Narayaniyam Dashaka 96 - Grantha

𑌤𑍍𑌵𑌂 𑌹𑌿 𑌬𑍍𑌰𑌹𑍍𑌮𑍈𑌵 𑌸𑌾𑌕𑍍𑌷𑌾𑌤𑍍 𑌪𑌰𑌮𑍁𑌰𑍁𑌮𑌹𑌿𑌮𑌨𑍍𑌨𑌕𑍍𑌷𑌰𑌾𑌣𑌾𑌮𑌕𑌾𑌰-
𑌸𑍍𑌤𑌾𑌰𑍋 𑌮𑌂𑌤𑍍𑌰𑍇𑌷𑍁 𑌰𑌾𑌜𑍍𑌞𑌾𑌂 𑌮𑌨𑍁𑌰𑌸𑌿 𑌮𑍁𑌨𑌿𑌷𑍁 𑌤𑍍𑌵𑌂 𑌭𑍃𑌗𑍁𑌰𑍍𑌨𑌾𑌰𑌦𑍋𑌽𑌪𑌿 ।
𑌪𑍍𑌰𑌹𑍍𑌲𑌾𑌦𑍋 𑌦𑌾𑌨𑌵𑌾𑌨𑌾𑌂 𑌪𑌶𑍁𑌷𑍁 𑌚 𑌸𑍁𑌰𑌭𑌿𑌃 𑌪𑌕𑍍𑌷𑌿𑌣𑌾𑌂 𑌵𑍈𑌨𑌤𑍇𑌯𑍋
𑌨𑌾𑌗𑌾𑌨𑌾𑌮𑌸𑍍𑌯𑌨𑌂𑌤𑌸𑍍𑌸𑍁𑌰𑌸𑌰𑌿𑌦𑌪𑌿 𑌚 𑌸𑍍𑌰𑍋𑌤𑌸𑌾𑌂 𑌵𑌿𑌶𑍍𑌵𑌮𑍂𑌰𑍍𑌤𑍇 ॥1॥

𑌬𑍍𑌰𑌹𑍍𑌮𑌣𑍍𑌯𑌾𑌨𑌾𑌂 𑌬𑌲𑌿𑌸𑍍𑌤𑍍𑌵𑌂 𑌕𑍍𑌰𑌤𑍁𑌷𑍁 𑌚 𑌜𑌪𑌯𑌜𑍍𑌞𑍋𑌽𑌸𑌿 𑌵𑍀𑌰𑍇𑌷𑍁 𑌪𑌾𑌰𑍍𑌥𑍋
𑌭𑌕𑍍𑌤𑌾𑌨𑌾𑌮𑍁𑌦𑍍𑌧𑌵𑌸𑍍𑌤𑍍𑌵𑌂 𑌬𑌲𑌮𑌸𑌿 𑌬𑌲𑌿𑌨𑌾𑌂 𑌧𑌾𑌮 𑌤𑍇𑌜𑌸𑍍𑌵𑌿𑌨𑌾𑌂 𑌤𑍍𑌵𑌮𑍍 ।
𑌨𑌾𑌸𑍍𑌤𑍍𑌯𑌂𑌤𑌸𑍍𑌤𑍍𑌵𑌦𑍍𑌵𑌿𑌭𑍂𑌤𑍇𑌰𑍍𑌵𑌿𑌕𑌸𑌦𑌤𑌿𑌶𑌯𑌂 𑌵𑌸𑍍𑌤𑍁 𑌸𑌰𑍍𑌵𑌂 𑌤𑍍𑌵𑌮𑍇𑌵
𑌤𑍍𑌵𑌂 𑌜𑍀𑌵𑌸𑍍𑌤𑍍𑌵𑌂 𑌪𑍍𑌰𑌧𑌾𑌨𑌂 𑌯𑌦𑌿𑌹 𑌭𑌵𑌦𑍃𑌤𑍇 𑌤𑌨𑍍𑌨 𑌕𑌿𑌂𑌚𑌿𑌤𑍍 𑌪𑍍𑌰𑌪𑌂𑌚𑍇 ॥2॥

𑌧𑌰𑍍𑌮𑌂 𑌵𑌰𑍍𑌣𑌾𑌶𑍍𑌰𑌮𑌾𑌣𑌾𑌂 𑌶𑍍𑌰𑍁𑌤𑌿𑌪𑌥𑌵𑌿𑌹𑌿𑌤𑌂 𑌤𑍍𑌵𑌤𑍍𑌪𑌰𑌤𑍍𑌵𑍇𑌨 𑌭𑌕𑍍𑌤𑍍𑌯𑌾
𑌕𑍁𑌰𑍍𑌵𑌂𑌤𑍋𑌽𑌂𑌤𑌰𑍍𑌵𑌿𑌰𑌾𑌗𑍇 𑌵𑌿𑌕𑌸𑌤𑌿 𑌶𑌨𑌕𑍈𑌃 𑌸𑌂𑌤𑍍𑌯𑌜𑌂𑌤𑍋 𑌲𑌭𑌂𑌤𑍇 ।
𑌸𑌤𑍍𑌤𑌾𑌸𑍍𑌫𑍂𑌰𑍍𑌤𑌿𑌪𑍍𑌰𑌿𑌯𑌤𑍍𑌵𑌾𑌤𑍍𑌮𑌕𑌮𑌖𑌿𑌲𑌪𑌦𑌾𑌰𑍍𑌥𑍇𑌷𑍁 𑌭𑌿𑌨𑍍𑌨𑍇𑌷𑍍𑌵𑌭𑌿𑌨𑍍𑌨𑌂
𑌨𑌿𑌰𑍍𑌮𑍂𑌲𑌂 𑌵𑌿𑌶𑍍𑌵𑌮𑍂𑌲𑌂 𑌪𑌰𑌮𑌮𑌹𑌮𑌿𑌤𑌿 𑌤𑍍𑌵𑌦𑍍𑌵𑌿𑌬𑍋𑌧𑌂 𑌵𑌿𑌶𑍁𑌦𑍍𑌧𑌮𑍍 ॥3॥

𑌜𑍍𑌞𑌾𑌨𑌂 𑌕𑌰𑍍𑌮𑌾𑌪𑌿 𑌭𑌕𑍍𑌤𑌿𑌸𑍍𑌤𑍍𑌰𑌿𑌤𑌯𑌮𑌿𑌹 𑌭𑌵𑌤𑍍𑌪𑍍𑌰𑌾𑌪𑌕𑌂 𑌤𑌤𑍍𑌰 𑌤𑌾𑌵-
𑌨𑍍𑌨𑌿𑌰𑍍𑌵𑌿𑌣𑍍𑌣𑌾𑌨𑌾𑌮𑌶𑍇𑌷𑍇 𑌵𑌿𑌷𑌯 𑌇𑌹 𑌭𑌵𑍇𑌤𑍍 𑌜𑍍𑌞𑌾𑌨𑌯𑍋𑌗𑍇𑌽𑌧𑌿𑌕𑌾𑌰𑌃 ।
𑌸𑌕𑍍𑌤𑌾𑌨𑌾𑌂 𑌕𑌰𑍍𑌮𑌯𑍋𑌗𑌸𑍍𑌤𑍍𑌵𑌯𑌿 𑌹𑌿 𑌵𑌿𑌨𑌿𑌹𑌿𑌤𑍋 𑌯𑍇 𑌤𑍁 𑌨𑌾𑌤𑍍𑌯𑌂𑌤𑌸𑌕𑍍𑌤𑌾𑌃
𑌨𑌾𑌪𑍍𑌯𑌤𑍍𑌯𑌂𑌤𑌂 𑌵𑌿𑌰𑌕𑍍𑌤𑌾𑌸𑍍𑌤𑍍𑌵𑌯𑌿 𑌚 𑌧𑍃𑌤𑌰𑌸𑌾 𑌭𑌕𑍍𑌤𑌿𑌯𑍋𑌗𑍋 𑌹𑍍𑌯𑌮𑍀𑌷𑌾𑌮𑍍 ॥4॥

𑌜𑍍𑌞𑌾𑌨𑌂 𑌤𑍍𑌵𑌦𑍍𑌭𑌕𑍍𑌤𑌤𑌾𑌂 𑌵𑌾 𑌲𑌘𑍁 𑌸𑍁𑌕𑍃𑌤𑌵𑌶𑌾𑌨𑍍𑌮𑌰𑍍𑌤𑍍𑌯𑌲𑍋𑌕𑍇 𑌲𑌭𑌂𑌤𑍇
𑌤𑌸𑍍𑌮𑌾𑌤𑍍𑌤𑌤𑍍𑌰𑍈𑌵 𑌜𑌨𑍍𑌮 𑌸𑍍𑌪𑍃𑌹𑌯𑌤𑌿 𑌭𑌗𑌵𑌨𑍍 𑌨𑌾𑌕𑌗𑍋 𑌨𑌾𑌰𑌕𑍋 𑌵𑌾 ।
𑌆𑌵𑌿𑌷𑍍𑌟𑌂 𑌮𑌾𑌂 𑌤𑍁 𑌦𑍈𑌵𑌾𑌦𑍍𑌭𑌵𑌜𑌲𑌨𑌿𑌧𑌿𑌪𑍋𑌤𑌾𑌯𑌿𑌤𑍇 𑌮𑌰𑍍𑌤𑍍𑌯𑌦𑍇𑌹𑍇
𑌤𑍍𑌵𑌂 𑌕𑍃𑌤𑍍𑌵𑌾 𑌕𑌰𑍍𑌣𑌧𑌾𑌰𑌂 𑌗𑍁𑌰𑍁𑌮𑌨𑍁𑌗𑍁𑌣𑌵𑌾𑌤𑌾𑌯𑌿𑌤𑌸𑍍𑌤𑌾𑌰𑌯𑍇𑌥𑌾𑌃 ॥5॥

𑌅𑌵𑍍𑌯𑌕𑍍𑌤𑌂 𑌮𑌾𑌰𑍍𑌗𑌯𑌂𑌤𑌃 𑌶𑍍𑌰𑍁𑌤𑌿𑌭𑌿𑌰𑌪𑌿 𑌨𑌯𑍈𑌃 𑌕𑍇𑌵𑌲𑌜𑍍𑌞𑌾𑌨𑌲𑍁𑌬𑍍𑌧𑌾𑌃
𑌕𑍍𑌲𑌿𑌶𑍍𑌯𑌂𑌤𑍇𑌽𑌤𑍀𑌵 𑌸𑌿𑌦𑍍𑌧𑌿𑌂 𑌬𑌹𑍁𑌤𑌰𑌜𑌨𑍁𑌷𑌾𑌮𑌂𑌤 𑌏𑌵𑌾𑌪𑍍𑌨𑍁𑌵𑌂𑌤𑌿 ।
𑌦𑍂𑌰𑌸𑍍𑌥𑌃 𑌕𑌰𑍍𑌮𑌯𑍋𑌗𑍋𑌽𑌪𑌿 𑌚 𑌪𑌰𑌮𑌫𑌲𑍇 𑌨𑌨𑍍𑌵𑌯𑌂 𑌭𑌕𑍍𑌤𑌿𑌯𑍋𑌗-
𑌸𑍍𑌤𑍍𑌵𑌾𑌮𑍂𑌲𑌾𑌦𑍇𑌵 𑌹𑍃𑌦𑍍𑌯𑌸𑍍𑌤𑍍𑌵𑌰𑌿𑌤𑌮𑌯𑌿 𑌭𑌵𑌤𑍍𑌪𑍍𑌰𑌾𑌪𑌕𑍋 𑌵𑌰𑍍𑌧𑌤𑌾𑌂 𑌮𑍇 ॥6॥

𑌜𑍍𑌞𑌾𑌨𑌾𑌯𑍈𑌵𑌾𑌤𑌿𑌯𑌤𑍍𑌨𑌂 𑌮𑍁𑌨𑌿𑌰𑌪𑌵𑌦𑌤𑍇 𑌬𑍍𑌰𑌹𑍍𑌮𑌤𑌤𑍍𑌤𑍍𑌵𑌂 𑌤𑍁 𑌶𑍃𑌣𑍍𑌵𑌨𑍍
𑌗𑌾𑌢𑌂 𑌤𑍍𑌵𑌤𑍍𑌪𑌾𑌦𑌭𑌕𑍍𑌤𑌿𑌂 𑌶𑌰𑌣𑌮𑌯𑌤𑌿 𑌯𑌸𑍍𑌤𑌸𑍍𑌯 𑌮𑍁𑌕𑍍𑌤𑌿𑌃 𑌕𑌰𑌾𑌗𑍍𑌰𑍇 ।
𑌤𑍍𑌵𑌦𑍍𑌧𑍍𑌯𑌾𑌨𑍇𑌽𑌪𑍀𑌹 𑌤𑍁𑌲𑍍𑌯𑌾 𑌪𑍁𑌨𑌰𑌸𑍁𑌕𑌰𑌤𑌾 𑌚𑌿𑌤𑍍𑌤𑌚𑌾𑌂𑌚𑌲𑍍𑌯𑌹𑍇𑌤𑍋-
𑌰𑌭𑍍𑌯𑌾𑌸𑌾𑌦𑌾𑌶𑍁 𑌶𑌕𑍍𑌯𑌂 𑌤𑌦𑌪𑌿 𑌵𑌶𑌯𑌿𑌤𑍁𑌂 𑌤𑍍𑌵𑌤𑍍𑌕𑍃𑌪𑌾𑌚𑌾𑌰𑍁𑌤𑌾𑌭𑍍𑌯𑌾𑌮𑍍 ॥𑍭॥

𑌨𑌿𑌰𑍍𑌵𑌿𑌣𑍍𑌣𑌃 𑌕𑌰𑍍𑌮𑌮𑌾𑌰𑍍𑌗𑍇 𑌖𑌲𑍁 𑌵𑌿𑌷𑌮𑌤𑌮𑍇 𑌤𑍍𑌵𑌤𑍍𑌕𑌥𑌾𑌦𑍌 𑌚 𑌗𑌾𑌢𑌂
𑌜𑌾𑌤𑌶𑍍𑌰𑌦𑍍𑌧𑍋𑌽𑌪𑌿 𑌕𑌾𑌮𑌾𑌨𑌯𑌿 𑌭𑍁𑌵𑌨𑌪𑌤𑍇 𑌨𑍈𑌵 𑌶𑌕𑍍𑌨𑍋𑌮𑌿 𑌹𑌾𑌤𑍁𑌮𑍍 ।
𑌤𑌦𑍍𑌭𑍂𑌯𑍋 𑌨𑌿𑌶𑍍𑌚𑌯𑍇𑌨 𑌤𑍍𑌵𑌯𑌿 𑌨𑌿𑌹𑌿𑌤𑌮𑌨𑌾 𑌦𑍋𑌷𑌬𑍁𑌦𑍍𑌧𑍍𑌯𑌾 𑌭𑌜𑌂𑌸𑍍𑌤𑌾𑌨𑍍
𑌪𑍁𑌷𑍍𑌣𑍀𑌯𑌾𑌂 𑌭𑌕𑍍𑌤𑌿𑌮𑍇𑌵 𑌤𑍍𑌵𑌯𑌿 𑌹𑍃𑌦𑌯𑌗𑌤𑍇 𑌮𑌂𑌕𑍍𑌷𑍁 𑌨𑌂𑌕𑍍𑌷𑍍𑌯𑌂𑌤𑌿 𑌸𑌂𑌗𑌾𑌃 ॥𑍮॥

𑌕𑌶𑍍𑌚𑌿𑌤𑍍 𑌕𑍍𑌲𑍇𑌶𑌾𑌰𑍍𑌜𑌿𑌤𑌾𑌰𑍍𑌥𑌕𑍍𑌷𑌯𑌵𑌿𑌮𑌲𑌮𑌤𑌿𑌰𑍍𑌨𑍁𑌦𑍍𑌯𑌮𑌾𑌨𑍋 𑌜𑌨𑍌𑌘𑍈𑌃
𑌪𑍍𑌰𑌾𑌗𑍇𑌵𑌂 𑌪𑍍𑌰𑌾𑌹 𑌵𑌿𑌪𑍍𑌰𑍋 𑌨 𑌖𑌲𑍁 𑌮𑌮 𑌜𑌨𑌃 𑌕𑌾𑌲𑌕𑌰𑍍𑌮𑌗𑍍𑌰𑌹𑌾 𑌵𑌾।
𑌚𑍇𑌤𑍋 𑌮𑍇 𑌦𑍁𑌃𑌖𑌹𑍇𑌤𑍁𑌸𑍍𑌤𑌦𑌿𑌹 𑌗𑍁𑌣𑌗𑌣𑌂 𑌭𑌾𑌵𑌯𑌤𑍍𑌸𑌰𑍍𑌵𑌕𑌾𑌰𑍀-
𑌤𑍍𑌯𑍁𑌕𑍍𑌤𑍍𑌵𑌾 𑌶𑌾𑌂𑌤𑍋 𑌗𑌤𑌸𑍍𑌤𑍍𑌵𑌾𑌂 𑌮𑌮 𑌚 𑌕𑍁𑌰𑍁 𑌵𑌿𑌭𑍋 𑌤𑌾𑌦𑍃𑌶𑍀 𑌚𑌿𑌤𑍍𑌤𑌶𑌾𑌂𑌤𑌿𑌮𑍍 ॥𑍯॥

𑌐𑌲𑌃 𑌪𑍍𑌰𑌾𑌗𑍁𑌰𑍍𑌵𑌶𑍀𑌂 𑌪𑍍𑌰𑌤𑍍𑌯𑌤𑌿𑌵𑌿𑌵𑌶𑌮𑌨𑌾𑌃 𑌸𑍇𑌵𑌮𑌾𑌨𑌶𑍍𑌚𑌿𑌰𑌂 𑌤𑌾𑌂
𑌗𑌾𑌢𑌂 𑌨𑌿𑌰𑍍𑌵𑌿𑌦𑍍𑌯 𑌭𑍂𑌯𑍋 𑌯𑍁𑌵𑌤𑌿𑌸𑍁𑌖𑌮𑌿𑌦𑌂 𑌕𑍍𑌷𑍁𑌦𑍍𑌰𑌮𑍇𑌵𑍇𑌤𑌿 𑌗𑌾𑌯𑌨𑍍 ।
𑌤𑍍𑌵𑌦𑍍𑌭𑌕𑍍𑌤𑌿𑌂 𑌪𑍍𑌰𑌾𑌪𑍍𑌯 𑌪𑍂𑌰𑍍𑌣𑌃 𑌸𑍁𑌖𑌤𑌰𑌮𑌚𑌰𑌤𑍍𑌤𑌦𑍍𑌵𑌦𑍁𑌦𑍍𑌧𑍂𑌤𑌸𑌂𑌗𑌂
𑌭𑌕𑍍𑌤𑍋𑌤𑍍𑌤𑌂𑌸𑌂 𑌕𑍍𑌰𑌿𑌯𑌾 𑌮𑌾𑌂 𑌪𑌵𑌨𑌪𑍁𑌰𑌪𑌤𑍇 𑌹𑌂𑌤 𑌮𑍇 𑌰𑍁𑌂𑌧𑌿 𑌰𑍋𑌗𑌾𑌨𑍍 ॥10॥

Browse Related Categories: