌾𑌕𑌰𑌵𑌰𑌸𑍁𑌤𑌾 𑌤𑍇 𑌤𑌨𑍂𑌜𑍋 𑌵𑌿𑌰𑌿𑌂𑌚𑌿𑌃
𑌸𑍍𑌤𑍋𑌤𑌾 𑌵𑍇𑌦𑌸𑍍𑌤𑌵 𑌸𑍁𑌰𑌗𑌣𑍋 𑌭𑍃𑌤𑍍𑌯𑌵𑌰𑍍𑌗𑌃 𑌪𑍍𑌰𑌸𑌾𑌦𑌃 ।
𑌮𑍁𑌕𑍍𑌤𑌿𑌰𑍍𑌮𑌾𑌯𑌾 𑌜𑌗𑌦𑌵𑌿𑌕𑌲𑌂 𑌤𑌾𑌵𑌕𑍀 𑌦𑍇𑌵𑌕𑍀 𑌤𑍇
𑌮𑌾𑌤𑌾 𑌮𑌿𑌤𑍍𑌰𑌂 𑌬𑌲𑌰𑌿𑌪𑍁𑌸𑍁𑌤𑌸𑍍𑌤𑍍𑌵𑌯𑍍𑌯𑌤𑍋𑌽𑌨𑍍𑌯𑌨𑍍𑌨 𑌜𑌾𑌨𑍇 ॥ 32 ॥
𑌕𑍃𑌷𑍍𑌣𑍋 𑌰𑌕𑍍𑌷𑌤𑍁 𑌨𑍋 𑌜𑌗𑌤𑍍𑌤𑍍𑌰𑌯𑌗𑍁𑌰𑍁𑌃 𑌕𑍃𑌷𑍍𑌣𑌂 𑌨𑌮𑌸𑍍𑌯𑌾𑌮𑍍𑌯𑌹𑌂
𑌕𑍃𑌷𑍍𑌣𑍇𑌨𑌾𑌮𑌰𑌶𑌤𑍍𑌰𑌵𑍋 𑌵𑌿𑌨𑌿𑌹𑌤𑌾𑌃 𑌕𑍃𑌷𑍍𑌣𑌾𑌯 𑌤𑌸𑍍𑌮𑍈 𑌨𑌮𑌃 ।
𑌕𑍃𑌷𑍍𑌣𑌾𑌦𑍇𑌵 𑌸𑌮𑍁𑌤𑍍𑌥𑌿𑌤𑌂 𑌜𑌗𑌦𑌿𑌦𑌂 𑌕𑍃𑌷𑍍𑌣𑌸𑍍𑌯 𑌦𑌾𑌸𑍋𑌽𑌸𑍍𑌮𑍍𑌯𑌹𑌂
𑌕𑍃𑌷𑍍𑌣𑍇 𑌤𑌿𑌷𑍍𑌠𑌤𑌿 𑌸𑌰𑍍𑌵𑌮𑍇𑌤𑌦𑌖𑌿𑌲𑌂 𑌹𑍇 𑌕𑍃𑌷𑍍𑌣 𑌰𑌕𑍍𑌷𑌸𑍍𑌵 𑌮𑌾𑌮𑍍 ॥ 33 ॥
𑌤𑌤𑍍𑌤𑍍𑌵𑌂 𑌪𑍍𑌰𑌸𑍀𑌦 𑌭𑌗𑌵𑌨𑍍 𑌕𑍁𑌰𑍁 𑌮𑌯𑍍𑌯𑌨𑌾𑌥𑍇
𑌵𑌿𑌷𑍍𑌣𑍋 𑌕𑍃𑌪𑌾𑌂 𑌪𑌰𑌮𑌕𑌾𑌰𑍁𑌣𑌿𑌕𑌃 𑌕𑌿𑌲 𑌤𑍍𑌵𑌮𑍍 ।
𑌸𑌂𑌸𑌾𑌰𑌸𑌾𑌗𑌰𑌨𑌿𑌮𑌗𑍍𑌨𑌮𑌨𑌂𑌤𑌦𑍀𑌨-
-𑌮𑍁𑌦𑍍𑌧𑌰𑍍𑌤𑍁𑌮𑌰𑍍𑌹𑌸𑌿 𑌹𑌰𑍇 𑌪𑍁𑌰𑍁𑌷𑍋𑌤𑍍𑌤𑌮𑍋𑌽𑌸𑌿 ॥ 34 ॥
𑌨𑌮𑌾𑌮𑌿 𑌨𑌾𑌰𑌾𑌯𑌣𑌪𑌾𑌦𑌪𑌂𑌕𑌜𑌂
𑌕𑌰𑍋𑌮𑌿 𑌨𑌾𑌰𑌾𑌯𑌣𑌪𑍂𑌜𑌨𑌂 𑌸𑌦𑌾 ।
𑌵𑌦𑌾𑌮𑌿 𑌨𑌾𑌰𑌾𑌯𑌣𑌨𑌾𑌮 𑌨𑌿𑌰𑍍𑌮𑌲𑌂
𑌸𑍍𑌮𑌰𑌾𑌮𑌿 𑌨𑌾𑌰𑌾𑌯𑌣𑌤𑌤𑍍𑌤𑍍𑌵𑌮𑌵𑍍𑌯𑌯𑌮𑍍 ॥ 35 ॥
𑌶𑍍𑌰𑍀𑌨𑌾𑌥 𑌨𑌾𑌰𑌾𑌯𑌣 𑌵𑌾𑌸𑍁𑌦𑍇𑌵
𑌶𑍍𑌰𑍀𑌕𑍃𑌷𑍍𑌣 𑌭𑌕𑍍𑌤𑌪𑍍𑌰𑌿𑌯 𑌚𑌕𑍍𑌰𑌪𑌾𑌣𑍇 ।
𑌶𑍍𑌰𑍀𑌪𑌦𑍍𑌮𑌨𑌾𑌭𑌾𑌚𑍍𑌯𑍁𑌤 𑌕𑍈𑌟𑌭𑌾𑌰𑍇
𑌶𑍍𑌰𑍀𑌰𑌾𑌮 𑌪𑌦𑍍𑌮𑌾𑌕𑍍𑌷 𑌹𑌰𑍇 𑌮𑍁𑌰𑌾𑌰𑍇 ॥ 36 ॥
𑌅𑌨𑌂𑌤 𑌵𑍈𑌕𑍁𑌂𑌠 𑌮𑍁𑌕𑍁𑌂𑌦 𑌕𑍃𑌷𑍍𑌣
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ।
𑌵𑌕𑍍𑌤𑍁𑌂 𑌸𑌮𑌰𑍍𑌥𑍋𑌽𑌪𑌿 𑌨 𑌵𑌕𑍍𑌤𑌿 𑌕𑌶𑍍𑌚𑌿-
-𑌦𑌹𑍋 𑌜𑌨𑌾𑌨𑌾𑌂 𑌵𑍍𑌯𑌸𑌨𑌾𑌭𑌿𑌮𑍁𑌖𑍍𑌯𑌮𑍍 ॥ 3 ॥
𑌧𑍍𑌯𑌾𑌯𑌂𑌤𑌿 𑌯𑍇 𑌵𑌿𑌷𑍍𑌣𑍁𑌮𑌨𑌂𑌤𑌮𑌵𑍍𑌯𑌯𑌂
𑌹𑍃𑌤𑍍𑌪𑌦𑍍𑌮𑌮𑌧𑍍𑌯𑍇 𑌸𑌤𑌤𑌂 𑌵𑍍𑌯𑌵𑌸𑍍𑌥𑌿𑌤𑌮𑍍 ।
𑌸𑌮𑌾𑌹𑌿𑌤𑌾𑌨𑌾𑌂 𑌸𑌤𑌤𑌾𑌭𑌯𑌪𑍍𑌰𑌦𑌂
𑌤𑍇 𑌯𑌾𑌂𑌤𑌿 𑌸𑌿𑌦𑍍𑌧𑌿𑌂 𑌪𑌰𑌮𑌾𑌂 𑌚 𑌵𑍈𑌷𑍍𑌣𑌵𑍀𑌮𑍍 ॥ 3 ॥
𑌕𑍍𑌷𑍀𑌰𑌸𑌾𑌗𑌰𑌤𑌰𑌂𑌗𑌶𑍀𑌕𑌰𑌾-
-𑌽𑌽𑌸𑌾𑌰𑌤𑌾𑌰𑌕𑌿𑌤𑌚𑌾𑌰𑍁𑌮𑍂𑌰𑍍𑌤𑌯𑍇 ।
𑌭𑍋𑌗𑌿𑌭𑍋𑌗𑌶𑌯𑌨𑍀𑌯𑌶𑌾𑌯𑌿𑌨𑍇
𑌮𑌾𑌧𑌵𑌾𑌯 𑌮𑌧𑍁𑌵𑌿𑌦𑍍𑌵𑌿𑌷𑍇 𑌨𑌮𑌃 ॥ 3 ॥
𑌯𑌸𑍍𑌯 𑌪𑍍𑌰𑌿𑌯𑍌 𑌶𑍍𑌰𑍁𑌤𑌿𑌧𑌰𑍌 𑌕𑌵𑌿𑌲𑍋𑌕𑌵𑍀𑌰𑍌
𑌮𑌿𑌤𑍍𑌰𑍇 𑌦𑍍𑌵𑌿𑌜𑌨𑍍𑌮𑌵𑌰𑌪𑌦𑍍𑌮𑌶𑌰𑌾𑌵𑌭𑍂𑌤𑌾𑌮𑍍 ।
𑌤𑍇𑌨𑌾𑌂𑌬𑍁𑌜𑌾𑌕𑍍𑌷𑌚𑌰𑌣𑌾𑌂𑌬𑍁𑌜𑌷𑌟𑍍𑌪𑌦𑍇𑌨
𑌰𑌾𑌜𑍍𑌞𑌾 𑌕𑍃𑌤𑌾 𑌕𑍃𑌤𑌿𑌰𑌿𑌯𑌂 𑌕𑍁𑌲𑌶𑍇𑌖𑌰𑍇𑌣 ॥ 40 ॥
𑌇𑌤𑌿 𑌕𑍁𑌲𑌶𑍇𑌖𑌰 𑌪𑍍𑌰𑌣𑍀𑌤𑌂 𑌮𑍁𑌕𑍁𑌂𑌦𑌮𑌾𑌲𑌾 ।
