Narayaniyam Dashaka 71 - Grantha

Collection of Spiritual and Devotional Literature in Various Indian Languages

View this in:

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 𑍭1

𑌯𑌤𑍍𑌨𑍇𑌷𑍁 𑌸𑌰𑍍𑌵𑍇𑌷𑍍𑌵𑌪𑌿 𑌨𑌾𑌵𑌕𑍇𑌶𑍀 𑌕𑍇𑌶𑍀 𑌸 𑌭𑍋𑌜𑍇𑌶𑌿𑌤𑍁𑌰𑌿𑌷𑍍𑌟𑌬𑌂𑌧𑍁𑌃 ।
𑌤𑍍𑌵𑌾𑌂 𑌸𑌿𑌂𑌧𑍁𑌜𑌾𑌵𑌾𑌪𑍍𑌯 𑌇𑌤𑍀𑌵 𑌮𑌤𑍍𑌵𑌾 𑌸𑌂𑌪𑍍𑌰𑌾𑌪𑍍𑌤𑌵𑌾𑌨𑍍 𑌸𑌿𑌂𑌧𑍁𑌜𑌵𑌾𑌜𑌿𑌰𑍂𑌪𑌃 ॥1॥

𑌗𑌂𑌧𑌰𑍍𑌵𑌤𑌾𑌮𑍇𑌷 𑌗𑌤𑍋𑌽𑌪𑌿 𑌰𑍂𑌕𑍍𑌷𑍈𑌰𑍍𑌨𑌾𑌦𑍈𑌃 𑌸𑌮𑍁𑌦𑍍𑌵𑍇𑌜𑌿𑌤𑌸𑌰𑍍𑌵𑌲𑍋𑌕𑌃 ।
𑌭𑌵𑌦𑍍𑌵𑌿𑌲𑍋𑌕𑌾𑌵𑌧𑌿 𑌗𑍋𑌪𑌵𑌾𑌟𑍀𑌂 𑌪𑍍𑌰𑌮𑌰𑍍𑌦𑍍𑌯 𑌪𑌾𑌪𑌃 𑌪𑍁𑌨𑌰𑌾𑌪𑌤𑌤𑍍𑌤𑍍𑌵𑌾𑌮𑍍 ॥2॥

𑌤𑌾𑌰𑍍𑌕𑍍𑌷𑍍𑌯𑌾𑌰𑍍𑌪𑌿𑌤𑌾𑌂𑌘𑍍𑌰𑍇𑌸𑍍𑌤𑌵 𑌤𑌾𑌰𑍍𑌕𑍍𑌷𑍍𑌯 𑌏𑌷 𑌚𑌿𑌕𑍍𑌷𑍇𑌪 𑌵𑌕𑍍𑌷𑍋𑌭𑍁𑌵𑌿 𑌨𑌾𑌮 𑌪𑌾𑌦𑌮𑍍 ।
𑌭𑍃𑌗𑍋𑌃 𑌪𑌦𑌾𑌘𑌾𑌤𑌕𑌥𑌾𑌂 𑌨𑌿𑌶𑌮𑍍𑌯 𑌸𑍍𑌵𑍇𑌨𑌾𑌪𑌿 𑌶𑌕𑍍𑌯𑌂 𑌤𑌦𑌿𑌤𑍀𑌵 𑌮𑍋𑌹𑌾𑌤𑍍 ॥3॥

𑌪𑍍𑌰𑌵𑌂𑌚𑌯𑌨𑍍𑌨𑌸𑍍𑌯 𑌖𑍁𑌰𑌾𑌂𑌚𑌲𑌂 𑌦𑍍𑌰𑌾𑌗𑌮𑍁𑌂𑌚 𑌚𑌿𑌕𑍍𑌷𑍇𑌪𑌿𑌥 𑌦𑍂𑌰𑌦𑍂𑌰𑌮𑍍
𑌸𑌮𑍍𑌮𑍂𑌰𑍍𑌚𑍍𑌛𑌿𑌤𑍋𑌽𑌪𑌿 𑌹𑍍𑌯𑌤𑌿𑌮𑍂𑌰𑍍𑌚𑍍𑌛𑌿𑌤𑍇𑌨 𑌕𑍍𑌰𑍋𑌧𑍋𑌷𑍍𑌮𑌣𑌾 𑌖𑌾𑌦𑌿𑌤𑍁𑌮𑌾𑌦𑍍𑌰𑍁𑌤𑌸𑍍𑌤𑍍𑌵𑌾𑌮𑍍 ॥4॥

𑌤𑍍𑌵𑌂 𑌵𑌾𑌹𑌦𑌂𑌡𑍇 𑌕𑍃𑌤𑌧𑍀𑌶𑍍𑌚 𑌵𑌾𑌹𑌾𑌦𑌂𑌡𑌂 𑌨𑍍𑌯𑌧𑌾𑌸𑍍𑌤𑌸𑍍𑌯 𑌮𑍁𑌖𑍇 𑌤𑌦𑌾𑌨𑍀𑌮𑍍 ।
𑌤𑌦𑍍 𑌵𑍃𑌦𑍍𑌧𑌿𑌰𑍁𑌦𑍍𑌧𑌶𑍍𑌵𑌸𑌨𑍋 𑌗𑌤𑌾𑌸𑍁𑌃 𑌸𑌪𑍍𑌤𑍀𑌭𑌵𑌨𑍍𑌨𑌪𑍍𑌯𑌯𑌮𑍈𑌕𑍍𑌯𑌮𑌾𑌗𑌾𑌤𑍍 ॥5॥

𑌆𑌲𑌂𑌭𑌮𑌾𑌤𑍍𑌰𑍇𑌣 𑌪𑌶𑍋𑌃 𑌸𑍁𑌰𑌾𑌣𑌾𑌂 𑌪𑍍𑌰𑌸𑌾𑌦𑌕𑍇 𑌨𑍂𑌤𑍍𑌨 𑌇𑌵𑌾𑌶𑍍𑌵𑌮𑍇𑌧𑍇 ।
𑌕𑍃𑌤𑍇 𑌤𑍍𑌵𑌯𑌾 𑌹𑌰𑍍𑌷𑌵𑌶𑌾𑌤𑍍 𑌸𑍁𑌰𑍇𑌂𑌦𑍍𑌰𑌾𑌸𑍍𑌤𑍍𑌵𑌾𑌂 𑌤𑍁𑌷𑍍𑌟𑍁𑌵𑍁𑌃 𑌕𑍇𑌶𑌵𑌨𑌾𑌮𑌧𑍇𑌯𑌮𑍍 ॥6॥

𑌕𑌂𑌸𑌾𑌯 𑌤𑍇 𑌶𑍌𑌰𑌿𑌸𑍁𑌤𑌤𑍍𑌵𑌮𑍁𑌕𑍍𑌤𑍍𑌵𑌾 𑌤𑌂 𑌤𑌦𑍍𑌵𑌧𑍋𑌤𑍍𑌕𑌂 𑌪𑍍𑌰𑌤𑌿𑌰𑍁𑌧𑍍𑌯 𑌵𑌾𑌚𑌾।
𑌪𑍍𑌰𑌾𑌪𑍍𑌤𑍇𑌨 𑌕𑍇𑌶𑌿𑌕𑍍𑌷𑌪𑌣𑌾𑌵𑌸𑌾𑌨𑍇 𑌶𑍍𑌰𑍀𑌨𑌾𑌰𑌦𑍇𑌨 𑌤𑍍𑌵𑌮𑌭𑌿𑌷𑍍𑌟𑍁𑌤𑍋𑌽𑌭𑍂𑌃 ॥𑍭॥

𑌕𑌦𑌾𑌪𑌿 𑌗𑍋𑌪𑍈𑌃 𑌸𑌹 𑌕𑌾𑌨𑌨𑌾𑌂𑌤𑍇 𑌨𑌿𑌲𑌾𑌯𑌨𑌕𑍍𑌰𑍀𑌡𑌨𑌲𑍋𑌲𑍁𑌪𑌂 𑌤𑍍𑌵𑌾𑌮𑍍 ।
𑌮𑌯𑌾𑌤𑍍𑌮𑌜𑌃 𑌪𑍍𑌰𑌾𑌪 𑌦𑍁𑌰𑌂𑌤𑌮𑌾𑌯𑍋 𑌵𑍍𑌯𑍋𑌮𑌾𑌭𑌿𑌧𑍋 𑌵𑍍𑌯𑍋𑌮𑌚𑌰𑍋𑌪𑌰𑍋𑌧𑍀 ॥𑍮॥

𑌸 𑌚𑍋𑌰𑌪𑌾𑌲𑌾𑌯𑌿𑌤𑌵𑌲𑍍𑌲𑌵𑍇𑌷𑍁 𑌚𑍋𑌰𑌾𑌯𑌿𑌤𑍋 𑌗𑍋𑌪𑌶𑌿𑌶𑍂𑌨𑍍 𑌪𑌶𑍂𑌂𑌶𑍍𑌚
𑌗𑍁𑌹𑌾𑌸𑍁 𑌕𑍃𑌤𑍍𑌵𑌾 𑌪𑌿𑌦𑌧𑍇 𑌶𑌿𑌲𑌾𑌭𑌿𑌸𑍍𑌤𑍍𑌵𑌯𑌾 𑌚 𑌬𑍁𑌦𑍍𑌧𑍍𑌵𑌾 𑌪𑌰𑌿𑌮𑌰𑍍𑌦𑌿𑌤𑍋𑌽𑌭𑍂𑌤𑍍 ॥𑍯॥

𑌏𑌵𑌂 𑌵𑌿𑌧𑍈𑌶𑍍𑌚𑌾𑌦𑍍𑌭𑍁𑌤𑌕𑍇𑌲𑌿𑌭𑍇𑌦𑍈𑌰𑌾𑌨𑌂𑌦𑌮𑍂𑌰𑍍𑌚𑍍𑌛𑌾𑌮𑌤𑍁𑌲𑌾𑌂 𑌵𑍍𑌰𑌜𑌸𑍍𑌯 ।
𑌪𑌦𑍇 𑌪𑌦𑍇 𑌨𑍂𑌤𑌨𑌯𑌨𑍍𑌨𑌸𑍀𑌮𑌾𑌂 𑌪𑌰𑌾𑌤𑍍𑌮𑌰𑍂𑌪𑌿𑌨𑍍 𑌪𑌵𑌨𑍇𑌶 𑌪𑌾𑌯𑌾𑌃 ॥10॥

Browse Related Categories: