𑌦𑍇𑌵𑍋 𑌨𑌶𑍍𑌶𑍁𑌭𑌮𑌾𑌤𑌨𑍋𑌤𑍁 𑌦𑌶𑌧𑌾 𑌨𑌿𑌰𑍍𑌵𑌰𑍍𑌤𑌯𑌨𑍍𑌭𑍂𑌮𑌿𑌕𑌾𑌂
𑌰𑌂𑌗𑍇 𑌧𑌾𑌮𑌨𑌿 𑌲𑌬𑍍𑌧𑌨𑌿𑌰𑍍𑌭𑌰𑌰𑌸𑍈𑌰𑌧𑍍𑌯𑌕𑍍𑌷𑌿𑌤𑍋 𑌭𑌾𑌵𑍁𑌕𑍈𑌃 ।
𑌯𑌦𑍍𑌭𑌾𑌵𑍇𑌷𑍁 𑌪𑍃𑌥𑌗𑍍𑌵𑌿𑌧𑍇𑌷𑍍𑌵𑌨𑍁𑌗𑍁𑌣𑌾𑌨𑍍𑌭𑌾𑌵𑌾𑌨𑍍𑌸𑍍𑌵𑌯𑌂 𑌬𑌿𑌭𑍍𑌰𑌤𑍀
𑌯𑌦𑍍𑌧𑌰𑍍𑌮𑍈𑌰𑌿𑌹 𑌧𑌰𑍍𑌮𑌿𑌣𑍀 𑌵𑌿𑌹𑌰𑌤𑍇 𑌨𑌾𑌨𑌾𑌕𑍃𑌤𑌿𑌰𑍍𑌨𑌾𑌯𑌿𑌕𑌾 ॥ 1 ॥
𑌨𑌿𑌰𑍍𑌮𑌗𑍍𑌨𑌶𑍍𑌰𑍁𑌤𑌿𑌜𑌾𑌲𑌮𑌾𑌰𑍍𑌗𑌣𑌦𑌶𑌾𑌦𑌤𑍍𑌤𑌕𑍍𑌷𑌣𑍈𑌰𑍍𑌵𑍀𑌕𑍍𑌷𑌣𑍈-
𑌰𑌂𑌤𑌸𑍍𑌤𑌨𑍍𑌵𑌦𑌿𑌵𑌾𑌰𑌵𑌿𑌂𑌦𑌗𑌹𑌨𑌾𑌨𑍍𑌯𑍌𑌦𑌨𑍍𑌵𑌤𑍀𑌨𑌾𑌮𑌪𑌾𑌮𑍍 ।
𑌨𑌿𑌷𑍍𑌪𑍍𑌰𑌤𑍍𑌯𑍂𑌹𑌤𑌰𑌂𑌗𑌰𑌿𑌂𑌖𑌣𑌮𑌿𑌥𑌃 𑌪𑍍𑌰𑌤𑍍𑌯𑍂𑌢𑌪𑌾𑌥𑌶𑍍𑌛𑌟𑌾-
𑌡𑍋𑌲𑌾𑌰𑍋𑌹𑌸𑌦𑍋𑌹𑌳𑌂 𑌭𑌗𑌵𑌤𑍋 𑌮𑌾𑌤𑍍𑌸𑍍𑌯𑌂 𑌵𑌪𑍁𑌃 𑌪𑌾𑌤𑍁 𑌨𑌃 ॥ 2 ॥
𑌅𑌵𑍍𑌯𑌾𑌸𑍁𑌰𑍍𑌭𑍁𑌵𑌨𑌤𑍍𑌰𑌯𑍀𑌮𑌨𑌿𑌭𑍃𑌤𑌂 𑌕𑌂𑌡𑍂𑌯𑌨𑍈𑌰𑌦𑍍𑌰𑌿𑌣𑌾
𑌨𑌿𑌦𑍍𑌰𑌾𑌣𑌸𑍍𑌯 𑌪𑌰𑌸𑍍𑌯 𑌕𑍂𑌰𑍍𑌮𑌵𑌪𑍁𑌷𑍋 𑌨𑌿𑌶𑍍𑌵𑌾𑌸𑌵𑌾𑌤𑍋𑌰𑍍𑌮𑌯𑌃 ।
𑌯𑌦𑍍𑌵𑌿𑌕𑍍𑌷𑍇𑌪𑌣𑌸𑌂𑌸𑍍𑌕𑍃𑌤𑍋𑌦𑌧𑌿𑌪𑌯𑌃 𑌪𑍍𑌰𑍇𑌂𑌖𑍋𑌳𑌪𑌰𑍍𑌯𑌂𑌕𑌿𑌕𑌾-
𑌨𑌿𑌤𑍍𑌯𑌾𑌰𑍋𑌹𑌣𑌨𑌿𑌰𑍍𑌵𑍃𑌤𑍋 𑌵𑌿𑌹𑌰𑌤𑍇 𑌦𑍇𑌵𑌸𑍍𑌸𑌹𑍈𑌵 𑌶𑍍𑌰𑌿𑌯𑌾 ॥ 3 ॥
𑌗𑍋𑌪𑌾𑌯𑍇𑌦𑌨𑌿𑌶𑌂 𑌜𑌗𑌂𑌤𑌿 𑌕𑍁𑌹𑌨𑌾𑌪𑍋𑌤𑍍𑌰𑍀 𑌪𑌵𑌿𑌤𑍍𑌰𑍀𑌕𑍃𑌤-
𑌬𑍍𑌰𑌹𑍍𑌮𑌾𑌂𑌡𑌪𑍍𑌰𑌳𑌯𑍋𑌰𑍍𑌮𑌿𑌘𑍋𑌷𑌗𑍁𑌰𑍁𑌭𑌿𑌰𑍍𑌘𑍋𑌣𑌾𑌰𑌵𑍈𑌰𑍍𑌘𑍁𑌰𑍍𑌘𑍁𑌰𑍈𑌃 ।
𑌯𑌦𑍍𑌦𑌂𑌷𑍍𑌟𑍍𑌰𑌾𑌂𑌕𑍁𑌰𑌕𑍋𑌟𑌿𑌗𑌾𑌢𑌘𑌟𑌨𑌾𑌨𑌿𑌷𑍍𑌕𑌂𑌪𑌨𑌿𑌤𑍍𑌯𑌸𑍍𑌥𑌿𑌤𑌿-
𑌰𑍍𑌬𑍍𑌰𑌹𑍍𑌮𑌸𑍍𑌤𑌂𑌬𑌮𑌸𑍌𑌦𑌸𑍌 𑌭𑌗𑌵𑌤𑍀𑌮𑍁𑌸𑍍𑌤𑍇𑌵𑌵𑌿𑌶𑍍𑌵𑌂𑌭𑌰𑌾 ॥ 4 ॥
𑌪𑍍𑌰𑌤𑍍𑌯𑌾𑌦𑌿𑌷𑍍𑌟𑌪𑍁𑌰𑌾𑌤𑌨𑌪𑍍𑌰𑌹𑌰𑌣𑌗𑍍𑌰𑌾𑌮𑌃𑌕𑍍𑌷𑌣𑌂 𑌪𑌾𑌣𑌿𑌜𑍈-
𑌰𑌵𑍍𑌯𑌾𑌤𑍍𑌤𑍍𑌰𑍀𑌣𑌿 𑌜𑌗𑌂𑌤𑍍𑌯𑌕𑍁𑌂𑌠𑌮𑌹𑌿𑌮𑌾 𑌵𑍈𑌕𑍁𑌂𑌠𑌕𑌂𑌠𑍀𑌰𑌵𑌃 ।
𑌯𑌤𑍍𑌪𑍍𑌰𑌾𑌦𑍁𑌰𑍍𑌭𑌵𑌨𑌾𑌦𑌵𑌂𑌧𑍍𑌯𑌜𑌠𑌰𑌾𑌯𑌾𑌦𑍃𑌚𑍍𑌛𑌿𑌕𑌾𑌦𑍍𑌵𑍇𑌧𑌸𑌾𑌂-
𑌯𑌾 𑌕𑌾𑌚𑌿𑌤𑍍𑌸𑌹𑌸𑌾 𑌮𑌹𑌾𑌸𑍁𑌰𑌗𑍃𑌹𑌸𑍍𑌥𑍂𑌣𑌾𑌪𑌿𑌤𑌾𑌮𑌹𑍍𑌯𑌭𑍃𑌤𑍍 ॥ 5 ॥
𑌵𑍍𑌰𑍀𑌡𑌾𑌵𑌿𑌦𑍍𑌧𑌵𑌦𑌾𑌨𑍍𑌯𑌦𑌾𑌨𑌵𑌯𑌶𑍋𑌨𑌾𑌸𑍀𑌰𑌧𑌾𑌟𑍀𑌭𑌟-
𑌸𑍍𑌤𑍍𑌰𑍈𑌯𑌕𑍍𑌷𑌂 𑌮𑌕𑍁𑌟𑌂 𑌪𑍁𑌨𑌨𑍍𑌨𑌵𑌤𑍁 𑌨𑌸𑍍𑌤𑍍𑌰𑍈𑌵𑌿𑌕𑍍𑌰𑌮𑍋 𑌵𑌿𑌕𑍍𑌰𑌮𑌃 ।
𑌯𑌤𑍍𑌪𑍍𑌰𑌸𑍍𑌤𑌾𑌵𑌸𑌮𑍁𑌚𑍍𑌛𑍍𑌰𑌿𑌤𑌧𑍍𑌵𑌜𑌪𑌟𑍀𑌵𑍃𑌤𑍍𑌤𑌾𑌂𑌤𑌸𑌿𑌦𑍍𑌧𑌾𑌂𑌤𑌿𑌭𑌿-
𑌸𑍍𑌸𑍍𑌰𑍋𑌤𑍋𑌭𑌿𑌸𑍍𑌸𑍁𑌰𑌸𑌿𑌂𑌧𑍁𑌰𑌷𑍍𑌟𑌸𑍁𑌦𑌿𑌶𑌾𑌸𑍌𑌧𑍇𑌷𑍁 𑌦𑍋𑌧𑍂𑌯𑌤𑍇 ॥ 6 ॥
𑌕𑍍𑌰𑍋𑌧𑌾𑌗𑍍𑌨𑌿𑌂 𑌜𑌮𑌦𑌗𑍍𑌨𑌿𑌪𑍀𑌡𑌨𑌭𑌵𑌂 𑌸𑌂𑌤𑌰𑍍𑌪𑌯𑌿𑌷𑍍𑌯𑌨𑍍 𑌕𑍍𑌰𑌮𑌾-
𑌦𑌕𑍍𑌷𑌤𑍍𑌰𑌾𑌮𑌿𑌹 𑌸𑌂𑌤𑌤𑌕𑍍𑌷 𑌯 𑌇𑌮𑌾𑌂 𑌤𑍍𑌰𑌿𑌸𑍍𑌸𑌪𑍍𑌤𑌕𑍃𑌤𑍍𑌵𑌃 𑌕𑍍𑌷𑌿𑌤𑌿𑌮𑍍 ।
𑌦𑌤𑍍𑌵𑌾 𑌕𑌰𑍍𑌮𑌣𑌿 𑌦𑌕𑍍𑌷𑌿𑌣𑌾𑌂 𑌕𑍍𑌵𑌚𑌨 𑌤𑌾𑌮𑌾𑌸𑍍𑌕𑌂𑌦𑍍𑌯 𑌸𑌿𑌂𑌧𑍁𑌂 𑌵𑌸-
𑌨𑍍𑌨𑌬𑍍𑌰𑌹𑍍𑌮𑌣𑍍𑌯𑌮𑌪𑌾𑌕𑌰𑍋𑌤𑍁 𑌭𑌗𑌵𑌾𑌨𑌾𑌬𑍍𑌰𑌹𑍍𑌮𑌕𑍀𑌟𑌂 𑌮𑍁𑌨𑌿𑌃 ॥ ॥
𑌪𑌾𑌰𑌾𑌵𑌾𑌰𑌪𑌯𑍋𑌵𑌿𑌶𑍋𑌷𑌣𑌕𑌲𑌾𑌪𑌾𑌰𑍀𑌣𑌕𑌾𑌲𑌾𑌨𑌲-
𑌜𑍍𑌵𑌾𑌲𑌾𑌜𑌾𑌲𑌵𑌿𑌹𑌾𑌰𑌹𑌾𑌰𑌿𑌵𑌿𑌶𑌿𑌖𑌵𑍍𑌯𑌾𑌪𑌾𑌰𑌘𑍋𑌰𑌕𑍍𑌰𑌮𑌃 ।
𑌸𑌰𑍍𑌵𑌾𑌵𑌸𑍍𑌥𑌸𑌕𑍃𑌤𑍍𑌪𑍍𑌰𑌪𑌨𑍍𑌨𑌜𑌨𑌤𑌾𑌸𑌂𑌰𑌕𑍍𑌷𑌣𑍈𑌕𑌵𑍍𑌰𑌤𑍀
𑌧𑌰𑍍𑌮𑍋 𑌵𑌿𑌗𑍍𑌰𑌹𑌵𑌾𑌨𑌧𑌰𑍍𑌮𑌵𑌿𑌰𑌤𑌿𑌂 𑌧𑌨𑍍𑌵𑍀 𑌸𑌤𑌨𑍍𑌵𑍀𑌤𑍁 𑌨𑌃 ॥ ॥
𑌫𑌕𑍍𑌕𑌤𑍍𑌕𑍌𑌰𑌵𑌪𑌟𑍍𑌟𑌣𑌪𑍍𑌰𑌭𑍃𑌤𑌯𑌃 𑌪𑍍𑌰𑌾𑌸𑍍𑌤𑌪𑍍𑌰𑌲𑌂𑌬𑌾𑌦𑌯-
𑌸𑍍𑌤𑌾𑌲𑌾𑌂𑌕𑌾𑌸𑍍𑌯𑌤𑌥𑌾𑌵𑌿𑌧𑌾 𑌵𑌿𑌹𑍃𑌤𑌯𑌸𑍍𑌤𑌨𑍍𑌵𑌂𑌤𑍁 𑌭𑌦𑍍𑌰𑌾𑌣𑌿 𑌨𑌃 ।
𑌕𑍍𑌷𑍀𑌰𑌂 𑌶𑌰𑍍𑌕𑌰𑌯𑍇𑌵 𑌯𑌾𑌭𑌿𑌰𑌪𑍃𑌥𑌗𑍍𑌭𑍂𑌤𑌾𑌃 𑌪𑍍𑌰𑌭𑍂𑌤𑍈𑌰𑍍𑌗𑍁𑌣𑍈-
𑌰𑌾𑌕𑍌𑌮𑌾𑌰𑌕𑌮𑌸𑍍𑌵𑌦𑌂𑌤𑌜𑌗𑌤𑍇 𑌕𑍃𑌷𑍍𑌣𑌸𑍍𑌯 𑌤𑌾𑌃 𑌕𑍇𑌳𑌯𑌃 ॥ ॥
𑌨𑌾𑌥𑌾𑌯𑍈𑌵 𑌨𑌮𑌃 𑌪𑌦𑌂 𑌭𑌵𑌤𑍁 𑌨𑌶𑍍𑌚𑌿𑌤𑍍𑌰𑍈𑌶𑍍𑌚𑌰𑌿𑌤𑍍𑌰𑌕𑍍𑌰𑌮𑍈-
𑌰𑍍𑌭𑍂𑌯𑍋𑌭𑌿𑌰𑍍𑌭𑍁𑌵𑌨𑌾𑌨𑍍𑌯𑌮𑍂𑌨𑌿𑌕𑍁𑌹𑌨𑌾𑌗𑍋𑌪𑌾𑌯 𑌗𑍋𑌪𑌾𑌯𑌤𑍇 ।
𑌕𑌾𑌳𑌿𑌂𑌦𑍀𑌰𑌸𑌿𑌕𑌾𑌯𑌕𑌾𑌳𑌿𑌯𑌫𑌣𑌿𑌸𑍍𑌫𑌾𑌰𑌸𑍍𑌫𑌟𑌾𑌵𑌾𑌟𑌿𑌕𑌾-
𑌰𑌂𑌗𑍋𑌤𑍍𑌸𑌂𑌗𑌵𑌿𑌶𑌂𑌕𑌚𑌂𑌕𑍍𑌰𑌮𑌧𑍁𑌰𑌾𑌪𑌰𑍍𑌯𑌾𑌯 𑌚𑌰𑍍𑌯𑌾𑌯𑌤𑍇 ॥ 10 ॥
𑌭𑌾𑌵𑌿𑌨𑍍𑌯𑌾 𑌦𑌶𑌯𑌾𑌭𑌵𑌨𑍍𑌨𑌿𑌹 𑌭𑌵𑌧𑍍𑌵𑌂𑌸𑌾𑌯 𑌨𑌃 𑌕𑌲𑍍𑌪𑌤𑌾𑌂
𑌕𑌲𑍍𑌕𑍀 𑌵𑌿𑌷𑍍𑌣𑍁𑌯𑌶𑌸𑍍𑌸𑍁𑌤𑌃 𑌕𑌲𑌿𑌕𑌥𑌾𑌕𑌾𑌲𑍁𑌷𑍍𑌯𑌕𑍂𑌲𑌂𑌕𑌷𑌃 ।
𑌨𑌿𑌶𑍍𑌶𑍇𑌷𑌕𑍍𑌷𑌤𑌕𑌂𑌟𑌕𑍇 𑌕𑍍𑌷𑌿𑌤𑌿𑌤𑌲𑍇 𑌧𑌾𑌰𑌾𑌜𑌲𑍌𑌘𑍈𑌰𑍍𑌧𑍍𑌰𑍁𑌵𑌂
𑌧𑌰𑍍𑌮𑌂 𑌕𑌾𑌰𑍍𑌤𑌯𑍁𑌗𑌂 𑌪𑍍𑌰𑌰𑍋𑌹𑌯𑌤𑌿 𑌯𑌨𑍍𑌨𑌿𑌸𑍍𑌤𑍍𑌰𑌿𑌂𑌶𑌧𑌾𑌰𑌾𑌧𑌰𑌃 ॥ 11 ॥
𑌇𑌚𑍍𑌛𑌾𑌮𑍀𑌨 𑌵𑌿𑌹𑌾𑌰𑌕𑌚𑍍𑌛𑌪 𑌮𑌹𑌾𑌪𑍋𑌤𑍍𑌰𑌿𑌨𑍍 𑌯𑌦𑍃𑌚𑍍𑌛𑌾𑌹𑌰𑍇
𑌰𑌕𑍍𑌷𑌾𑌵𑌾𑌮𑌨 𑌰𑍋𑌷𑌰𑌾𑌮 𑌕𑌰𑍁𑌣𑌾𑌕𑌾𑌕𑍁𑌤𑍍𑌸𑍍𑌥 𑌹𑍇𑌲𑌾𑌹𑌲𑌿𑌨𑍍 ।
𑌕𑍍𑌰𑍀𑌡𑌾𑌵𑌲𑍍𑌲𑌵 𑌕𑌲𑍍𑌕𑌿𑌵𑌾𑌹𑌨 𑌦𑌶𑌾𑌕𑌲𑍍𑌕𑌿𑌨𑍍𑌨𑌿𑌤𑌿 𑌪𑍍𑌰𑌤𑍍𑌯𑌹𑌂
𑌜𑌲𑍍𑌪𑌂𑌤𑌃 𑌪𑍁𑌰𑍁𑌷𑌾𑌃 𑌪𑍁𑌨𑌂𑌤𑍁 𑌭𑍁𑌵𑌨𑌂 𑌪𑍁𑌣𑍍𑌯𑍌𑌘𑌪𑌣𑍍𑌯𑌾𑌪𑌣𑌾𑌃 ॥
𑌵𑌿𑌦𑍍𑌯𑍋𑌦𑌨𑍍𑌵𑌤𑌿 𑌵𑍇𑌂𑌕𑌟𑍇𑌶𑍍𑌵𑌰𑌕𑌵𑍌 𑌜𑌾𑌤𑌂 𑌜𑌗𑌨𑍍𑌮𑌂𑌗𑌳𑌂
𑌦𑍇𑌵𑍇𑌶𑌸𑍍𑌯𑌦𑌶𑌾𑌵𑌤𑌾𑌰𑌵𑌿𑌷𑌯𑌂 𑌸𑍍𑌤𑍋𑌤𑍍𑌰𑌂 𑌵𑌿𑌵𑌕𑍍𑌷𑍇𑌤 𑌯𑌃 ।
𑌵𑌕𑍍𑌤𑍍𑌰𑍇 𑌤𑌸𑍍𑌯 𑌸𑌰𑌸𑍍𑌵𑌤𑍀 𑌬𑌹𑍁𑌮𑍁𑌖𑍀 𑌭𑌕𑍍𑌤𑌿𑌃 𑌪𑌰𑌾 𑌮𑌾𑌨𑌸𑍇
𑌶𑍁𑌦𑍍𑌧𑌿𑌃 𑌕𑌾𑌪𑌿 𑌤𑌨𑍌 𑌦𑌿𑌶𑌾𑌸𑍁 𑌦𑌶𑌸𑍁 𑌖𑍍𑌯𑌾𑌤𑌿𑌶𑍍𑌶𑍁𑌭𑌾 𑌜𑍃𑌂𑌭𑌤𑍇 ॥
𑌇𑌤𑌿 𑌕𑌵𑌿𑌤𑌾𑌰𑍍𑌕𑌿𑌕𑌸𑌿𑌂𑌹𑌸𑍍𑌯 𑌸𑌰𑍍𑌵𑌤𑌂𑌤𑍍𑌰𑌸𑍍𑌵𑌤𑌂𑌤𑍍𑌰𑌸𑍍𑌯 𑌶𑍍𑌰𑍀𑌮𑌦𑍍𑌵𑍇𑌂𑌕𑌟𑌨𑌾𑌥𑌸𑍍𑌯 𑌵𑍇𑌦𑌾𑌂𑌤𑌾𑌚𑌾𑌰𑍍𑌯𑌸𑍍𑌯 𑌕𑍃𑌤𑌿𑌷𑍁 𑌦𑌶𑌾𑌵𑌤𑌾𑌰𑌸𑍍𑌤𑍋𑌤𑍍𑌰𑌮𑍍 ।
