𑌋𑌷𑌯 𑌊𑌚𑍁 ।
𑌜𑌿𑌤𑌂 𑌜𑌿𑌤𑌂 𑌤𑍇𑌽𑌜𑌿𑌤 𑌯𑌜𑍍𑌞𑌭𑌾𑌵𑌨𑌾
𑌤𑍍𑌰𑌯𑍀𑌂 𑌤𑌨𑍂𑌂 𑌸𑍍𑌵𑌾𑌂 𑌪𑌰𑌿𑌧𑍁𑌨𑍍𑌵𑌤𑍇 𑌨𑌮𑌃 ।
𑌯𑌦𑍍𑌰𑍋𑌮𑌗𑌰𑍍𑌤𑍇𑌷𑍁 𑌨𑌿𑌲𑌿𑌲𑍍𑌯𑍁𑌰𑌧𑍍𑌵𑌰𑌾𑌃
𑌤𑌸𑍍𑌮𑍈 𑌨𑌮𑌃 𑌕𑌾𑌰𑌣𑌸𑍂𑌕𑌰𑌾𑌯 𑌤𑍇 ॥ 1 ॥
𑌰𑍂𑌪𑌂 𑌤𑌵𑍈𑌤𑌨𑍍𑌨𑌨𑍁 𑌦𑍁𑌷𑍍𑌕𑍃𑌤𑌾𑌤𑍍𑌮𑌨𑌾𑌂
𑌦𑍁𑌰𑍍𑌦𑌰𑍍𑌶𑌨𑌂 𑌦𑍇𑌵 𑌯𑌦𑌧𑍍𑌵𑌰𑌾𑌤𑍍𑌮𑌕𑌮𑍍 ।
𑌛𑌂𑌦𑌾𑌂𑌸𑌿 𑌯𑌸𑍍𑌯 𑌤𑍍𑌵𑌚𑌿 𑌬𑌰𑍍𑌹𑌿𑌰𑍋𑌮-
𑌸𑍍𑌸𑍍𑌵𑌾𑌜𑍍𑌯𑌂 𑌦𑍃𑌶𑌿 𑌤𑍍𑌵𑌂𑌘𑍍𑌰𑌿𑌷𑍁 𑌚𑌾𑌤𑍁𑌰𑍍𑌹𑍋𑌤𑍍𑌰𑌮𑍍 ॥ 2 ॥
𑌸𑍍𑌰𑍁𑌕𑍍𑌤𑍁𑌂𑌡 𑌆𑌸𑍀𑌤𑍍𑌸𑍍𑌰𑍁𑌵 𑌈𑌶 𑌨𑌾𑌸𑌯𑍋-
𑌰𑌿𑌡𑍋𑌦𑌰𑍇 𑌚𑌮𑌸𑌾𑌃 𑌕𑌰𑍍𑌣𑌰𑌂𑌧𑍍𑌰𑍇 ।
𑌪𑍍𑌰𑌾𑌶𑌿𑌤𑍍𑌰𑌮𑌾𑌸𑍍𑌯𑍇 𑌗𑍍𑌰𑌸𑌨𑍇 𑌗𑍍𑌰𑌹𑌾𑌸𑍍𑌤𑍁 𑌤𑍇
𑌯𑌚𑍍𑌚𑌰𑍍𑌵𑌣𑌂𑌤𑍇 𑌭𑌗𑌵𑌨𑍍𑌨𑌗𑍍𑌨𑌿𑌹𑍋𑌤𑍍𑌰𑌮𑍍 ॥ 3 ॥
𑌦𑍀𑌕𑍍𑌷𑌾𑌨𑍁𑌜𑌨𑍍𑌮𑍋𑌪𑌸𑌦𑌃 𑌶𑌿𑌰𑍋𑌧𑌰𑌂
𑌤𑍍𑌵𑌂 𑌪𑍍𑌰𑌾𑌯𑌣𑍀𑌯𑍋 𑌦𑌯𑌨𑍀𑌯 𑌦𑌂𑌷𑍍𑌟𑍍𑌰𑌃 ।
𑌜𑌿𑌹𑍍𑌵𑌾 𑌪𑍍𑌰𑌵𑌰𑍍𑌗𑍍𑌯𑌸𑍍𑌤𑌵 𑌶𑍀𑌰𑍍𑌷𑌕𑌂 𑌕𑍍𑌰𑌤𑍋𑌃
𑌸𑌭𑍍𑌯𑌾𑌵𑌸𑌥𑍍𑌯𑌂 𑌚𑌿𑌤𑌯𑍋𑌽𑌸𑌵𑍋 𑌹𑌿 𑌤𑍇 ॥ 4 ॥
𑌸𑍋𑌮𑌸𑍍𑌤𑍁 𑌰𑍇𑌤𑌃 𑌸𑌵𑌨𑌾𑌨𑍍𑌯𑌵𑌸𑍍𑌥𑌿𑌤𑌿𑌃
𑌸𑌂𑌸𑍍𑌥𑌾𑌵𑌿𑌭𑍇𑌦𑌾𑌸𑍍𑌤𑌵 𑌦𑍇𑌵 𑌧𑌾𑌤𑌵𑌃 ।
𑌸𑌤𑍍𑌰𑌾𑌣𑌿 𑌸𑌰𑍍𑌵𑌾𑌣𑌿 𑌶𑌰𑍀𑌰𑌸𑌂𑌧𑌿-
𑌸𑍍𑌤𑍍𑌵𑌂 𑌸𑌰𑍍𑌵𑌯𑌜𑍍𑌞𑌕𑍍𑌰𑌤𑍁𑌰𑌿𑌷𑍍𑌟𑌿𑌬𑌂𑌧𑌨𑌃 ॥ 5 ॥
𑌨𑌮𑍋 𑌨𑌮𑌸𑍍𑌤𑍇𑌽𑌖𑌿𑌲𑌯𑌂𑌤𑍍𑌰𑌦𑍇𑌵𑌤𑌾
𑌦𑍍𑌰𑌵𑍍𑌯𑌾𑌯 𑌸𑌰𑍍𑌵𑌕𑍍𑌰𑌤𑌵𑍇 𑌕𑍍𑌰𑌿𑌯𑌾𑌤𑍍𑌮𑌨𑍇 ।
𑌵𑍈𑌰𑌾𑌗𑍍𑌯 𑌭𑌕𑍍𑌤𑍍𑌯𑌾𑌤𑍍𑌮𑌜𑌯𑌾𑌽𑌨𑍁𑌭𑌾𑌵𑌿𑌤
𑌜𑍍𑌞𑌾𑌨𑌾𑌯 𑌵𑌿𑌦𑍍𑌯𑌾𑌗𑍁𑌰𑌵𑍇 𑌨𑌮𑍋 𑌨𑌮𑌃 ॥ 6 ॥
𑌦𑌂𑌷𑍍𑌟𑍍𑌰𑌾𑌗𑍍𑌰𑌕𑍋𑌟𑍍𑌯𑌾 𑌭𑌗𑌵𑌂𑌸𑍍𑌤𑍍𑌵𑌯𑌾 𑌧𑍃𑌤𑌾
𑌵𑌿𑌰𑌾𑌜𑌤𑍇 𑌭𑍂𑌧𑌰 𑌭𑍂𑌸𑍍𑌸𑌭𑍂𑌧𑌰𑌾 ।
𑌯𑌥𑌾 𑌵𑌨𑌾𑌨𑍍𑌨𑌿𑌸𑍍𑌸𑌰𑌤𑍋 𑌦𑌤𑌾 𑌧𑍃𑌤𑌾
𑌮𑌤𑌂𑌗𑌜𑍇𑌂𑌦𑍍𑌰𑌸𑍍𑌯 𑌸 𑌪𑌤𑍍𑌰𑌪𑌦𑍍𑌮𑌿𑌨𑍀 ॥ ॥
𑌤𑍍𑌰𑌯𑍀𑌮𑌯𑌂 𑌰𑍂𑌪𑌮𑌿𑌦𑌂 𑌚 𑌸𑍌𑌕𑌰𑌂
𑌭𑍂𑌮𑌂𑌡𑌲𑍇 𑌨𑌾𑌥 𑌤𑌦𑌾 𑌧𑍃𑌤𑍇𑌨 𑌤𑍇 ।
𑌚𑌕𑌾𑌸𑍍𑌤𑌿 𑌶𑍃𑌂𑌗𑍋𑌢𑌘𑌨𑍇𑌨 𑌭𑍂𑌯𑌸𑌾
𑌕𑍁𑌲𑌾𑌚𑌲𑍇𑌂𑌦𑍍𑌰𑌸𑍍𑌯 𑌯𑌥𑍈𑌵 𑌵𑌿𑌭𑍍𑌰𑌮𑌃 ॥ ॥
𑌸𑌂𑌸𑍍𑌥𑌾𑌪𑌯𑍈𑌨𑌾𑌂 𑌜𑌗𑌤𑌾𑌂 𑌸𑌤𑌸𑍍𑌥𑍁𑌷𑌾𑌂
𑌲𑍋𑌕𑌾𑌯 𑌪𑌤𑍍𑌨𑍀𑌮𑌸𑌿 𑌮𑌾𑌤𑌰𑌂 𑌪𑌿𑌤𑌾 ।
𑌵𑌿𑌧𑍇𑌮 𑌚𑌾𑌸𑍍𑌯𑍈 𑌨𑌮𑌸𑌾 𑌸𑌹 𑌤𑍍𑌵𑌯𑌾
𑌯𑌸𑍍𑌯𑌾𑌂 𑌸𑍍𑌵𑌤𑍇𑌜𑍋𑌽𑌗𑍍𑌨𑌿𑌮𑌿𑌵𑌾𑌰𑌣𑌾𑌵𑌧𑌾𑌃 ॥ ॥
𑌕𑌃 𑌶𑍍𑌰𑌦𑍍𑌧𑌧𑍀𑌤𑌾𑌨𑍍𑌯𑌤𑌮𑌸𑍍𑌤𑌵 𑌪𑍍𑌰𑌭𑍋
𑌰𑌸𑌾𑌂 𑌗𑌤𑌾𑌯𑌾 𑌭𑍁𑌵 𑌉𑌦𑍍𑌵𑌿𑌬𑌰𑍍𑌹𑌣𑌮𑍍 ।
𑌨 𑌵𑌿𑌸𑍍𑌮𑌯𑍋𑌽𑌸𑍌 𑌤𑍍𑌵𑌯𑌿 𑌵𑌿𑌶𑍍𑌵𑌵𑌿𑌸𑍍𑌮𑌯𑍇
𑌯𑍋 𑌮𑌾𑌯𑌯𑍇𑌦𑌂 𑌸𑌸𑍃𑌜𑍇𑌽𑌤𑌿 𑌵𑌿𑌸𑍍𑌮𑌯𑌮𑍍 ॥ 10 ॥
𑌵𑌿𑌧𑍁𑌨𑍍𑌵𑌤𑌾 𑌵𑍇𑌦𑌮𑌯𑌂 𑌨𑌿𑌜𑌂 𑌵𑌪𑍁-
𑌰𑍍𑌜𑌨𑌸𑍍𑌤𑌪𑌃 𑌸𑌤𑍍𑌯𑌨𑌿𑌵𑌾𑌸𑌿𑌨𑍋 𑌵𑌯𑌮𑍍 ।
𑌸𑌟𑌾𑌶𑌿𑌖𑍋𑌦𑍍𑌧𑍂𑌤 𑌶𑌿𑌵𑌾𑌂𑌬𑍁𑌬𑌿𑌂𑌦𑍁𑌭𑌿-
𑌰𑍍𑌵𑌿𑌮𑍃𑌜𑍍𑌯𑌮𑌾𑌨𑌾 𑌭𑍃𑌶𑌮𑍀𑌶 𑌪𑌾𑌵𑌿𑌤𑌾𑌃 ॥ 11 ॥
𑌸 𑌵𑍈 𑌬𑌤 𑌭𑍍𑌰𑌷𑍍𑌟𑌮𑌤𑌿𑌸𑍍𑌤𑌵𑍈𑌷 𑌤𑍇
𑌯𑌃 𑌕𑌰𑍍𑌮𑌣𑌾𑌂 𑌪𑌾𑌰𑌮𑌪𑌾𑌰𑌕𑌰𑍍𑌮𑌣𑌃 ।
𑌯𑌦𑍍𑌯𑍋𑌗𑌮𑌾𑌯𑌾 𑌗𑍁𑌣 𑌯𑍋𑌗 𑌮𑍋𑌹𑌿𑌤𑌂
𑌵𑌿𑌶𑍍𑌵𑌂 𑌸𑌮𑌸𑍍𑌤𑌂 𑌭𑌗𑌵𑌨𑍍 𑌵𑌿𑌧𑍇𑌹𑌿 𑌶𑌮𑍍 ॥ 12 ॥
𑌇𑌤𑌿 𑌶𑍍𑌰𑍀𑌮𑌦𑍍𑌭𑌾𑌗𑌵𑌤𑍇 𑌮𑌹𑌾𑌪𑍁𑌰𑌾𑌣𑍇 𑌤𑍃𑌤𑍀𑌯𑌸𑍍𑌕𑌂𑌧𑍇 𑌶𑍍𑌰𑍀 𑌵𑌰𑌾𑌹 𑌪𑍍𑌰𑌾𑌦𑍁𑌰𑍍𑌭𑌾𑌵𑍋𑌨𑌾𑌮 𑌤𑍍𑌰𑌯𑍋𑌦𑌶𑍋𑌧𑍍𑌯𑌾𑌯𑌃 ।
