𑌕𑌰𑌾𑌰𑌵𑌿𑌂𑌦𑍇𑌨 𑌪𑌦𑌾𑌰𑌵𑌿𑌂𑌦𑌂
𑌮𑍁𑌖𑌾𑌰𑌵𑌿𑌂𑌦𑍇 𑌵𑌿𑌨𑌿𑌵𑍇𑌶𑌯𑌂𑌤𑌮𑍍 ।
𑌵𑌟𑌸𑍍𑌯 𑌪𑌤𑍍𑌰𑌸𑍍𑌯 𑌪𑍁𑌟𑍇 𑌶𑌯𑌾𑌨𑌂
𑌬𑌾𑌲𑌂 𑌮𑍁𑌕𑍁𑌂𑌦𑌂 𑌮𑌨𑌸𑌾 𑌸𑍍𑌮𑌰𑌾𑌮𑌿 ॥
𑌶𑍍𑌰𑍀𑌕𑍃𑌷𑍍𑌣 𑌗𑍋𑌵𑌿𑌂𑌦 𑌹𑌰𑍇 𑌮𑍁𑌰𑌾𑌰𑍇
𑌹𑍇 𑌨𑌾𑌥 𑌨𑌾𑌰𑌾𑌯𑌣 𑌵𑌾𑌸𑍁𑌦𑍇𑌵 ।
𑌜𑌿𑌹𑍍𑌵𑍇 𑌪𑌿𑌬𑌸𑍍𑌵𑌾𑌮𑍃𑌤𑌮𑍇𑌤𑌦𑍇𑌵
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 1
𑌵𑌿𑌕𑍍𑌰𑍇𑌤𑍁𑌕𑌾𑌮𑌾𑌖𑌿𑌲𑌗𑍋𑌪𑌕𑌨𑍍𑌯𑌾
𑌮𑍁𑌰𑌾𑌰𑌿𑌪𑌾𑌦𑌾𑌰𑍍𑌪𑌿𑌤𑌚𑌿𑌤𑍍𑌤𑌵𑍃𑌤𑍍𑌤𑌿𑌃 ।
𑌦𑌧𑍍𑌯𑌾𑌦𑌿𑌕𑌂 𑌮𑍋𑌹𑌵𑌶𑌾𑌦𑌵𑍋𑌚𑌤𑍍
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 2
𑌗𑍃𑌹𑍇 𑌗𑍃𑌹𑍇 𑌗𑍋𑌪𑌵𑌧𑍂𑌕𑌦𑌂𑌬𑌾𑌃
𑌸𑌰𑍍𑌵𑍇 𑌮𑌿𑌲𑌿𑌤𑍍𑌵𑌾 𑌸𑌮𑌵𑌾𑌪𑍍𑌯 𑌯𑍋𑌗𑌮𑍍 ।
𑌪𑍁𑌣𑍍𑌯𑌾𑌨𑌿 𑌨𑌾𑌮𑌾𑌨𑌿 𑌪𑌠𑌂𑌤𑌿 𑌨𑌿𑌤𑍍𑌯𑌂
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 3
𑌸𑍁𑌖𑌂 𑌶𑌯𑌾𑌨𑌾 𑌨𑌿𑌲𑌯𑍇 𑌨𑌿𑌜𑍇𑌽𑌪𑌿
𑌨𑌾𑌮𑌾𑌨𑌿 𑌵𑌿𑌷𑍍𑌣𑍋𑌃 𑌪𑍍𑌰𑌵𑌦𑌂𑌤𑌿 𑌮𑌰𑍍𑌤𑍍𑌯𑌾𑌃 ।
𑌤𑍇 𑌨𑌿𑌶𑍍𑌚𑌿𑌤𑌂 𑌤𑌨𑍍𑌮𑌯𑌤𑌾𑌂 𑌵𑍍𑌰𑌜𑌂𑌤𑌿
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 4
𑌜𑌿𑌹𑍍𑌵𑍇 𑌸𑌦𑍈𑌵𑌂 𑌭𑌜 𑌸𑍁𑌂𑌦𑌰𑌾𑌣𑌿
𑌨𑌾𑌮𑌾𑌨𑌿 𑌕𑍃𑌷𑍍𑌣𑌸𑍍𑌯 𑌮𑌨𑍋𑌹𑌰𑌾𑌣𑌿 ।
𑌸𑌮𑌸𑍍𑌤 𑌭𑌕𑍍𑌤𑌾𑌰𑍍𑌤𑌿𑌵𑌿𑌨𑌾𑌶𑌨𑌾𑌨𑌿
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 5
𑌸𑍁𑌖𑌾𑌵𑌸𑌾𑌨𑍇 𑌇𑌦𑌮𑍇𑌵 𑌸𑌾𑌰𑌂
𑌦𑍁𑌃𑌖𑌾𑌵𑌸𑌾𑌨𑍇 𑌇𑌦𑌮𑍇𑌵 𑌜𑍍𑌞𑍇𑌯𑌮𑍍 ।
𑌦𑍇𑌹𑌾𑌵𑌸𑌾𑌨𑍇 𑌇𑌦𑌮𑍇𑌵 𑌜𑌾𑌪𑍍𑌯𑌂
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥ 6
𑌜𑌿𑌹𑍍𑌵𑍇 𑌰𑌸𑌜𑍍𑌞𑍇 𑌮𑌧𑍁𑌰𑌪𑍍𑌰𑌿𑌯𑍇 𑌤𑍍𑌵𑌂
𑌸𑌤𑍍𑌯𑌂 𑌹𑌿𑌤𑌂 𑌤𑍍𑌵𑌾𑌂 𑌪𑌰𑌮𑌂 𑌵𑌦𑌾𑌮𑌿 ।
𑌅𑌵𑌰𑍍𑌣𑌯𑍇𑌥𑌾 𑌮𑌧𑍁𑌰𑌾𑌕𑍍𑌷𑌰𑌾𑌣𑌿
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥
𑌤𑍍𑌵𑌾𑌮𑍇𑌵 𑌯𑌾𑌚𑍇 𑌮𑌮 𑌦𑍇𑌹𑌿 𑌜𑌿𑌹𑍍𑌵𑍇
𑌸𑌮𑌾𑌗𑌤𑍇 𑌦𑌂𑌡𑌧𑌰𑍇 𑌕𑍃𑌤𑌾𑌂𑌤𑍇 ।
𑌵𑌕𑍍𑌤𑌵𑍍𑌯𑌮𑍇𑌵𑌂 𑌮𑌧𑍁𑌰𑌂 𑌸𑍁𑌭𑌕𑍍𑌤𑍍𑌯𑌾
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥
𑌶𑍍𑌰𑍀𑌕𑍃𑌷𑍍𑌣 𑌰𑌾𑌧𑌾𑌵𑌰 𑌗𑍋𑌕𑍁𑌲𑍇𑌶
𑌗𑍋𑌪𑌾𑌲 𑌗𑍋𑌵𑌰𑍍𑌧𑌨𑌨𑌾𑌥 𑌵𑌿𑌷𑍍𑌣𑍋 ।
𑌜𑌿𑌹𑍍𑌵𑍇 𑌪𑌿𑌬𑌸𑍍𑌵𑌾𑌮𑍃𑌤𑌮𑍇𑌤𑌦𑍇𑌵
𑌗𑍋𑌵𑌿𑌂𑌦 𑌦𑌾𑌮𑍋𑌦𑌰 𑌮𑌾𑌧𑌵𑍇𑌤𑌿 ॥
