Narayaniyam Dashaka 3 - Grantha

𑌪𑌠𑌂𑌤𑍋 𑌨𑌾𑌮𑌾𑌨𑌿 𑌪𑍍𑌰𑌮𑌦𑌭𑌰𑌸𑌿𑌂𑌧𑍌 𑌨𑌿𑌪𑌤𑌿𑌤𑌾𑌃
𑌸𑍍𑌮𑌰𑌂𑌤𑍋 𑌰𑍂𑌪𑌂 𑌤𑍇 𑌵𑌰𑌦 𑌕𑌥𑌯𑌂𑌤𑍋 𑌗𑍁𑌣𑌕𑌥𑌾𑌃 ।
𑌚𑌰𑌂𑌤𑍋 𑌯𑍇 𑌭𑌕𑍍𑌤𑌾𑌸𑍍𑌤𑍍𑌵𑌯𑌿 𑌖𑌲𑍁 𑌰𑌮𑌂𑌤𑍇 𑌪𑌰𑌮𑌮𑍂-
𑌨𑌹𑌂 𑌧𑌨𑍍𑌯𑌾𑌨𑍍 𑌮𑌨𑍍𑌯𑍇 𑌸𑌮𑌧𑌿𑌗𑌤𑌸𑌰𑍍𑌵𑌾𑌭𑌿𑌲𑌷𑌿𑌤𑌾𑌨𑍍 ॥1॥

𑌗𑌦𑌕𑍍𑌲𑌿𑌷𑍍𑌟𑌂 𑌕𑌷𑍍𑌟𑌂 𑌤𑌵 𑌚𑌰𑌣𑌸𑍇𑌵𑌾𑌰𑌸𑌭𑌰𑍇𑌽-
𑌪𑍍𑌯𑌨𑌾𑌸𑌕𑍍𑌤𑌂 𑌚𑌿𑌤𑍍𑌤𑌂 𑌭𑌵𑌤𑌿 𑌬𑌤 𑌵𑌿𑌷𑍍𑌣𑍋 𑌕𑍁𑌰𑍁 𑌦𑌯𑌾𑌮𑍍 ।
𑌭𑌵𑌤𑍍𑌪𑌾𑌦𑌾𑌂𑌭𑍋𑌜𑌸𑍍𑌮𑌰𑌣𑌰𑌸𑌿𑌕𑍋 𑌨𑌾𑌮𑌨𑌿𑌵𑌹𑌾-
𑌨𑌹𑌂 𑌗𑌾𑌯𑌂 𑌗𑌾𑌯𑌂 𑌕𑍁𑌹𑌚𑌨 𑌵𑌿𑌵𑌤𑍍𑌸𑍍𑌯𑌾𑌮𑌿 𑌵𑌿𑌜𑌨𑍇 ॥2॥

𑌕𑍃𑌪𑌾 𑌤𑍇 𑌜𑌾𑌤𑌾 𑌚𑍇𑌤𑍍𑌕𑌿𑌮𑌿𑌵 𑌨 𑌹𑌿 𑌲𑌭𑍍𑌯𑌂 𑌤𑌨𑍁𑌭𑍃𑌤𑌾𑌂
𑌮𑌦𑍀𑌯𑌕𑍍𑌲𑍇𑌶𑍌𑌘𑌪𑍍𑌰𑌶𑌮𑌨𑌦𑌶𑌾 𑌨𑌾𑌮 𑌕𑌿𑌯𑌤𑍀 ।
𑌨 𑌕𑍇 𑌕𑍇 𑌲𑍋𑌕𑍇𑌽𑌸𑍍𑌮𑌿𑌨𑍍𑌨𑌨𑌿𑌶𑌮𑌯𑌿 𑌶𑍋𑌕𑌾𑌭𑌿𑌰𑌹𑌿𑌤𑌾
𑌭𑌵𑌦𑍍𑌭𑌕𑍍𑌤𑌾 𑌮𑍁𑌕𑍍𑌤𑌾𑌃 𑌸𑍁𑌖𑌗𑌤𑌿𑌮𑌸𑌕𑍍𑌤𑌾 𑌵𑌿𑌦𑌧𑌤𑍇 ॥3॥

𑌮𑍁𑌨𑌿𑌪𑍍𑌰𑍌𑌢𑌾 𑌰𑍂𑌢𑌾 𑌜𑌗𑌤𑌿 𑌖𑌲𑍁 𑌗𑍂𑌢𑌾𑌤𑍍𑌮𑌗𑌤𑌯𑍋
𑌭𑌵𑌤𑍍𑌪𑌾𑌦𑌾𑌂𑌭𑍋𑌜𑌸𑍍𑌮𑌰𑌣𑌵𑌿𑌰𑍁𑌜𑍋 𑌨𑌾𑌰𑌦𑌮𑍁𑌖𑌾𑌃 ।
𑌚𑌰𑌂𑌤𑍀𑌶 𑌸𑍍𑌵𑍈𑌰𑌂 𑌸𑌤𑌤𑌪𑌰𑌿𑌨𑌿𑌰𑍍𑌭𑌾𑌤𑌪𑌰𑌚𑌿 -
𑌤𑍍𑌸𑌦𑌾𑌨𑌂𑌦𑌾𑌦𑍍𑌵𑍈𑌤𑌪𑍍𑌰𑌸𑌰𑌪𑌰𑌿𑌮𑌗𑍍𑌨𑌾𑌃 𑌕𑌿𑌮𑌪𑌰𑌮𑍍 ॥4॥

𑌭𑌵𑌦𑍍𑌭𑌕𑍍𑌤𑌿𑌃 𑌸𑍍𑌫𑍀𑌤𑌾 𑌭𑌵𑌤𑍁 𑌮𑌮 𑌸𑍈𑌵 𑌪𑍍𑌰𑌶𑌮𑌯𑍇-
𑌦𑌶𑍇𑌷𑌕𑍍𑌲𑍇𑌶𑍌𑌘𑌂 𑌨 𑌖𑌲𑍁 𑌹𑍃𑌦𑌿 𑌸𑌂𑌦𑍇𑌹𑌕𑌣𑌿𑌕𑌾 ।
𑌨 𑌚𑍇𑌦𑍍𑌵𑍍𑌯𑌾𑌸𑌸𑍍𑌯𑍋𑌕𑍍𑌤𑌿𑌸𑍍𑌤𑌵 𑌚 𑌵𑌚𑌨𑌂 𑌨𑍈𑌗𑌮𑌵𑌚𑍋
𑌭𑌵𑍇𑌨𑍍𑌮𑌿𑌥𑍍𑌯𑌾 𑌰𑌥𑍍𑌯𑌾𑌪𑍁𑌰𑍁𑌷𑌵𑌚𑌨𑌪𑍍𑌰𑌾𑌯𑌮𑌖𑌿𑌲𑌮𑍍 ॥5॥

𑌭𑌵𑌦𑍍𑌭𑌕𑍍𑌤𑌿𑌸𑍍𑌤𑌾𑌵𑌤𑍍 𑌪𑍍𑌰𑌮𑍁𑌖𑌮𑌧𑍁𑌰𑌾 𑌤𑍍𑌵𑌤𑍍 𑌗𑍁𑌣𑌰𑌸𑌾𑌤𑍍
𑌕𑌿𑌮𑌪𑍍𑌯𑌾𑌰𑍂𑌢𑌾 𑌚𑍇𑌦𑌖𑌿𑌲𑌪𑌰𑌿𑌤𑌾𑌪𑌪𑍍𑌰𑌶𑌮𑌨𑍀 ।
𑌪𑍁𑌨𑌶𑍍𑌚𑌾𑌂𑌤𑍇 𑌸𑍍𑌵𑌾𑌂𑌤𑍇 𑌵𑌿𑌮𑌲𑌪𑌰𑌿𑌬𑍋𑌧𑍋𑌦𑌯𑌮𑌿𑌲-
𑌨𑍍𑌮𑌹𑌾𑌨𑌂𑌦𑌾𑌦𑍍𑌵𑍈𑌤𑌂 𑌦𑌿𑌶𑌤𑌿 𑌕𑌿𑌮𑌤𑌃 𑌪𑍍𑌰𑌾𑌰𑍍𑌥𑍍𑌯𑌮𑌪𑌰𑌮𑍍 ॥6॥

𑌵𑌿𑌧𑍂𑌯 𑌕𑍍𑌲𑍇𑌶𑌾𑌨𑍍𑌮𑍇 𑌕𑍁𑌰𑍁 𑌚𑌰𑌣𑌯𑍁𑌗𑍍𑌮𑌂 𑌧𑍃𑌤𑌰𑌸𑌂
𑌭𑌵𑌤𑍍𑌕𑍍𑌷𑍇𑌤𑍍𑌰𑌪𑍍𑌰𑌾𑌪𑍍𑌤𑍌 𑌕𑌰𑌮𑌪𑌿 𑌚 𑌤𑍇 𑌪𑍂𑌜𑌨𑌵𑌿𑌧𑍌 ।
𑌭𑌵𑌨𑍍𑌮𑍂𑌰𑍍𑌤𑍍𑌯𑌾𑌲𑍋𑌕𑍇 𑌨𑌯𑌨𑌮𑌥 𑌤𑍇 𑌪𑌾𑌦𑌤𑍁𑌲𑌸𑍀-
𑌪𑌰𑌿𑌘𑍍𑌰𑌾𑌣𑍇 𑌘𑍍𑌰𑌾𑌣𑌂 𑌶𑍍𑌰𑌵𑌣𑌮𑌪𑌿 𑌤𑍇 𑌚𑌾𑌰𑍁𑌚𑌰𑌿𑌤𑍇 ॥𑍭॥

𑌪𑍍𑌰𑌭𑍂𑌤𑌾𑌧𑌿𑌵𑍍𑌯𑌾𑌧𑌿𑌪𑍍𑌰𑌸𑌭𑌚𑌲𑌿𑌤𑍇 𑌮𑌾𑌮𑌕𑌹𑍃𑌦𑌿
𑌤𑍍𑌵𑌦𑍀𑌯𑌂 𑌤𑌦𑍍𑌰𑍂𑌪𑌂 𑌪𑌰𑌮𑌸𑍁𑌖𑌚𑌿𑌦𑍍𑌰𑍂𑌪𑌮𑍁𑌦𑌿𑌯𑌾𑌤𑍍 ।
𑌉𑌦𑌂𑌚𑌦𑍍𑌰𑍋𑌮𑌾𑌂𑌚𑍋 𑌗𑌲𑌿𑌤𑌬𑌹𑍁𑌹𑌰𑍍𑌷𑌾𑌶𑍍𑌰𑍁𑌨𑌿𑌵𑌹𑍋
𑌯𑌥𑌾 𑌵𑌿𑌸𑍍𑌮𑌰𑍍𑌯𑌾𑌸𑌂 𑌦𑍁𑌰𑍁𑌪𑌶𑌮𑌪𑍀𑌡𑌾𑌪𑌰𑌿𑌭𑌵𑌾𑌨𑍍 ॥𑍮॥

𑌮𑌰𑍁𑌦𑍍𑌗𑍇𑌹𑌾𑌧𑍀𑌶 𑌤𑍍𑌵𑌯𑌿 𑌖𑌲𑍁 𑌪𑌰𑌾𑌂𑌚𑍋𑌽𑌪𑌿 𑌸𑍁𑌖𑌿𑌨𑍋
𑌭𑌵𑌤𑍍𑌸𑍍𑌨𑍇𑌹𑍀 𑌸𑍋𑌽𑌹𑌂 𑌸𑍁𑌬𑌹𑍁 𑌪𑌰𑌿𑌤𑌪𑍍𑌯𑍇 𑌚 𑌕𑌿𑌮𑌿𑌦𑌮𑍍 ।
𑌅𑌕𑍀𑌰𑍍𑌤𑌿𑌸𑍍𑌤𑍇 𑌮𑌾 𑌭𑍂𑌦𑍍𑌵𑌰𑌦 𑌗𑌦𑌭𑌾𑌰𑌂 𑌪𑍍𑌰𑌶𑌮𑌯𑌨𑍍
𑌭𑌵𑌤𑍍 𑌭𑌕𑍍𑌤𑍋𑌤𑍍𑌤𑌂𑌸𑌂 𑌝𑌟𑌿𑌤𑌿 𑌕𑍁𑌰𑍁 𑌮𑌾𑌂 𑌕𑌂𑌸𑌦𑌮𑌨 ॥𑍯॥

𑌕𑌿𑌮𑍁𑌕𑍍𑌤𑍈𑌰𑍍𑌭𑍂𑌯𑍋𑌭𑌿𑌸𑍍𑌤𑌵 𑌹𑌿 𑌕𑌰𑍁𑌣𑌾 𑌯𑌾𑌵𑌦𑍁𑌦𑌿𑌯𑌾-
𑌦𑌹𑌂 𑌤𑌾𑌵𑌦𑍍𑌦𑍇𑌵 𑌪𑍍𑌰𑌹𑌿𑌤𑌵𑌿𑌵𑌿𑌧𑌾𑌰𑍍𑌤𑌪𑍍𑌰𑌲𑌪𑌿𑌤𑌃 ।
𑌪𑍁𑌰𑌃 𑌕𑍍𑌲𑍃𑌪𑍍𑌤𑍇 𑌪𑌾𑌦𑍇 𑌵𑌰𑌦 𑌤𑌵 𑌨𑍇𑌷𑍍𑌯𑌾𑌮𑌿 𑌦𑌿𑌵𑌸𑌾-
𑌨𑍍𑌯𑌥𑌾𑌶𑌕𑍍𑌤𑌿 𑌵𑍍𑌯𑌕𑍍𑌤𑌂 𑌨𑌤𑌿𑌨𑍁𑌤𑌿𑌨𑌿𑌷𑍇𑌵𑌾 𑌵𑌿𑌰𑌚𑌯𑌨𑍍 ॥10॥

Browse Related Categories: