Narayaniyam Dashaka 100 - Grantha

𑌅𑌗𑍍𑌰𑍇 𑌪𑌶𑍍𑌯𑌾𑌮𑌿 𑌤𑍇𑌜𑍋 𑌨𑌿𑌬𑌿𑌡𑌤𑌰𑌕𑌲𑌾𑌯𑌾𑌵𑌲𑍀𑌲𑍋𑌭𑌨𑍀𑌯𑌂
𑌪𑍀𑌯𑍂𑌷𑌾𑌪𑍍𑌲𑌾𑌵𑌿𑌤𑍋𑌽𑌹𑌂 𑌤𑌦𑌨𑍁 𑌤𑌦𑍁𑌦𑌰𑍇 𑌦𑌿𑌵𑍍𑌯𑌕𑍈𑌶𑍋𑌰𑌵𑍇𑌷𑌮𑍍 ।
𑌤𑌾𑌰𑍁𑌣𑍍𑌯𑌾𑌰𑌂𑌭𑌰𑌮𑍍𑌯𑌂 𑌪𑌰𑌮𑌸𑍁𑌖𑌰𑌸𑌾𑌸𑍍𑌵𑌾𑌦𑌰𑍋𑌮𑌾𑌂𑌚𑌿𑌤𑌾𑌂𑌗𑍈-
𑌰𑌾𑌵𑍀𑌤𑌂 𑌨𑌾𑌰𑌦𑌾𑌦𑍍𑌯𑍈𑌰𑍍𑌵𑌿𑌲𑌸𑌦𑍁𑌪𑌨𑌿𑌷𑌤𑍍𑌸𑍁𑌂𑌦𑌰𑍀𑌮𑌂𑌡𑌲𑍈𑌶𑍍𑌚 ॥1॥

𑌨𑍀𑌲𑌾𑌭𑌂 𑌕𑍁𑌂𑌚𑌿𑌤𑌾𑌗𑍍𑌰𑌂 𑌘𑌨𑌮𑌮𑌲𑌤𑌰𑌂 𑌸𑌂𑌯𑌤𑌂 𑌚𑌾𑌰𑍁𑌭𑌂𑌗𑍍𑌯𑌾
𑌰𑌤𑍍𑌨𑍋𑌤𑍍𑌤𑌂𑌸𑌾𑌭𑌿𑌰𑌾𑌮𑌂 𑌵𑌲𑌯𑌿𑌤𑌮𑍁𑌦𑌯𑌚𑍍𑌚𑌂𑌦𑍍𑌰𑌕𑍈𑌃 𑌪𑌿𑌂𑌛𑌜𑌾𑌲𑍈𑌃 ।
𑌮𑌂𑌦𑌾𑌰𑌸𑍍𑌰𑌙𑍍𑌨𑌿𑌵𑍀𑌤𑌂 𑌤𑌵 𑌪𑍃𑌥𑍁𑌕𑌬𑌰𑍀𑌭𑌾𑌰𑌮𑌾𑌲𑍋𑌕𑌯𑍇𑌽𑌹𑌂
𑌸𑍍𑌨𑌿𑌗𑍍𑌧𑌶𑍍𑌵𑍇𑌤𑍋𑌰𑍍𑌧𑍍𑌵𑌪𑍁𑌂𑌡𑍍𑌰𑌾𑌮𑌪𑌿 𑌚 𑌸𑍁𑌲𑌲𑌿𑌤𑌾𑌂 𑌫𑌾𑌲𑌬𑌾𑌲𑍇𑌂𑌦𑍁𑌵𑍀𑌥𑍀𑌮𑍍 ॥2

𑌹𑍃𑌦𑍍𑌯𑌂 𑌪𑍂𑌰𑍍𑌣𑌾𑌨𑍁𑌕𑌂𑌪𑌾𑌰𑍍𑌣𑌵𑌮𑍃𑌦𑍁𑌲𑌹𑌰𑍀𑌚𑌂𑌚𑌲𑌭𑍍𑌰𑍂𑌵𑌿𑌲𑌾𑌸𑍈-
𑌰𑌾𑌨𑍀𑌲𑌸𑍍𑌨𑌿𑌗𑍍𑌧𑌪𑌕𑍍𑌷𑍍𑌮𑌾𑌵𑌲𑌿𑌪𑌰𑌿𑌲𑌸𑌿𑌤𑌂 𑌨𑍇𑌤𑍍𑌰𑌯𑍁𑌗𑍍𑌮𑌂 𑌵𑌿𑌭𑍋 𑌤𑍇 ।
𑌸𑌾𑌂𑌦𑍍𑌰𑌚𑍍𑌛𑌾𑌯𑌂 𑌵𑌿𑌶𑌾𑌲𑌾𑌰𑍁𑌣𑌕𑌮𑌲𑌦𑌲𑌾𑌕𑌾𑌰𑌮𑌾𑌮𑍁𑌗𑍍𑌧𑌤𑌾𑌰𑌂
𑌕𑌾𑌰𑍁𑌣𑍍𑌯𑌾𑌲𑍋𑌕𑌲𑍀𑌲𑌾𑌶𑌿𑌶𑌿𑌰𑌿𑌤𑌭𑍁𑌵𑌨𑌂 𑌕𑍍𑌷𑌿𑌪𑍍𑌯𑌤𑌾𑌂 𑌮𑌯𑍍𑌯𑌨𑌾𑌥𑍇 ॥3॥

𑌉𑌤𑍍𑌤𑍁𑌂𑌗𑍋𑌲𑍍𑌲𑌾𑌸𑌿𑌨𑌾𑌸𑌂 𑌹𑌰𑌿𑌮𑌣𑌿𑌮𑍁𑌕𑍁𑌰𑌪𑍍𑌰𑍋𑌲𑍍𑌲𑌸𑌦𑍍𑌗𑌂𑌡𑌪𑌾𑌲𑍀-
𑌵𑍍𑌯𑌾𑌲𑍋𑌲𑌤𑍍𑌕𑌰𑍍𑌣𑌪𑌾𑌶𑌾𑌂𑌚𑌿𑌤𑌮𑌕𑌰𑌮𑌣𑍀𑌕𑍁𑌂𑌡𑌲𑌦𑍍𑌵𑌂𑌦𑍍𑌵𑌦𑍀𑌪𑍍𑌰𑌮𑍍 ।
𑌉𑌨𑍍𑌮𑍀𑌲𑌦𑍍𑌦𑌂𑌤𑌪𑌂𑌕𑍍𑌤𑌿𑌸𑍍𑌫𑍁𑌰𑌦𑌰𑍁𑌣𑌤𑌰𑌚𑍍𑌛𑌾𑌯𑌬𑌿𑌂𑌬𑌾𑌧𑌰𑌾𑌂𑌤𑌃-
𑌪𑍍𑌰𑍀𑌤𑌿𑌪𑍍𑌰𑌸𑍍𑌯𑌂𑌦𑌿𑌮𑌂𑌦𑌸𑍍𑌮𑌿𑌤𑌮𑌧𑍁𑌰𑌤𑌰𑌂 𑌵𑌕𑍍𑌤𑍍𑌰𑌮𑍁𑌦𑍍𑌭𑌾𑌸𑌤𑌾𑌂 𑌮𑍇 ॥4॥

𑌬𑌾𑌹𑍁𑌦𑍍𑌵𑌂𑌦𑍍𑌵𑍇𑌨 𑌰𑌤𑍍𑌨𑍋𑌜𑍍𑌜𑍍𑌵𑌲𑌵𑌲𑌯𑌭𑍃𑌤𑌾 𑌶𑍋𑌣𑌪𑌾𑌣𑌿𑌪𑍍𑌰𑌵𑌾𑌲𑍇-
𑌨𑍋𑌪𑌾𑌤𑍍𑌤𑌾𑌂 𑌵𑍇𑌣𑍁𑌨𑌾𑌲𑍀 𑌪𑍍𑌰𑌸𑍃𑌤𑌨𑌖𑌮𑌯𑍂𑌖𑌾𑌂𑌗𑍁𑌲𑍀𑌸𑌂𑌗𑌶𑌾𑌰𑌾𑌮𑍍 ।
𑌕𑍃𑌤𑍍𑌵𑌾 𑌵𑌕𑍍𑌤𑍍𑌰𑌾𑌰𑌵𑌿𑌂𑌦𑍇 𑌸𑍁𑌮𑌧𑍁𑌰𑌵𑌿𑌕𑌸𑌦𑍍𑌰𑌾𑌗𑌮𑍁𑌦𑍍𑌭𑌾𑌵𑍍𑌯𑌮𑌾𑌨𑍈𑌃
𑌶𑌬𑍍𑌦𑌬𑍍𑌰𑌹𑍍𑌮𑌾𑌮𑍃𑌤𑍈𑌸𑍍𑌤𑍍𑌵𑌂 𑌶𑌿𑌶𑌿𑌰𑌿𑌤𑌭𑍁𑌵𑌨𑍈𑌃 𑌸𑌿𑌂𑌚 𑌮𑍇 𑌕𑌰𑍍𑌣𑌵𑍀𑌥𑍀𑌮𑍍 ॥5॥

𑌉𑌤𑍍𑌸𑌰𑍍𑌪𑌤𑍍𑌕𑍌𑌸𑍍𑌤𑍁𑌭𑌶𑍍𑌰𑍀𑌤𑌤𑌿𑌭𑌿𑌰𑌰𑍁𑌣𑌿𑌤𑌂 𑌕𑍋𑌮𑌲𑌂 𑌕𑌂𑌠𑌦𑍇𑌶𑌂
𑌵𑌕𑍍𑌷𑌃 𑌶𑍍𑌰𑍀𑌵𑌤𑍍𑌸𑌰𑌮𑍍𑌯𑌂 𑌤𑌰𑌲𑌤𑌰𑌸𑌮𑍁𑌦𑍍𑌦𑍀𑌪𑍍𑌰𑌹𑌾𑌰𑌪𑍍𑌰𑌤𑌾𑌨𑌮𑍍 ।
𑌨𑌾𑌨𑌾𑌵𑌰𑍍𑌣𑌪𑍍𑌰𑌸𑍂𑌨𑌾𑌵𑌲𑌿𑌕𑌿𑌸𑌲𑌯𑌿𑌨𑍀𑌂 𑌵𑌨𑍍𑌯𑌮𑌾𑌲𑌾𑌂 𑌵𑌿𑌲𑍋𑌲-
𑌲𑍍𑌲𑍋𑌲𑌂𑌬𑌾𑌂 𑌲𑌂𑌬𑌮𑌾𑌨𑌾𑌮𑍁𑌰𑌸𑌿 𑌤𑌵 𑌤𑌥𑌾 𑌭𑌾𑌵𑌯𑍇 𑌰𑌤𑍍𑌨𑌮𑌾𑌲𑌾𑌮𑍍 ॥6॥

𑌅𑌂𑌗𑍇 𑌪𑌂𑌚𑌾𑌂𑌗𑌰𑌾𑌗𑍈𑌰𑌤𑌿𑌶𑌯𑌵𑌿𑌕𑌸𑌤𑍍𑌸𑍌𑌰𑌭𑌾𑌕𑍃𑌷𑍍𑌟𑌲𑍋𑌕𑌂
𑌲𑍀𑌨𑌾𑌨𑍇𑌕𑌤𑍍𑌰𑌿𑌲𑍋𑌕𑍀𑌵𑌿𑌤𑌤𑌿𑌮𑌪𑌿 𑌕𑍃𑌶𑌾𑌂 𑌬𑌿𑌭𑍍𑌰𑌤𑌂 𑌮𑌧𑍍𑌯𑌵𑌲𑍍𑌲𑍀𑌮𑍍 ।
𑌶𑌕𑍍𑌰𑌾𑌶𑍍𑌮𑌨𑍍𑌯𑌸𑍍𑌤𑌤𑌪𑍍𑌤𑍋𑌜𑍍𑌜𑍍𑌵𑌲𑌕𑌨𑌕𑌨𑌿𑌭𑌂 𑌪𑍀𑌤𑌚𑍇𑌲𑌂 𑌦𑌧𑌾𑌨𑌂
𑌧𑍍𑌯𑌾𑌯𑌾𑌮𑍋 𑌦𑍀𑌪𑍍𑌤𑌰𑌶𑍍𑌮𑌿𑌸𑍍𑌫𑍁𑌟𑌮𑌣𑌿𑌰𑌶𑌨𑌾𑌕𑌿𑌂𑌕𑌿𑌣𑍀𑌮𑌂𑌡𑌿𑌤𑌂 𑌤𑍍𑌵𑌾𑌮𑍍 ॥𑍭॥

𑌊𑌰𑍂 𑌚𑌾𑌰𑍂 𑌤𑌵𑍋𑌰𑍂 𑌘𑌨𑌮𑌸𑍃𑌣𑌰𑍁𑌚𑍌 𑌚𑌿𑌤𑍍𑌤𑌚𑍋𑌰𑍌 𑌰𑌮𑌾𑌯𑌾𑌃
𑌵𑌿𑌶𑍍𑌵𑌕𑍍𑌷𑍋𑌭𑌂 𑌵𑌿𑌶𑌂𑌕𑍍𑌯 𑌧𑍍𑌰𑍁𑌵𑌮𑌨𑌿𑌶𑌮𑍁𑌭𑍌 𑌪𑍀𑌤𑌚𑍇𑌲𑌾𑌵𑍃𑌤𑌾𑌂𑌗𑍌 ।
𑌆𑌨𑌮𑍍𑌰𑌾𑌣𑌾𑌂 𑌪𑍁𑌰𑌸𑍍𑌤𑌾𑌨𑍍𑌨𑍍𑌯𑌸𑌨𑌧𑍃𑌤𑌸𑌮𑌸𑍍𑌤𑌾𑌰𑍍𑌥𑌪𑌾𑌲𑍀𑌸𑌮𑍁𑌦𑍍𑌗-
𑌚𑍍𑌛𑌾𑌯𑌂 𑌜𑌾𑌨𑍁𑌦𑍍𑌵𑌯𑌂 𑌚 𑌕𑍍𑌰𑌮𑌪𑍃𑌥𑍁𑌲𑌮𑌨𑍋𑌜𑍍𑌞𑍇 𑌚 𑌜𑌂𑌘𑍇 𑌨𑌿𑌷𑍇𑌵𑍇 ॥𑍮॥

𑌮𑌂𑌜𑍀𑌰𑌂 𑌮𑌂𑌜𑍁𑌨𑌾𑌦𑍈𑌰𑌿𑌵 𑌪𑌦𑌭𑌜𑌨𑌂 𑌶𑍍𑌰𑍇𑌯 𑌇𑌤𑍍𑌯𑌾𑌲𑌪𑌂𑌤𑌂
𑌪𑌾𑌦𑌾𑌗𑍍𑌰𑌂 𑌭𑍍𑌰𑌾𑌂𑌤𑌿𑌮𑌜𑍍𑌜𑌤𑍍𑌪𑍍𑌰𑌣𑌤𑌜𑌨𑌮𑌨𑍋𑌮𑌂𑌦𑌰𑍋𑌦𑍍𑌧𑌾𑌰𑌕𑍂𑌰𑍍𑌮𑌮𑍍 ।
𑌉𑌤𑍍𑌤𑍁𑌂𑌗𑌾𑌤𑌾𑌮𑍍𑌰𑌰𑌾𑌜𑌨𑍍𑌨𑌖𑌰𑌹𑌿𑌮𑌕𑌰𑌜𑍍𑌯𑍋𑌤𑍍𑌸𑍍𑌨𑌯𑌾 𑌚𑌾𑌽𑌶𑍍𑌰𑌿𑌤𑌾𑌨𑌾𑌂
𑌸𑌂𑌤𑌾𑌪𑌧𑍍𑌵𑌾𑌂𑌤𑌹𑌂𑌤𑍍𑌰𑍀𑌂 𑌤𑌤𑌿𑌮𑌨𑍁𑌕𑌲𑌯𑍇 𑌮𑌂𑌗𑌲𑌾𑌮𑌂𑌗𑍁𑌲𑍀𑌨𑌾𑌮𑍍 ॥𑍯॥

𑌯𑍋𑌗𑍀𑌂𑌦𑍍𑌰𑌾𑌣𑌾𑌂 𑌤𑍍𑌵𑌦𑌂𑌗𑍇𑌷𑍍𑌵𑌧𑌿𑌕𑌸𑍁𑌮𑌧𑍁𑌰𑌂 𑌮𑍁𑌕𑍍𑌤𑌿𑌭𑌾𑌜𑌾𑌂 𑌨𑌿𑌵𑌾𑌸𑍋
𑌭𑌕𑍍𑌤𑌾𑌨𑌾𑌂 𑌕𑌾𑌮𑌵𑌰𑍍𑌷𑌦𑍍𑌯𑍁𑌤𑌰𑍁𑌕𑌿𑌸𑌲𑌯𑌂 𑌨𑌾𑌥 𑌤𑍇 𑌪𑌾𑌦𑌮𑍂𑌲𑌮𑍍 ।
𑌨𑌿𑌤𑍍𑌯𑌂 𑌚𑌿𑌤𑍍𑌤𑌸𑍍𑌥𑌿𑌤𑌂 𑌮𑍇 𑌪𑌵𑌨𑌪𑍁𑌰𑌪𑌤𑍇 𑌕𑍃𑌷𑍍𑌣 𑌕𑌾𑌰𑍁𑌣𑍍𑌯𑌸𑌿𑌂𑌧𑍋
𑌹𑍃𑌤𑍍𑌵𑌾 𑌨𑌿𑌶𑍍𑌶𑍇𑌷𑌤𑌾𑌪𑌾𑌨𑍍 𑌪𑍍𑌰𑌦𑌿𑌶𑌤𑍁 𑌪𑌰𑌮𑌾𑌨𑌂𑌦𑌸𑌂𑌦𑍋𑌹𑌲𑌕𑍍𑌷𑍍𑌮𑍀𑌮𑍍 ॥10॥

𑌅𑌜𑍍𑌞𑌾𑌤𑍍𑌵𑌾 𑌤𑍇 𑌮𑌹𑌤𑍍𑌵𑌂 𑌯𑌦𑌿𑌹 𑌨𑌿𑌗𑌦𑌿𑌤𑌂 𑌵𑌿𑌶𑍍𑌵𑌨𑌾𑌥 𑌕𑍍𑌷𑌮𑍇𑌥𑌾𑌃
𑌸𑍍𑌤𑍋𑌤𑍍𑌰𑌂 𑌚𑍈𑌤𑌤𑍍𑌸𑌹𑌸𑍍𑌰𑍋𑌤𑍍𑌤𑌰𑌮𑌧𑌿𑌕𑌤𑌰𑌂 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌯 𑌭𑍂𑌯𑌾𑌤𑍍 ।
𑌦𑍍𑌵𑍇𑌧𑌾 𑌨𑌾𑌰𑌾𑌯𑌣𑍀𑌯𑌂 𑌶𑍍𑌰𑍁𑌤𑌿𑌷𑍁 𑌚 𑌜𑌨𑍁𑌷𑌾 𑌸𑍍𑌤𑍁𑌤𑍍𑌯𑌤𑌾𑌵𑌰𑍍𑌣𑌨𑍇𑌨
𑌸𑍍𑌫𑍀𑌤𑌂 𑌲𑍀𑌲𑌾𑌵𑌤𑌾𑌰𑍈𑌰𑌿𑌦𑌮𑌿𑌹 𑌕𑍁𑌰𑍁𑌤𑌾𑌮𑌾𑌯𑍁𑌰𑌾𑌰𑍋𑌗𑍍𑌯𑌸𑍌𑌖𑍍𑌯𑌮𑍍 ॥11॥

Browse Related Categories: